എല്ലാവരേയും വിഢികളാക്കുന്ന ആ ദിവസമാണ് ഗൂഗിള്‍ തങ്ങളുടെ ജിമെയില്‍ സംവിധാനം ആദ്യമായി അവതരിപ്പിച്ചത്. കൃത്യമായി പറഞ്ഞാല്‍ 20 വര്‍ഷങ്ങള്‍ക്ക് മുമ്പ് ഏപ്രില്‍ ഒന്നാം തീയതി. ഇത് ഗൂഗിളിന്റെ ഒരു ഏപ്രില്‍ ഫൂള്‍ തമാശയായാണ് അന്ന് പലരും കരുതിയത്. കാരണം അതിന് മുന്‍ വര്‍ഷങ്ങളിലെല്ലാം ഏപ്രില്‍ ഫൂള്‍ ദിനത്തില്‍ ഗൂഗിളിന്റെ സഹസ്ഥാപകരായ ലാറി പേജും സെര്‍ജി ബ്രിന്നും ചേര്‍ന്ന് പലവിധ തമാശകള്‍ ഒപ്പിച്ചട്ടുണ്ട്.
ചന്ദ്രനിലെ കോപ്പര്‍ നിക്കസ് ഗവേണ കേന്ദ്രത്തില്‍ പുതിയ തൊഴിലവസരങ്ങള്‍ എന്നതായിരുന്നു ഒരു വര്‍ഷം ഏപ്രില്‍ ഒന്നിന് ഗൂഗിള്‍ നടത്തിയ പ്രഖ്യാപനം. തങ്ങളുടെ സെര്‍ച്ച് എഞ്ചിനില്‍ 'സ്‌ക്രാച്ച് ആന്‍ഡ് സ്നിഫ്' പദ്ധതി നടപ്പാക്കുമെന്നാണ് മറ്റൊരു വര്‍ഷം ഏപ്രില്‍ ഒന്നിന് കമ്പനി നടത്തിയ പ്രഖ്യാപനം. അതിനാല്‍ തന്നെ ഏപ്രിന്‍ ഒന്നിന് ലോക വിഡ്ഢി ദിനത്തില്‍ ജിമെയില്‍ അവതരിപ്പിച്ചപ്പോള്‍ അത് ഗൂഗിളിന്റെ മറ്റൊരു തമാശയായിരിക്കുമെന്ന് തന്നെയാണ് ആളുകള്‍ കരുതിയത്.
ഇന്റര്‍നെറ്റ് തിരച്ചില്‍, വെബ് അധിഷ്ഠിത സേവനം, വെബ്‌സൈറ്റ് പരസ്യം എന്നീ രംഗങ്ങളില്‍ പ്രവര്‍ത്തിക്കുന്ന അമേരിക്കന്‍ കമ്പനിയാണ് ഗൂഗിള്‍. ലോകത്തിലെ ഏറ്റവും വിശാലമായ ഇന്റര്‍നെറ്റ് തിരച്ചില്‍ സംവിധാനമാണ് ഗൂഗിള്‍. അറിവുകള്‍ ശേഖരിച്ച് സാര്‍വ്വ ദേശീയമായി ലഭ്യമാക്കുക എന്നതാണ് ഗൂഗിളിന്റെ പ്രഖ്യാപിത ലക്ഷ്യം. എന്നാല്‍ ഗൂഗിളിന്റെ ചരിത്രത്തിലെ തന്നെ വിപ്ലവമാണ് ജിമെയില്‍ സൃഷ്ടിച്ചത്.
തുടക്കത്തില്‍ ജിമെയിലിനെ കുറിച്ച് ആളുകള്‍ക്കിടയില്‍ സംശയങ്ങള്‍ ഉണ്ടായിരുന്നുവെങ്കിലും വൈകാതെ തന്നെ കോടിക്കണക്കിന് ഉപയോക്താക്കളെയാണ് ജിമെയില്‍ നേടിയെടുത്തത്. കൂടാതെ വിപുലമായ സ്റ്റോറേജ് സംവിധാനവും ഇതിനൊപ്പം നല്‍കപ്പെട്ടിരുന്നു. ഓരോ അക്കൗണ്ടിനും ഒരു ജിഗാബൈറ്റ് സ്റ്റോറേജ് എന്ന അഭിമാനിക്കാനാവുന്ന സൗജന്യ സേവനമാണ് ജിമെയിലിലൂടെ ഗൂഗിള്‍ ഉപയോക്താക്കള്‍ക്ക് നല്‍കുന്നത്. ഒരു ടെറാബൈറ്റ് സ്റ്റോറേജ് ശേഷിയുള്ള ഐഫോണുകള്‍ ലഭ്യമായ കാലത്ത് ഇത് തമാശയായി തോന്നുമെങ്കിലും 13,500 ഇമെയിലുകള്‍ സൂക്ഷിച്ചുവെക്കുന്നതിന് ഇത് സഹായിക്കുമായിരുന്നു.
അന്നത്തെ പ്രധാന സേവനദാതാക്കളായ യാഹൂവിന്റെയും മൈക്രോസോഫ്റ്റിന്റെയും വെബ്മെയില്‍ 30 മുതല്‍ 60 മെയിലുകള്‍ മാത്രം സൂക്ഷിച്ചുവയ്ക്കാന്‍ കഴിയുമ്പോഴായിരുന്നു ഗൂഗിളിന്റെ ഈ നേട്ടമെന്നും ഓര്‍ക്കണം. സെര്‍ച്ച് സംവിധാനം, വേഗത, സ്റ്റോറേജ് തുടങ്ങിയ നിര്‍ണായകമായ മൂന്ന് ഘടകങ്ങളും ചേര്‍ന്ന ജിമെയിലിനെ എല്ലാവരും ഇരുകൈയ്യും നീട്ടി സ്വീകരിച്ചു.
2004 ഏപ്രില്‍ ഒന്നിന് ഉച്ച കഴിഞ്ഞാണ് ജിമെയിലിനെക്കുറിച്ചുള്ള വാര്‍ത്ത അന്താരാഷ്ട്ര വാര്‍ത്താ ഏജന്‍സിയായ അസോസിയേറ്റ് പ്രസ് പ്രസിദ്ധീകരിച്ചത്. നിലവില്‍ ജിമെയിലിന് 1.8 ബില്ല്യണ്‍ സജീവ അക്കൗണ്ടുകള്‍ ഉണ്ട്. ഇപ്പോള്‍ 15 ജിഗാബൈറ്റ് സൗജന്യ സ്റ്റോറേജും ഗൂഗിള്‍ ഫോട്ടോസും ഗൂഗിള്‍ ഡ്രൈവും നല്‍കുന്നു. ഗൂഗിളിന്റെ തുടക്കത്തില്‍ നല്‍കിയ 1 ജിബി സ്റ്റോറേജുമായി താരതമ്യപ്പെടുത്തുമ്പോള്‍ ഇത് 15 മടങ്ങ് അധികമാണെങ്കിലും നിലവിലെ ഉപയോക്താക്കള്‍ക്ക് ഇപ്പോള്‍ അത് മതിയാകാതെ വരുന്ന സാഹചര്യമുണ്ട്. ഇതും ഗൂഗിള്‍ പ്രതീക്ഷിച്ചിരുന്നതാണ്.
ഇപ്പോളും ആധിപത്യം പുലര്‍ത്തുന്ന സെര്‍ച്ച് എഞ്ചിന്‍ എന്നതിനുമപ്പുറം ഗൂഗിളിന്റെ ഇന്റര്‍നെറ്റ് സാമ്രാജ്യത്തിന്റെ വിപുലീകരണത്തില്‍ ആദ്യത്തെ മൂലക്കല്ലായി ജിമെയില്‍ സ്ഥാനം പിടിച്ചു. ജിമെയിന് ശേഷം ഗൂഗിള്‍ മാപ്സും ഗൂഗിള്‍ ഡോക്സും ഗൂഗിള്‍ അവതരിപ്പിച്ചു. ഇതിന് പിന്നാലെ വീഡിയോ സൈറ്റായ യൂട്യൂബ് ഗൂഗിള്‍ ഏറ്റെടുത്തത്. വൈകാതെ ക്രോം ബ്രൗസറും ആന്‍ഡ്രോയിഡ് ഓപ്പറേറ്റിങ് സംവിധാനവും ഗൂഗിള്‍ പുറത്തിറക്കി.
ഇന്നും ലോകത്തിലെ ഭൂരിഭാഗം സ്മാര്‍ട്ട് ഫോണുകളിലും ഇവയുടെ ആധിപത്യമാണ് ഉള്ളത്. ഉപയോക്താക്കളുടെ താത്പര്യത്തിന് അനുസരിച്ചുള്ള വിഭവങ്ങള്‍ അവര്‍ പങ്കുവെച്ചു. വൈകാതെ പരസ്യങ്ങളും ഗൂഗിളില്‍ അവതരിപ്പിക്കപ്പെട്ടു.
അപ്രതീക്ഷിതമായ ഒരു അക്ഷരപ്പിശകില്‍ നിന്നും പിറവിയെടുത്തതാണ് ഗൂഗിള്‍ എന്ന പദം. ഒന്നിനു ശേഷം നൂറു പൂജ്യങ്ങള്‍ വരുന്ന സംഖ്യയെ സൂചിപ്പിക്കാന്‍ ഉപയോഗിക്കുന്ന ഗൂഗള്‍(googol) എന്ന പദം സെര്‍ച്ച് എന്‍ജിന്റെ പേരാക്കാനായിരുന്നു സ്ഥാപകരുടെ ലക്ഷ്യം. അമേരിക്കന്‍ ഗണിത ശാസ്ത്രജ്ഞനായ എഡ്വേഡ് കാസ്‌നറുടെ അനന്തരവന്‍ ഒന്‍പത് വയസുകാരന്‍ മില്‍ട്ടണ്‍ സൈറോറ്റയാണ് 1938 ല്‍ ആദ്യമായി ഗൂഗള്‍ എന്ന പദം ഉപയോഗിച്ചത്.
ഗണിത ശാസ്ത്രജ്ഞരുടെ ഇടയില്‍ പ്രചരിച്ചിരുന്ന ഈ പദം തന്നെ തങ്ങളുടെ സെര്‍ച്ച് എന്‍ജിന് പേരായി നല്‍കാം എന്നായിരുന്നു ഗൂഗിളിന്റെ പിറവിക്ക് പിന്നില്‍ പ്രവര്‍ത്തിച്ചവരുടെ ചിന്ത. എണ്ണിയാലൊടുങ്ങാത്ത വിവരങ്ങള്‍ ഈ സെര്‍ച്ച് എന്‍ജിനില്‍ ലഭ്യമാകും എന്ന സന്ദേശമായിരുന്നു വിവക്ഷ. എന്നാല്‍ അവര്‍ എഴുതിയത് അക്ഷരപ്പിശകോടെയായെന്ന് മാത്രം. അങ്ങനെ ഗൂഗളിന് പകരം ഗൂഗിള്‍ ആയി.
ഏതായാലും തങ്ങള്‍ക്കു പറ്റിയ അക്ഷരപ്പിശക് മറ്റാരെയും വഴിതെറ്റിക്കരുത് എന്ന ചിന്ത ഗൂഗിള്‍ ഉടമകള്‍ക്ക് ഉണ്ടെന്നുള്ളതാണ് രസകരമായ വസ്തുത. ഗൂഗിള്‍ എന്ന് ടൈപ് ചെയ്യുമ്പോള്‍ വന്നുപോയേക്കാവുന്ന അക്ഷര പിശകുകളുടെ ഫലങ്ങളെല്ലാം ഡൊമെയ്ന്‍ പദങ്ങളായി രജിസ്റ്റര്‍ ചെയ്തിട്ടുണ്ട്. ഉദാഹരണത്തിന് gogle.com, googel.com എന്നിങ്ങനെ തെറ്റായി ടൈപ് ചെയ്താലും ചെന്നെത്തുന്നത് ഗൂഗിളില്‍ തന്നെയായിരിക്കും. ഗൂഗിളിനു സദൃശമായ അക്ഷരത്തെറ്റുകളെല്ലാം ഇപ്രകാരം ശരിയായ ഡൊമെയിന്‍ നാമത്തിലേക്ക് വഴിതിരിച്ചു വിട്ടിരിക്കുകയാണ്.
ഫേസ്ബുക്കിൽ വാർത്തകൾ അറിയാൻ പേജ് ലൈക്ക് ചെയ്യുക
Facebook ലിങ്ക് 👇
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്തിട്ട് ലൈക്ക് / Follow ബട്ടൺ ക്ലിക്ക് ചെയ്യുക.
ഒപ്പം vachakam.com ന്റെ YouTube ചാനൽ സബ്സ്ക്രൈബ് ചെയ്യാനും മറക്കല്ലേ...
ചാനൽ ലിങ്ക്: https://www.youtube.com/channel/UCXRVmXRlpFL8TzgXtb8IIyw?sub_confirmation=1
.jpg)
-20250921013348.jpg)
-20250930041839.jpg)
-20250930041339.jpeg)
-20201004104033.jpg)
-20250930022950.jpeg)
-20250930015454.jpeg)
