കാനഡ പോസ്റ്റ് വീട്ടുപടിക്കലുള്ള തപാൽ വിതരണം നിർത്തലാക്കുന്നു; 1.36 ലക്ഷം വിലാസങ്ങളിൽ മാറ്റം വരുന്നു

APRIL 17, 2026, 9:41 AM

ഒട്ടാവ: കാനഡയിലെ വീട്ടുപടിക്കലുള്ള തപാൽ വിതരണ സംവിധാനം (Door-to-door delivery) ഘട്ടംഘട്ടമായി നിർത്തലാക്കാൻ കാനഡ പോസ്റ്റ്. ഇതിന്റെ ആദ്യപടിയായി ഈ വർഷം അവസാനത്തോടെ 13 കമ്മ്യൂണിറ്റികളിലായി 1,36,000 വിലാസങ്ങളിലേക്കുള്ള വിതരണം നിർത്തും. പകരം പൊതുവായ 'കമ്മ്യൂണിറ്റി മെയിൽ ബോക്സുകൾ' വഴി തപാൽ ലഭ്യമാക്കുമെന്ന് അധികൃതർ അറിയിച്ചു.

അടുത്ത അഞ്ച് വർഷത്തിനുള്ളിൽ രാജ്യത്തെ എല്ലാ വീടുകളിലുമുള്ള നേരിട്ടുള്ള വിതരണം പൂർണ്ണമായും അവസാനിപ്പിക്കാനാണ് ഈ പൊതുമേഖലാ സ്ഥാപനം ലക്ഷ്യമിടുന്നത്. കടുത്ത സാമ്പത്തിക പ്രതിസന്ധിയും കടബാധ്യതയും നേരിടുന്ന പശ്ചാത്തലത്തിലാണ് ഈ പരിഷ്കാരം.

ഒട്ടാവ, എറ്റോബികോക്ക് (ഒന്റാറിയോ), വാൻകൂവർ പരിസര പ്രദേശങ്ങൾ എന്നിവിടങ്ങളിലാണ് പ്രധാനമായും മാറ്റം ബാധിക്കുക.ബി.സിയിലെ ഫ്രേസർ വാലി, മോങ്‌ടൺ (ന്യൂ ബ്രൺസ്‌വിക്ക്), വിന്നിപെഗ്, മോൺട്രിയൽ സൗത്ത് ഷോർ, ക്യൂബെക്കിന്റെ വടക്കുകിഴക്കൻ തീരം എന്നിവിടങ്ങളിലെ ചില പോസ്റ്റൽ കോഡുകളിലും മാറ്റമുണ്ടാകും. ഈ വർഷം അവസാനമോ 2027-ന്റെ തുടക്കത്തിലോ പുതിയ സംവിധാനം നിലവിൽ വരും.

നേരിട്ടുള്ള വിതരണത്തേക്കാൾ കമ്മ്യൂണിറ്റി മെയിൽ ബോക്സുകൾ വഴിയുള്ള വിതരണത്തിന് പകുതി ചെലവ് മാത്രമേ വരുന്നുള്ളൂ എന്ന് കാനഡ പോസ്റ്റ് വക്താവ് ജോൺ ഹാമിൽട്ടൺ വ്യക്തമാക്കി. നിലവിൽ കാനഡയിലെ 75 ശതമാനം വിലാസങ്ങളിലും കേന്ദ്രീകൃത വിതരണ സംവിധാനമാണുള്ളത്. ശേഷിക്കുന്ന 40 ലക്ഷം വിലാസങ്ങൾ കൂടി ഈ രീതിയിലേക്ക് മാറുന്നതോടെ പ്രതിവർഷം 400 മില്യൺ ഡോളർ ലാഭിക്കാൻ സാധിക്കുമെന്ന് അദ്ദേഹം പറഞ്ഞു.

കടുത്ത സാമ്പത്തിക പ്രതിസന്ധി

കഴിഞ്ഞ ഏഴ് വർഷമായി കാനഡ പോസ്റ്റ് വൻ നഷ്ടത്തിലാണ് ഓടുന്നത്. 2018 മുതൽ ഇതുവരെ ഏകദേശം 3.8 ബില്യൺ ഡോളറിന്റെ നഷ്ടമാണ് രേഖപ്പെടുത്തിയത്. സ്വയംപര്യാപ്തമാകേണ്ട സ്ഥാപനമാണെങ്കിലും, നിലനിൽപ്പിനായി കഴിഞ്ഞ രണ്ട് വർഷത്തിനിടെ 2 ബില്യൺ ഡോളർ ഫെഡറൽ വായ്പയെ ആശ്രയിക്കേണ്ടി വന്നിട്ടുണ്ട്. നികുതിപ്പണത്തെ ആശ്രയിക്കാതെ സ്വന്തം നിലയ്ക്ക് വരുമാനം കണ്ടെത്താനാണ് ഈ നീക്കമെന്ന് അധികൃതർ കൂട്ടിച്ചേർത്തു.

യൂണിയന്റെ എതിർപ്പ്

കാനഡ പോസ്റ്റിന്റെ ഈ തീരുമാനത്തെ തപാൽ ജീവനക്കാരുടെ സംഘടനയായ കനേഡിയൻ യൂണിയൻ ഓഫ് പോസ്റ്റൽ വർക്കേഴ്സ് (CUPW) ശക്തമായി എതിർത്തു. ഈ നീക്കം ജനങ്ങളെയും ജീവനക്കാരെയും ഒരുപോലെ ദോഷകരമായി ബാധിക്കുമെന്ന് യൂണിയൻ ആരോപിച്ചു.

പുതിയ കരാറുമായി ബന്ധപ്പെട്ട് അടുത്ത ആഴ്ച വോട്ടെടുപ്പ് നടക്കാനിരിക്കെയാണ് ഈ നിർണ്ണായക പ്രഖ്യാപനം വന്നിരിക്കുന്നത്. മുൻപ് ശമ്പള വർദ്ധനവും ജോലി സാഹചര്യങ്ങളും മുൻനിർത്തി തപാൽ ജീവനക്കാർ രാജ്യവ്യാപകമായി പണിമുടക്ക് നടത്തിയിരുന്നു.