സാൽമൊണെല്ല ബാക്ടീരിയ ബാധ: പ്രമുഖ പൊട്ടറ്റോ ചിപ്‌സ് ബ്രാൻഡുകൾക്ക് യു.എസ്. എഫ്.ഡി.എയുടെ അതീവ ജാഗ്രതാ നിർദ്ദേശം

JULY 3, 2026, 10:23 AM

വാഷിംഗ്ടൺ: സാൽമൊണെല്ല ബാക്ടീരിയയുടെ സാന്നിധ്യം കണ്ടെത്തിയതിനെ തുടർന്ന് പ്രമുഖ അമേരിക്കൻ കമ്പനിയായ 'ഉട്‌സ് ' (ഡ്വേ) പുറത്തിറക്കുന്ന വിവിധയിനം പൊട്ടറ്റോ ചിപ്‌സുകൾക്ക് യു.എസ്. ഫുഡ് ആൻഡ് ഡ്രഗ് അഡ്മിനിസ്‌ട്രേഷൻ ഏറ്റവും ഉയർന്ന ക്ലാസ് വൺ ജാഗ്രതാ നിർദ്ദേശം പുറപ്പെടുവിച്ചു. കടുത്ത ആരോഗ്യപ്രശ്‌നങ്ങൾക്കോ മരണത്തിനോ വരെ കാരണമായേക്കാവുന്ന സാഹചര്യങ്ങളിലാണ് എഫ്.ഡി.എ സാധാരണയായി ഈ വിഭാഗത്തിൽപ്പെട്ട മുന്നറിയിപ്പ് നൽകുന്നത്.

കമ്പനിയുടെ ജനപ്രിയ ബ്രാൻഡുകളായ 'സാപ്‌സ് ' 'ഡേർട്ടി' എന്നിവയുടെ ഏകദേശം ആറര ലക്ഷത്തോളം പാക്കറ്റ് ചിപ്‌സുകളെ ഈ നിർദ്ദേശം ബാധിക്കുമെന്നാണ് കണക്കാക്കുന്നത്. ചിപ്‌സിൽ ഉപയോഗിച്ച ഡ്രൈ മിൽക്ക് പൗഡറിൽ സാൽമൊണെല്ല ബാക്ടീരിയയുടെ സാന്നിധ്യമുണ്ടാകാം എന്ന സംശയത്തെ തുടർന്ന് കഴിഞ്ഞ മെയ് മാസം കമ്പനി സ്വമേധയാ ഈ ഉൽപ്പന്നങ്ങൾ വിപണിയിൽ നിന്ന് പിൻവലിച്ചിരുന്നു.

എന്നാൽ എഫ്.ഡി.എയുടെ ഏറ്റവും പുതിയ പ്രതിവാര റിപ്പോർട്ടിലാണ് ഈ നടപടിയുടെ ഗൗരവം വർദ്ധിപ്പിച്ചുക്കൊണ്ട് 'ക്ലാസ് വൺ' ആയി ഉയർത്തിയത്.

ജൂലൈ 27 നും ആഗസ്റ്റ് 31 നും ഇടയിൽ കാലാവധി അവസാനിക്കുന്ന പാക്കറ്റുകളാണ് പിൻവലിച്ചവയിൽ ഭൂരിഭാഗവും. ഇതുവരെ ഈ ഉൽപ്പന്നങ്ങൾ കഴിച്ച് ആർക്കും രോഗബാധയേറ്റതായി റിപ്പോർട്ടുകളില്ലെന്നും, മുൻകരുതൽ എന്ന നിലയിലാണ് നടപടിയെന്നും കമ്പനി അറിയിച്ചു. കൈവശമുള്ള ഇത്തരം ചിപ്‌സ് പാക്കറ്റുകൾ ഉപഭോക്താക്കൾ ഉപയോഗിക്കരുതെന്നും, പണം തിരികെ ലഭിക്കുന്നതിനായി കമ്പനിയുമായി ബന്ധപ്പെടണമെന്നും നിർദ്ദേശമുണ്ട്.

പി.പി. ചെറിയാൻ