23 ബില്യണ്‍ വരുന്ന യുഎസ് ഇറക്കുമതിയുടെ താരിഫ് കുറയ്ക്കാന്‍ തയാറെന്ന് ഇന്ത്യ

MARCH 25, 2025, 7:29 AM

ന്യൂഡെല്‍ഹി: വ്യാപാര കരാറിന്റെ ഭാഗമായി, 23 ബില്യണ്‍ ഡോളര്‍ വരുന്ന യുഎസ് ഇറക്കുമതിയുടെ പകുതിയില്‍ അധികത്തിന്റെയും താരിഫ് കുറയ്ക്കാന്‍ കേന്ദ്ര സര്‍ക്കാര്‍ തയ്യാറാണെന്ന് റിപ്പോര്‍ട്ട്. കയറ്റുമതിയെ ദോഷകരമായി ബാധിക്കുന്ന പരസ്പര താരിഫുകള്‍ തടയുക എന്ന ലക്ഷ്യത്തോടെ, വര്‍ഷങ്ങളായി നടപ്പിലാക്കുന്ന ഏറ്റവും വലിയ താരിഫ് ഇളവുകളില്‍ ഒന്നായിരിക്കും ഇത്.

ഏപ്രില്‍ 2 മുതല്‍ പ്രാബല്യത്തില്‍ വരാന്‍ പോകുന്ന യുഎസ് പ്രസിഡന്റ് ഡൊണാള്‍ഡ് ട്രംപിന്റെ ആഗോള പരസ്പര താരിഫുകളുടെ ആഘാതം കുറയ്ക്കാന്‍ കേന്ദ്ര സര്‍ക്കാര്‍ ശ്രമിക്കുകയാണ്. ഈ പുതിയ താരിഫുകള്‍ വിപണികളെ തടസ്സപ്പെടുത്തുകയും യുഎസിന്റെ ചില പാശ്ചാത്യ സഖ്യകക്ഷികള്‍ ഉള്‍പ്പെടെ നിരവധി രാജ്യങ്ങളില്‍ ആശങ്കകള്‍ സൃഷ്ടിക്കുകയും ചെയ്തിട്ടുണ്ട്. ഇതിന്റെ ആഘാതം പരമാവധി കുറയ്ക്കാനാണ് മോദി സര്‍ക്കാരിന്റെ ശ്രമം.

ഇന്ത്യയുടെ ഒരു ആഭ്യന്തര വിശകലനം അനുസരിച്ച്, പുതിയ യുഎസ് താരിഫുകള്‍ യുഎസിലേക്കുള്ള ഇന്ത്യന്‍ കയറ്റുമതിയുടെ 87% നെ ബാധിക്കും. അവ ഏകദേശം 66 ബില്യണ്‍ ഡോളര്‍ മതിക്കുന്നതാണ്.

ഈ ആഘാതം ഒഴിവാക്കാന്‍, നിലവില്‍ 5% നും 30% നും ഇടയില്‍ നികുതി ചുമത്തുന്ന യുഎസ് ഇറക്കുമതിയുടെ 55% ത്തിന്റെയും താരിഫ് കുറയ്ക്കാന്‍ ഇന്ത്യ തയ്യാറാണെന്ന് കേന്ദ്ര സര്‍ക്കാരിനോടടുത്ത വൃത്തങ്ങള്‍ പറയുന്നു. ചില താരിഫുകള്‍ ഗണ്യമായി കുറയ്ക്കാന്‍ കഴിയും, മറ്റുള്ളവ പൂര്‍ണ്ണമായും നീക്കം ചെയ്‌തേക്കാം.

ഈ നിര്‍ദ്ദേശം ഇപ്പോഴും ചര്‍ച്ചയിലാണ്, കേന്ദ്ര സര്‍ക്കാര്‍ ഇപ്പോഴും അന്തിമ തീരുമാനം എടുത്തിട്ടില്ല. വിശാലമായി താരിഫ് കുറയ്ക്കുന്നതിന് പകരം നിര്‍ദ്ദിഷ്ട മേഖലകള്‍ക്കുള്ള താരിഫ് ക്രമീകരിക്കുക, ഒന്നിലധികം വ്യവസായങ്ങളിലുടനീളം താരിഫ് കുറയ്ക്കുന്നതിന് പകരം തിരഞ്ഞെടുത്ത ഉല്‍പ്പന്നങ്ങള്‍ക്ക് കുറവു വരുത്തുന്നത് ചര്‍ച്ച ചെയ്യുക എന്നിവയാണ് മറ്റ് ഓപ്ഷനുകള്‍.

ദക്ഷിണ, മധ്യേഷ്യകള്‍ക്കായുള്ള അസിസ്റ്റന്റ് യുഎസ് ട്രേഡ് പ്രതിനിധി ബ്രെന്‍ഡന്‍ ലിഞ്ചിന്റെ നേതൃത്വത്തിലുള്ള ഒരു യുഎസ് പ്രതിനിധി സംഘം ചൊവ്വാഴ്ച മുതല്‍ വ്യാപാര ചര്‍ച്ചകള്‍ക്കായി ഇന്ത്യ സന്ദര്‍ശിക്കും. യുഎസ് പരസ്പര താരിഫുകള്‍ പ്രാബല്യത്തില്‍ വരുന്നതിനുമുമ്പ് ഒരു കരാര്‍ അന്തിമമാക്കാനാണ് മോദി സര്‍ക്കാരിന്റെ ശ്രമം.