നിരോധിച്ച വിവരങ്ങൾ കാണാൻ freedom.gov പോർട്ടലുമായി ട്രംപ് ഭരണകൂടം; യൂറോപ്പിലെ സെൻസർഷിപ്പ് മറികടക്കാൻ നീക്കം

FEBRUARY 18, 2026, 8:37 PM

വാഷിംഗ്ടൺ: യൂറോപ്പിലും മറ്റ് രാജ്യങ്ങളിലും നിരോധിക്കപ്പെട്ട ഉള്ളടക്കങ്ങൾ ജനങ്ങൾക്ക് ലഭ്യമാക്കുന്നതിനായി അമേരിക്കൻ സ്റ്റേറ്റ് ഡിപ്പാർട്ട്മെന്റ് പുതിയ ഓൺലൈൻ പോർട്ടൽ നിർമ്മിക്കുന്നു.

"freedom.gov" എന്ന വെബ്സൈറ്റ് വഴി ആ രാജ്യങ്ങളിലെ സർക്കാരുകൾ നിരോധിച്ച വിദ്വേഷ പ്രസംഗങ്ങളും മറ്റ് രാഷ്ട്രീയ ഉള്ളടക്കങ്ങളും കാണാൻ സാധിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. സെൻസർഷിപ്പിനെതിരെയുള്ള നീക്കമായാണ് വാഷിംഗ്ടൺ ഇതിനെ കാണുന്നത്.

ഉപഭോക്താവ് അമേരിക്കയിൽ നിന്നാണ് സൈറ്റ് ഉപയോഗിക്കുന്നത് എന്ന് തോന്നിപ്പിക്കുന്ന തരത്തിലുള്ള വി.പി.എൻ സംവിധാനം ഈ പോർട്ടലിൽ ഉൾപ്പെടുത്താൻ അധികൃതർ ആലോചിക്കുന്നുണ്ട്. സൈറ്റ് ഉപയോഗിക്കുന്നവരുടെ വിവരങ്ങൾ ട്രാക്ക് ചെയ്യില്ലെന്നും ഉറപ്പുനൽകുന്നു. എലോൺ മസ്കിന്റെ കീഴിൽ പ്രവർത്തിച്ചിരുന്ന എഡ്വേർഡ് കോറിസ്റ്റിൻ എന്ന ഉദ്യോഗസ്ഥനാണ് വെബ്സൈറ്റ് ഡിസൈൻ ചെയ്യുന്നതിന് പിന്നിലെന്നും സൂചനയുണ്ട്.

യൂറോപ്യൻ യൂണിയന്റെ ഡിജിറ്റൽ സർവീസ് ആക്ട് (DSA) പോലുള്ള നിയമങ്ങൾ വലതുപക്ഷ രാഷ്ട്രീയക്കാരുടെ ശബ്ദം അടിച്ചമർത്തുകയാണെന്ന് ട്രംപ് ഭരണകൂടം ആരോപിക്കുന്നു. എന്നാൽ, നാസിസം പോലുള്ള തീവ്രവാദ ആശയങ്ങൾ വീണ്ടും ഉയരാതിരിക്കാനാണ് തങ്ങൾ വിദ്വേഷ പ്രസംഗങ്ങൾക്ക് നിയന്ത്രണം ഏർപ്പെടുത്തുന്നത് എന്നാണ് യൂറോപ്യൻ യൂണിയന്റെ നിലപാട്. മറ്റൊരു രാജ്യത്തെ നിയമങ്ങൾ ലംഘിക്കാൻ അവിടുത്തെ പൗരന്മാരെ പ്രേരിപ്പിക്കുന്ന തരത്തിലുള്ള ഈ നീക്കം അമേരിക്കയും യൂറോപ്പും തമ്മിലുള്ള നയതന്ത്ര ബന്ധത്തിൽ വലിയ വിള്ളലുണ്ടാക്കാൻ സാധ്യതയുണ്ട്.

അമേരിക്ക നിർമ്മിക്കുന്ന freedom.gov എന്ന പോർട്ടൽ യൂറോപ്യൻ നിയമങ്ങൾക്കെതിരെയുള്ള നേരിട്ടുള്ള ആക്രമണമാണെന്ന് മുൻ സ്റ്റേറ്റ് ഡിപ്പാർട്ട്മെന്റ് ഉദ്യോഗസ്ഥനായ കെന്നത്ത് പ്രോപ്പ് വിശേഷിപ്പിച്ചു. സാധാരണ വി.പി.എൻ (VPN) സേവനങ്ങളേക്കാൾ എന്ത് അധിക സൗകര്യമാണ് ഈ സർക്കാർ പോർട്ടൽ നൽകുക എന്ന് വ്യക്തമല്ലെങ്കിലും, ജനുവരി 12-ന് തന്നെ ഈ വെബ്സൈറ്റ് വിലാസം രജിസ്റ്റർ ചെയ്തിട്ടുണ്ട്.

"ഫ്ലൈ, ഈഗിൾ, ഫ്ലൈ" (Fly, Eagle, Fly) എന്ന വാചകവും നാഷണൽ ഡിസൈൻ സ്റ്റുഡിയോയുടെ ലോഗോയുമാണ് നിലവിൽ വെബ്സൈറ്റിലുള്ളത്. മുൻപ് ചൈന, ഇറാൻ, റഷ്യ തുടങ്ങിയ രാജ്യങ്ങളിലെ വിവര നിയന്ത്രണങ്ങൾ മറികടക്കാൻ വി.പി.എൻ സേവനങ്ങളെ അമേരിക്ക സഹായിച്ചിരുന്നെങ്കിലും, ഇപ്പോൾ സമാനമായ നീക്കം യൂറോപ്യൻ സഖ്യകക്ഷികൾക്കെതിരെ നടത്തുന്നത് വലിയ നയതന്ത്ര പ്രത്യാഘാതങ്ങൾ ഉണ്ടാക്കിയേക്കാം.