ഡിസി പ്രപഞ്ചത്തിലേക്ക് സെബാസ്റ്റ്യൻ സ്റ്റാൻ; 'ദി ബാറ്റ്മാൻ 2' ജനങ്ങളെ അമ്പരപ്പിക്കുമെന്ന് നടൻ

MAY 13, 2026, 12:14 AM

റോബർട്ട് പാറ്റിൻസൺ നായകനാകുന്ന 'ദി ബാറ്റ്മാൻ' രണ്ടാം ഭാഗത്തിൽ സെബാസ്റ്റ്യൻ സ്റ്റാനും പ്രധാന വേഷത്തിലെത്തുന്നു. ചിത്രത്തിൽ ഹാർവി ഡെന്റ് എന്ന വില്ലൻ കഥാപാത്രത്തെയാണ് അദ്ദേഹം അവതരിപ്പിക്കുന്നതെന്നാണ് വിവരം. 'ഡെഡ്‌ലൈൻ' മാഗസിന് നൽകിയ അഭിമുഖത്തിലാണ് താരം ഈ വലിയ പ്രോജക്റ്റിനെക്കുറിച്ചുള്ള തന്റെ കാഴ്ചപ്പാടുകൾ പങ്കുവെച്ചത്.

മാറ്റ് റീവ്സ് സംവിധാനം ചെയ്യുന്ന ഈ ചിത്രം വളരെ "അംബീഷ്യസ്" ആണെന്നും പ്രേക്ഷകരെ അത്ഭുതപ്പെടുത്തുന്ന ഒന്നായിരിക്കുമെന്നും സ്റ്റാൻ പറഞ്ഞു. മാർവൽ സിനിമകളിലൂടെ പ്രിയങ്കരനായ താരം ഡിസി പ്രപഞ്ചത്തിലേക്ക് എത്തുന്നു എന്നത് ആരാധകർക്കിടയിൽ വലിയ ചർച്ചയായിട്ടുണ്ട്. ബാറ്റ്മാൻ സിനിമകൾ കാലങ്ങളായി നിലനിൽക്കുന്നതിന് പിന്നിൽ വ്യക്തമായ കാരണങ്ങളുണ്ടെന്നും കുട്ടികൾക്കും യുവാക്കൾക്കും ഈ കഥാപാത്രങ്ങളുമായി വേഗത്തിൽ പൊരുത്തപ്പെടാൻ കഴിയുമെന്നും അദ്ദേഹം കൂട്ടിച്ചേർത്തു.

ആദ്യ ഭാഗത്തിന്റെ വലിയ വിജയത്തിന് ശേഷം എത്തുന്ന 'ദി ബാറ്റ്മാൻ 2'-ൽ ഹോളിവുഡിലെ പ്രമുഖ താരങ്ങളാണ് അണിനിരക്കുന്നത്. സെബാസ്റ്റ്യൻ സ്റ്റാനെ കൂടാതെ ഓസ്കാർ നോമിനിയായ സ്കാർലറ്റ് ജോഹാൻസണും ഈ ചിത്രത്തിന്റെ ഭാഗമാകുന്നുണ്ട്.

കോളിൻ ഫാരെൽ (പെൻഗ്വിൻ), ജെഫ്രി റൈറ്റ് (കമ്മീഷണർ ഗോർഡൻ), ആൻഡി സെർക്കിസ് (ആൽഫ്രഡ്) എന്നിവർ തങ്ങളുടെ വേഷങ്ങളിൽ തിരിച്ചെത്തും.മാറ്റ് റീവ്‌സും മാറ്റ്‌സൺ ടോംലിനും ചേർന്നാണ് തിരക്കഥ ഒരുക്കിയിരിക്കുന്നത്.

സെബാസ്റ്റ്യൻ സ്റ്റാൻ അവസാനമായി അഭിനയിച്ചത് 2025-ൽ പുറത്തിറങ്ങിയ 'തണ്ടർബോൾട്ട്‌സ്' എന്ന മാർവൽ ചിത്രത്തിലാണ്. ഇനി വരാനിരിക്കുന്ന 'അവഞ്ചേഴ്‌സ്: ഡൂംസ്‌ഡേ' എന്ന ചിത്രത്തിലും അദ്ദേഹം പ്രധാന വേഷത്തിൽ എത്തും. 'ദി ബാറ്റ്മാൻ 2' ഒരു മികച്ച സിനിമാനുഭവമായിരിക്കുമെന്നും സംവിധായകൻ മാറ്റ് റീവ്‌സിനൊപ്പം പ്രവർത്തിക്കാൻ ഏറെ ആവേശമുണ്ടെന്നും താരം വ്യക്തമാക്കി.