ടെഹ്റാനെയും അന്താരാഷ്ട്ര സമൂഹത്തെയും ഒരേസമയം ഞെട്ടിച്ചുകൊണ്ട്, ഇറാന്റെ മുന്‍ കടുത്ത യാഥാസ്ഥിതിക പ്രസിഡന്റ് മഹ്മൂദ് അഹ്മദി നിജാദിനെ ഇസ്രയേല്‍ ചാരസംഘടനയായ മൊസാദ് വിലയ്‌ക്കെടുത്തെന്ന വെളിപ്പെടുത്തലുമായി ദ ന്യൂയോര്‍ക്ക് ടൈംസും ഇസ്രയേലി മാധ്യമമായ ഹാരെറ്റ്‌സും രംഗത്തെത്തിയിരുന്നു. ഇറാന്റെ ഇസ്ലാമിക ഭരണകൂടത്തെ അട്ടിമറിച്ച് അവിടെ ഒരു പുതിയ സര്‍ക്കാരിനെ വാഴിക്കാന്‍ മൊസാദ് തയ്യാറാക്കിയ ഓപ്പറേഷന്‍ പുസ് ഇന്‍ ബൂട്ട്‌സ് എന്ന അതിരഹസ്യ പദ്ധതിയുടെ വിവരങ്ങളാണ് ഇപ്പോള്‍ പുറത്തുവന്നിരിക്കുന്നത്.

ഇറാന്‍ പരമോന്നത നേതാവ് ആയത്തുല്ല അലി ഖമേനിയുടെ മരണത്തിന് പിന്നാലെ രാജ്യത്തുണ്ടായ വലിയ ഭരണഘടനാ പ്രതിസന്ധിയും സുരക്ഷാ വീഴ്ചയും മുതലെടുത്താണ് ഇസ്രയേല്‍ ഈ സാഹസിക നീക്കത്തിന് തുനിഞ്ഞത്.

ഒരു ശത്രുവിനെ ചാരനാക്കി മാറ്റിയ ബുഡാപെസ്റ്റ് കണക്ഷന്‍

പ്രസിഡന്റായിരുന്ന കാലത്ത് ഇസ്രയേലിന്റെ നിലനില്‍പ്പിനെപ്പോലും ചോദ്യം ചെയ്യുകയും യഹൂദ കൂട്ടക്കൊലയെ തള്ളിക്കളയുകയും ചെയ്ത അഹ്മദി നിജാദ് എങ്ങനെ മൊസാദിന്റെ വലയിലായി എന്നത് ലോകത്തെ അത്ഭുതപ്പെടുത്തുന്ന കാര്യമാണ്. എന്നാല്‍, 2022 മുതല്‍ ഇറാന്റെ സാമ്പത്തിക തകര്‍ച്ചയിലും ഉപരോധങ്ങളിലും നിരാശനായ നിജാദിന്റെ മാറിയ രാഷ്ട്രീയ നിലപാടുകള്‍ മൊസാദ് നിരീക്ഷിച്ചുവരികയായിരുന്നു. ഇറാന്റെ ആണവപദ്ധതി രാജ്യത്തിന് ബാധ്യതയാണെന്ന നിജാദിന്റെ വിലയിരുത്തലാണ് അദ്ദേഹത്തെ സ്വാധീനിക്കാന്‍ ഇസ്രയേലിന് വഴിതുറന്നത്. തുടര്‍ന്ന് 2024 ല്‍ ഹംഗറിയിലെ ബുഡാപെസ്റ്റിലുള്ള ലുഡോവിക യൂണിവേഴ്‌സിറ്റിയില്‍ നടന്ന ഒരു പരിസ്ഥിതി കാലാവസ്ഥാ സമ്മേളനമാണ് ഈ അവിശുദ്ധ കൂട്ടുകെട്ടിന് വേദിയായത്.

ഹംഗേറിയന്‍ സര്‍ക്കാരിന്റെ ഉന്നതരുടെ സ്വാധീനത്തില്‍ സര്‍വകലാശാലാ റെക്ടര്‍ ഗെര്‍ഗെലി ഡെലി നിജാദിനെ ഈ ചടങ്ങിലേക്ക് ക്ഷണിക്കുകയായിരുന്നു. കേവലം ഒരു അക്കാദമിക് സമ്മേളനം എന്ന വ്യാജേന നടന്ന ഈ പരിപാടിയുടെ അണിയറയില്‍ മൊസാദ് തലവന്‍ ഡേവിഡ് ബാര്‍ണിയ നേരിട്ടെത്തി നിജാദുമായി അതീവ രഹസ്യ ചര്‍ച്ചകള്‍ നടത്തി. പിന്നീട് നിജാദിന്റെ വിദേശ യാത്രകള്‍ക്കും മറ്റ് ആഡംബരങ്ങള്‍ക്കുമായി ഇസ്രയേല്‍ വന്‍തോതില്‍ സാമ്പത്തിക സഹായം നല്‍കിയതായും രേഖകള്‍ വ്യക്തമാക്കുന്നു.

എന്തായിരുന്നു ഓപ്പറേഷന്‍ പുസ് ഇന്‍ ബൂട്ട്‌സ്?

മുന്‍ പരമോന്നത നേതാവ് ആയത്തുല്ല അലി ഖമനയി ആക്രമണത്തില്‍ കൊല്ലപ്പെട്ടതിനെ തുടര്‍ന്ന് ഇറാന്റെ ഭരണസംവിധാനം വലിയ അനിശ്ചിതത്വത്തിലായിരുന്നു. ഖമനയിയുടെ മരണശേഷം മകനായ മുജ്തബ ഖമനയിയെ പുതിയ പരമോന്നത നേതാവായി പ്രഖ്യാപിച്ചെങ്കിലും, 'ഷാഡോ പ്രിന്‍സ്' എന്നറിയപ്പെടുന്ന അദ്ദേഹം പൊതുവേദികളില്‍ പ്രത്യക്ഷപ്പെടാത്തത് ആശയക്കുഴപ്പം വര്‍ദ്ധിപ്പിച്ചു. ഈ രാഷ്ട്രീയ ശൂന്യത മുതലെടുത്ത് ഇറാന്റെ ഇസ്ലാമിക ഭരണകൂടത്തെ അട്ടിമറിക്കാനും, പകരം ജനങ്ങള്‍ക്കിടയില്‍ സ്വാധീനമുള്ള അഹ്മദി നിജാദിനെ പുതിയ ഭരണാധികാരിയാക്കാനും ഇസ്രയേല്‍ ലക്ഷ്യമിട്ടിരുന്നു. ഇതാണ് 'ഓപ്പറേഷന്‍ പുസ് ഇന്‍ ബൂട്ട്‌സ്' എന്ന രഹസ്യ പദ്ധതി.

ഇറാന്റെ വടക്കുപടിഞ്ഞാറന്‍ അതിര്‍ത്തിയിലുള്ള കുര്‍ദിഷ് വിമത സേനയ്ക്ക് അമേരിക്കയുടെയും ഇസ്രയേലിന്റെയും ആയുധങ്ങളും പരിശീലനവും നല്‍കി ഇറാനിലേക്ക് ഇരച്ചുകയറ്റുക എന്നതായിരുന്നു ഈ തന്ത്രത്തിന്റെ പ്രധാന കാതല്‍. വന്‍തോതിലുള്ള കുര്‍ദിഷ് ആക്രമണത്തോടെ രാജ്യത്ത് ഭരണവിരുദ്ധ പ്രക്ഷോഭം പടരുമെന്നും, ലക്ഷക്കണക്കിന് ജനങ്ങള്‍ തെരുവിലിറങ്ങുമ്പോള്‍ ഭരണകൂടം തകരുമെന്നും മൊസാദ് കണക്കുകൂട്ടി.

ആ സമയത്ത് ഇറാന്റെ ജനപ്രിയ മുഖമായി അഹ്മദി നിജാദിനെ ജനങ്ങള്‍ക്ക് മുന്നിലേക്ക് അവതരിപ്പിച്ച് അധികാരം ഏല്‍പ്പിക്കാനായിരുന്നു പദ്ധതി. ഫെബ്രുവരി 28-ന് ഇറാനില്‍ അമേരിക്കയും ഇസ്രയേലും സംയുക്തമായി നടത്തിയ അതിശക്തമായ വ്യോമാക്രമണത്തോടെയാണ് ഈ പദ്ധതിക്ക് തുടക്കമിട്ടത്. അഹ്മദി നിജാദിന്റെ വസതിക്ക് നേരെ ആക്രമണം ഉണ്ടായ ഉടന്‍ തന്നെ മൊസാദ് ഏജന്റുമാര്‍ ഒരു കറുത്ത പ്യൂഷോ കാറില്‍ അദ്ദേഹത്തെ സുരക്ഷിതമായി മറ്റൊരു രഹസ്യ കേന്ദ്രത്തിലേക്ക് മാറ്റി.

എന്നാല്‍, ഇസ്രയേലിന്റെയും അമേരിക്കയുടെയും അമിത ഇടപെടലിലും സ്വന്തം രാജ്യത്തെ വിദേശശക്തികള്‍ക്ക് പണയപ്പെടുത്തുന്നതിലും നിജാദിന് പിന്നീട് കടുത്ത മാനസിക ബുദ്ധിമുട്ടുകള്‍ ഉണ്ടായി. ഒടുവില്‍ അദ്ദേഹം രഹസ്യ സങ്കേതത്തില്‍ നിന്നും രക്ഷപ്പെട്ട് പുറത്തുകടക്കുകയായിരുന്നു.

പദ്ധതി പൊളിച്ച ട്രംപിന്റെ ഇടപെടലും നിജാദിന്റെ തടങ്കലും

മൊസാദിന്റെ ചരിത്രത്തിലെ ഏറ്റവും വലിയ അട്ടിമറി നീക്കങ്ങളിലൊന്ന് പരാജയപ്പെടാന്‍ പ്രധാന കാരണം അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ ചില കടുത്ത തീരുമാനങ്ങളായിരുന്നു. കുര്‍ദിഷ് സേനയ്ക്ക് നേരിട്ടുള്ള പിന്തുണ നല്‍കുന്നതില്‍ നിന്നും ഇറാന്റെ പ്രധാന ഊര്‍ജ്ജ-സാമ്പത്തിക മേഖലകളെ പൂര്‍ണ്ണമായി തകര്‍ക്കുന്ന ആക്രമണങ്ങളില്‍ നിന്നും ട്രംപ് അവസാന നിമിഷം പിന്മാറിയത് ഇസ്രയേലിന് വലിയ തിരിച്ചടിയായി. കൂടാതെ തുര്‍ക്കിയുടെ ഭാഗത്തുനിന്നുണ്ടായ നയതന്ത്ര സമ്മര്‍ദ്ദവും കുര്‍ദിഷ് വിഭാഗങ്ങള്‍ക്കിടയിലെ വിമുഖതയും കാരണം അമേരിക്ക ഈ പദ്ധതിക്കുള്ള പിന്തുണ പിന്‍വലിച്ചു.

ഇതോടെ പദ്ധതി പാളുകയും ഒളിവില്‍ പോയ അഹ്മദി നിജാദ് കഴിഞ്ഞയാഴ്ച അന്തരിച്ച പരമോന്നത നേതാവ് ആയത്തുല്ല അലി ഖമേനിയുടെ ഭൗതികശരീരത്തില്‍ അന്തിമോപചാരം അര്‍പ്പിക്കാന്‍ പരസ്യമായി പ്രത്യക്ഷപ്പെടുകയും ചെയ്തു. എന്നാല്‍, ഇസ്രയേലുമായുള്ള നിജാദിന്റെ രഹസ്യബന്ധങ്ങളുടെ മുഴുവന്‍ വിവരങ്ങളും ഇറാന്റെ രഹസ്യാന്വേഷണ വിഭാഗമായ ഇസ്ലാമിക് റെവല്യൂഷണറി ഗാര്‍ഡ് കോര്‍പ്‌സ് ഇതിനോടകം തന്നെ കണ്ടെത്തിയിട്ടുണ്ട്.

ആരോപണങ്ങളും ഇപ്പോഴത്തെ അവസ്ഥയും

മൊസാദുമായി സഹകരിച്ച് പ്രവര്‍ത്തിച്ചെന്ന ആരോപണങ്ങള്‍ അഹ്മദി നിജാദിന്റെ ഓഫീസ് പൂര്‍ണ്ണമായും തള്ളിപ്പറഞ്ഞു. ഹോളിവുഡ് സിനിമകളെ വെല്ലുന്ന ഇത്തരം കഥകള്‍ നിഷേധിക്കാന്‍ പോലും യോഗ്യമല്ലെന്നാണ് അദ്ദേഹത്തിന്റെ വക്താക്കള്‍ പ്രതികരിച്ചത്. നിലവില്‍ ഇറാന്റെ രഹസ്യാന്വേഷണ വിഭാഗമായ ഇസ്ലാമിക് റെവല്യൂഷണറി ഗാര്‍ഡ് കോര്‍പ്‌സിന്റെ കസ്റ്റഡിയില്‍ അദ്ദേഹം വീട്ടുതടങ്കലിലാണെന്നാണ് ന്യൂയോര്‍ക്ക് ടൈംസ് റിപ്പോര്‍ട്ട് ചെയ്യുന്നത്. 

English Summary

A startling report by the New York Times and Haaretz alleges that Israel's intelligence agency, Mossad, orchestrated a covert plot codenamed "Operation Puss in Boots" to install Iran's former hardline president, Mahmoud Ahmadinejad, into power amid the political vacuum left by the death of Supreme Leader Ayatollah Ali Khamenei. Exploiting Ahmadinejad's growing disillusionment with the current regime, Mossad reportedly cultivated a relationship with him through secret meetings in Budapest between 2024 and 2025, even funding his travels. While a joint US-Israeli military strike on February 28, 2026, allowed Mossad agents to extract Ahmadinejad to a safe house following an attack on his residence, the coup ultimately collapsed after President Trump withdrew US support for accompanying Kurdish rebel advancements, leading to Ahmadinejad's eventual capture and house arrest by Iran's Islamic Revolutionary Guard Corps (IRGC).

ഫേസ്ബുക്കിൽ വാർത്തകൾ അറിയാൻ പേജ് ലൈക്ക് ചെയ്യുക Facebook ലിങ്ക് 👇
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്തിട്ട് ലൈക്ക് / Follow ബട്ടൺ ക്ലിക്ക് ചെയ്യുക. ഒപ്പം vachakam.com ന്റെ YouTube ചാനൽ സബ്സ്ക്രൈബ് ചെയ്യാനും മറക്കല്ലേ...
ചാനൽ ലിങ്ക്: https://www.youtube.com/channel/UCXRVmXRlpFL8TzgXtb8IIyw?sub_confirmation=1