സിഡ്‌നിയിലെ കൂട്ടക്കുരുതിയ്ക്ക് പിന്നിൽ അച്ഛനും മകനും?

DECEMBER 15, 2025, 5:16 AM

സിഡ്നി: ഓസ്ട്രേലിയയെ അക്ഷരാർത്ഥത്തിൽ ഞെട്ടിപ്പിച്ച സംഭവമായിരുന്നു സിഡ്‌നിയിലെ വെടിവെപ്പ്. ഇതിന് പിന്നാലെ വന്ന മറ്റൊരു വാർത്തയിലും ഞെട്ടിത്തരിച്ചിരിക്കുകയാണ് ജനം. ഈ കൂട്ടക്കുരുതിയ്ക്ക് പിന്നിൽ അച്ഛനും മകനുമാണെന്ന് റിപ്പോർട്ട്.

തോക്കുധാരികളായ 50കാരനായ അച്ഛനും 24കാരനായ മകനുമാണ് ആക്രമണം നടത്തിയതെന്ന് ന്യൂ സൗത്ത് വെയിൽസ് പോലീസ് തിരിച്ചറിഞ്ഞതായിട്ടാണ് റിപ്പോര്‍ട്ട്. മറ്റാരും ഉൾപ്പെട്ടിട്ടില്ലെന്നാണ് ഇതുവരെയുള്ള നിഗമനം.

ആക്രമണത്തിൽ 15 പേർ കൊല്ലപ്പെടുകയും 40 ലധികം പേർക്ക് പരിക്കേൽക്കുകയും ചെയ്തിരുന്നു.

ബോണ്ടി കടൽതീരത്ത് ജൂതവിഭാഗത്തിന്റെ ഹനുക്ക ആഘോഷത്തിനിടെയാണ് വെടിവെപ്പുണ്ടായത്. അക്രമികളിലൊരാൾ മരിച്ചു. മറ്റൊരാൾ ചികിത്സയിലാണ്. സംഭവത്തെ തീവ്രവാദ ആക്രമണമായി പരിഗണിച്ചെന്ന് പൊലീസ് പറഞ്ഞു.

അന്വേഷണത്തിന്റെ ഭാഗമായി പടിഞ്ഞാറൻ സിഡ്‌നി പ്രാന്തപ്രദേശങ്ങളായ ബോണിറിഗിലെയും ക്യാമ്പ്‌സിയിലെയും ഇവരുടെ താമസ സ്ഥലത്ത് സെർച്ച് വാറണ്ടുകൾ പുറപ്പെടുവിച്ചു.