കാനഡയിലെ ഭവന പ്രതിസന്ധി: തദ്ദേശ നികുതികൾ ഒഴിവാക്കിയാൽ നിർമ്മാണത്തിൽ വൻ കുതിച്ചുചാട്ടമുണ്ടാകുമെന്ന് റിപ്പോർട്ട്

JUNE 3, 2026, 9:35 PM

ഒട്ടാവ: കാനഡ നേരിടുന്ന രൂക്ഷമായ ഭവന പ്രതിസന്ധി പരിഹരിക്കാൻ മുൻസിപ്പാലിറ്റികൾ ഈടാക്കുന്ന ഭീമമായ വികസന ചാർജുകൾ കുറയ്ക്കുകയോ പൂർണ്ണമായി ഒഴിവാക്കുകയോ ചെയ്യണമെന്ന് ഫെഡറൽ ഭവന ഏജൻസിയായ കാനഡ മോർട്ട്ഗേജ് ആൻഡ് ഹൗസിംഗ് കോർപ്പറേഷൻ. പുതിയ വീടുകൾ നിർമ്മിക്കുമ്പോൾ ഡ്രെയിനേജ്, വൈദ്യുതി, കുടിവെള്ളം തുടങ്ങിയ അടിസ്ഥാന സൗകര്യങ്ങൾ ഒരുക്കുന്നതിനായി തദ്ദേശ സ്വയംഭരണ സ്ഥാപനങ്ങൾ ഈടാക്കുന്ന ഈ നികുതികൾ ഭവന നിർമ്മാണ മേഖലയ്ക്ക് വലിയൊരു തടസ്സമാണെന്ന് സിഎംഎച്ച്സി വ്യക്തമാക്കുന്നു.

കാനഡയിലെ 40 മുൻസിപ്പാലിറ്റികളിൽ നിന്നുള്ള വിവരങ്ങൾ വിശകലനം ചെയ്ത് തയ്യാറാക്കിയ റിപ്പോർട്ടിലാണ് വികസന ചാർജുകളും പുതിയ വീടുകളുടെ നിർമ്മാണവും തമ്മിലുള്ള ബന്ധത്തെക്കുറിച്ച് വ്യക്തമാക്കുന്നത്. 50%-60% കുറവ് വരുത്തിയാൽ രാജ്യത്തെ ഏറ്റവും ചെലവേറിയ ഭവന വിപണികളായ ടൊറന്റോ, വാൻകൂവർ എന്നിവിടങ്ങളിൽ നിർമ്മാണ പ്രോജക്ടുകളിൽ 5 ശതമാനത്തിന്റെ വർദ്ധനവുണ്ടാകും.

പൂർണ്ണമായി ഒഴിവാക്കിയാൽ ടൊറന്റോയിലും വാൻകൂവറിലും നിർമ്മാണ സാധ്യതകൾ 10 ശതമാനം വർദ്ധിക്കുമ്പോൾ, അതിവേഗം വളരുന്ന ബർണബി (Burnaby) നഗരത്തിൽ ഭവന നിർമ്മാണത്തിൽ 13.8 ശതമാനത്തിന്റെ വരെ വൻ കുതിച്ചുചാട്ടമുണ്ടാക്കാൻ ഇതിലൂടെ സാധിക്കും.

പുതിയ വീടുകളുടെ വിലയുടെ വലിയൊരു പങ്കും (ഏകദേശം 36 ശതമാനം) വിവിധ തലങ്ങളിലെ നികുതികളാണ്. ഇതിൽ 70 ശതമാനവും വികസന ചാർജുകൾ, ലാൻഡ് ട്രാൻസ്ഫർ ടാക്സ്, എച്ച്.എസ്.ടി (HST) എന്നിവയാണ്. വരുമാന നികുതിയോ വില്പന നികുതിയോ ഈടാക്കാൻ അധികാരമില്ലാത്തതിനാൽ മുൻസിപ്പാലിറ്റികൾ പ്രധാനമായും ഇത്തരം വികസന ചാർജുകളെയും വസ്തു നികുതിയെയുമാണ് ആശ്രയിക്കുന്നത്.

കാനഡയിൽ ജനസംഖ്യാ വർദ്ധനവും കുടിയേറ്റവും മൂലം വീടുകളുടെ ആവശ്യം വൻതോതിൽ വർദ്ധിച്ചെങ്കിലും അതിനനുസരിച്ച് നിർമ്മാണം നടക്കുന്നില്ല. കഴിഞ്ഞ തിരഞ്ഞെടുപ്പ് പ്രചാരണ വേളയിൽ പ്രതിവർഷം 5 ലക്ഷം വീടുകൾ വീതം അടുത്ത 10 വർഷം കൊണ്ട് നിർമ്മിക്കുമെന്ന് ലിബറൽ പാർട്ടി വാഗ്ദാനം ചെയ്തിരുന്നു. ഇതിന്റെ ഭാഗമായി പ്രധാനമന്ത്രി മാർക്ക് കാർണിയുടെ നേതൃത്വത്തിൽ താഴെപ്പറയുന്ന പദ്ധതികൾ പ്രഖ്യാപിച്ചിട്ടുണ്ട്:

ബിൽഡ് കാനഡ ഹോംസ്: പ്രീഫാബ്, കുറഞ്ഞ ചെലവിലുള്ള വീടുകൾ എന്നിവയ്ക്കായി 25 ബില്യൺ ഡോളറിന്റെ പൊതു ധനസഹായവും 10 ബില്യൺ ഡോളറിന്റെ കുറഞ്ഞ പലിശ നിരക്കിലുള്ള മൂലധനവും നൽകാൻ പുതിയ ക്രൗൺ കോർപ്പറേഷൻ രൂപീകരിച്ചു.

ബിൽഡ് കമ്മ്യൂണിറ്റീസ് സ്ട്രോങ് ഫണ്ട്: അടിസ്ഥാന സൗകര്യ വികസനത്തിനായി 10 വർഷത്തേക്ക് 51 ബില്യൺ ഡോളറിന്റെ പദ്ധതി.

ജിഎസ്ടി ഒഴിവാക്കൽ: ആദ്യമായി വീട് വാങ്ങുന്നവർക്ക് 1 മില്യൺ ഡോളറിൽ താഴെ വിലയുള്ള പുതിയ വീടുകളുടെ ജിഎസ്ടി (GST) ഒഴിവാക്കി.

ഇത്രയൊക്കെ പദ്ധതികൾ ഉണ്ടായിട്ടും ഭവന നിർമ്മാണം വിചാരിച്ച വേഗത കൈവരിച്ചിട്ടില്ല. ഒരു പ്ലോട്ട് കണ്ടെത്തി നിർമ്മാണം പൂർത്തിയാക്കി ആളുകൾക്ക് താമസിക്കാൻ പാകത്തിലാകാൻ ചിലപ്പോൾ വർഷങ്ങളെടുക്കുമെന്നാണ് വിദഗ്ദ്ധർ ചൂണ്ടിക്കാണിക്കുന്നത്. വികസന ചാർജുകൾ കുറയ്ക്കുന്നത് വഴി താല്ക്കാലിക വരുമാന നഷ്ടമുണ്ടാകുമെങ്കിലും, കൂടുതൽ വീടുകൾ നിർമ്മിക്കപ്പെടുന്നതോടെ വസ്തു നികുതിയിലൂടെ മുൻസിപ്പാലിറ്റികൾക്ക് ദീർഘകാലാടിസ്ഥാനത്തിൽ കൂടുതൽ വരുമാനം ലഭിക്കുമെന്നാണ് സിഎംഎച്ച്സി ചീഫ് ഇക്കണോമിസ്റ്റ് മാത്യു ലാബെർജ് വ്യക്തമാക്കുന്നത്.