ആദായനികുതി റിട്ടേണുകൾ സമർപ്പിച്ചോ? അവസാന തീയതി നീട്ടി കേന്ദ്ര സർക്കാർ

SEPTEMBER 15, 2025, 10:22 PM

ഡൽഹി: ആദായനികുതി റിട്ടേണുകൾ സമർപ്പിക്കുന്നതിനുള്ള അവസാന തീയതി ചൊവ്വാഴ്ച വരെ (സെപ്റ്റംബർ 16) നീട്ടിയതായി കേന്ദ്ര സർക്കാർ പ്രഖ്യാപിച്ചു. ആദായനികുതി വകുപ്പിൻ്റെ പോർട്ടലിൽ തകരാറുകൾ ഉണ്ടെന്ന് ആളുകൾ പരാതിപ്പെട്ടതിനെ തുടർന്നാണ് നടപടി.

"2025-26 വർഷത്തേക്കുള്ള ആദായനികുതി റിട്ടേണുകൾ (ITRs) സമർപ്പിക്കുന്നതിനുള്ള അവസാന തീയതി 2025 ജൂലൈ 31ന് ആയിരുന്നു. എന്നാൽ 2025 സെപ്റ്റംബർ 15 വരെ ഇത് പിന്നീട് നീട്ടിയിരുന്നു. 2025-26 വർഷത്തേക്കുള്ള ഈ ആദായനികുതി റിട്ടേണുകൾ സമർപ്പിക്കുന്നതിനുള്ള അവസാന തീയതി 2025 സെപ്റ്റംബർ 15 മുതൽ 2025 സെപ്റ്റംബർ 16 വരെ നീട്ടാൻ സെൻട്രൽ ബോർഡ് ഓഫ് ഡയറക്ട് ടാക്സസ് തീരുമാനിച്ചു," എന്ന് ആദായനികുതി വകുപ്പ് എക്സിൽ പോസ്റ്റ് ചെയ്തു.

യൂട്ടിലിറ്റികളിൽ മാറ്റങ്ങൾ വരുത്തുന്നതിനായി ഇ-ഫയലിംഗ് പോർട്ടൽ ചൊവ്വാഴ്ച അർധരാത്രി മുതൽ പുലർച്ചെ 2.30 വരെ മെയിൻ്റനൻസ് മോഡിൽ തുടരുമെന്നും മന്ത്രാലയം അറിയിച്ചു. തിങ്കളാഴ്ച വരെ 7.3 കോടിയിലധികം ആദായനികുതി റിട്ടേണുകൾ സമർപ്പിച്ചതായും മന്ത്രാലയം അറിയിച്ചു.