ജോലി ഉപേക്ഷിക്കുന്നത് മടുത്തിട്ടല്ല! അമേരിക്കന്‍ തൊഴില്‍ വിപണിയിലെ ചരിത്രപരമായ ഇടിവിന് പിന്നിലെ കാരണം ഇതാണ്

JULY 8, 2026, 6:42 PM

അമേരിക്കന്‍ സമ്പദ്‌വ്യവസ്ഥയെ കനത്ത ആശങ്കയിലാഴ്ത്തിക്കൊണ്ട് രാജ്യത്തെ തൊഴില്‍ പങ്കാളിത്ത നിരക്ക് 61.5% ആയി താഴ്ന്നിരിക്കുന്നു. കോവിഡ് മഹാമാരിയുടെ സമയമൊഴിച്ചു നിര്‍ത്തിയാല്‍ കഴിഞ്ഞ 50 വര്‍ഷത്തിനിടയിലെ (1976 ന് ശേഷമുള്ള) ഏറ്റവും കുറഞ്ഞ നിരക്കാണിത്. ജൂണ്‍ മാസത്തില്‍ മാത്രം 7,20,000 ആളുകളാണ് തൊഴില്‍ സേനയില്‍ നിന്ന് പുറത്തുപോയത്. എന്നാല്‍, തൊഴില്‍ ലഭിക്കാത്തതുകൊണ്ട് ആളുകള്‍ മടുത്തു സ്വയം പിന്മാറുന്നതാണെന്ന പരമ്പരാഗത സാമ്പത്തിക നിഗമനങ്ങള്‍ ഇവിടെ പൂര്‍ണ്ണമായി ശരിയല്ലെന്ന് ഇന്‍ഡീഡ് ഹയറിംഗ് ലാബിലെ സാമ്പത്തിക വിദഗ്ദ്ധയായ ലോറ ഉള്‍റിച്ച് വ്യക്തമാക്കുന്നു.

ഇത് തൊഴിലവസരങ്ങളുടെ കുറവല്ല, മറിച്ച് ആവശ്യത്തിന് തൊഴിലാളികളെ ലഭിക്കാത്ത ലേബര്‍ സപ്ലൈ പ്രതിസന്ധിയാണ്.

തലമുറകളുടെ മാറ്റവും വിരമിക്കലും

തൊഴില്‍ ശക്തിയിലെ ഈ വന്‍ തകര്‍ച്ചയ്ക്ക് പിന്നിലെ ഏറ്റവും വലിയ കാരണം തലമുറ മാറ്റവും വിരമിക്കലുമാണ്. ബേബി ബൂമര്‍ തലമുറയില്‍പ്പെട്ട ദശലക്ഷക്കണക്കിന് ആളുകള്‍ ഒരേസമയം വിരമിക്കല്‍ പ്രായത്തിലേക്ക് എത്തുന്ന ഡെമോഗ്രാഫിക് ക്ലിഫ് അമേരിക്കന്‍ തൊഴില്‍ മേഖലയെ വന്‍തോതില്‍ ബാധിച്ചിരിക്കുന്നു. ഇന്‍ഡീഡ് ഹയറിംഗ് ലാബ് പുറത്തുവിട്ട റിപ്പോര്‍ട്ട് പ്രകാരം 2025 നും 2032 നും ഇടയില്‍ യു.എസ് തൊഴില്‍ സേനയില്‍ നിന്ന് ഏകദേശം 3.7% അഥവാ 59 ലക്ഷത്തോളം തൊഴിലാളികളുടെ കുറവുണ്ടാകും. ഇത് തടയാനാകാത്തവിധം അമേരിക്കന്‍ സാമ്പത്തിക വളര്‍ച്ചയെ ബാധിക്കുമെന്നാണ് സാമ്പത്തിക വിദഗ്ദ്ധരുടെ വിലയിരുത്തല്‍.

കുടിയേറ്റ നയങ്ങളും തൊഴിലാളികളുടെ പ്രായ ഘടനയും

കുടിയേറ്റ നയങ്ങളിലുണ്ടായ കര്‍ശനമായ മാറ്റങ്ങളാണ് പ്രതിസന്ധിയുടെ ആഴം കൂട്ടിയ മറ്റൊരു ഘടകം. യു.എസ് ബ്യൂറോ ഓഫ് ലേബര്‍ സ്റ്റാറ്റിസ്റ്റിക്‌സ് ഡാറ്റ പ്രകാരം, അമേരിക്കന്‍ സ്വദേശികളായ തൊഴിലാളികളേക്കാള്‍ ഉയര്‍ന്ന തൊഴില്‍ പങ്കാളിത്ത നിരക്കുള്ളവരാണ് കുടിയേറ്റക്കാര്‍. കുടിയേറ്റക്കാരുടെ പങ്കാളിത്ത നിരക്ക് 66.3% ആയിരിക്കുമ്പോള്‍ സ്വദേശികളുടേത് 61.6% മാത്രമാണ്. പുരുഷന്മാരുടെ കാര്യത്തില്‍ ഈ വ്യത്യാസം വളരെ വലുതാണ്. കുടിയേറ്റ പുരുഷന്മാരില്‍ 76.9% പേരും തൊഴില്‍ വിപണിയിലുള്ളപ്പോള്‍ സ്വദേശികളില്‍ ഇത് 65.8% മാത്രമാണ്.

കൂടാതെ കുടിയേറ്റക്കാരില്‍ 70.1% പേരും ജോലി ചെയ്യാന്‍ ഏറ്റവും അനുയോജ്യമായ 25 നും 54 നും ഇടയില്‍ പ്രായമുള്ളവരാണ്. കുടിയേറ്റം കുറയുമ്പോള്‍ തൊഴില്‍ ശക്തിയുടെ ശരാശരി പ്രായം ഉയരുകയും ഉല്‍പ്പാദനക്ഷമതയെ അത് ബാധിക്കുകയും ചെയ്യുന്നു.

എ.ഐ ഉണ്ടാക്കുന്ന തൊഴില്‍ വിടവും മേഖല തിരിച്ചുള്ള പ്രതിസന്ധിയും

മറ്റൊരു പ്രധാന വെല്ലുവിളി കൃത്രിമബുദ്ധിയുടെ ദ്രുതഗതിയിലുള്ള വളര്‍ച്ചയും തൊഴില്‍ മേഖലയിലെ പൊരുത്തക്കേടുകളുമാണ്. പുതിയ ബിരുദധാരികളും യുവാക്കളും പ്രധാനമായും തിരഞ്ഞെടുക്കുന്ന ഐ.ടി, ഫിനാന്‍സ്, പ്രൊഫഷണല്‍ ബിസിനസ്സ് സര്‍വീസസ് തുടങ്ങിയ മേഖലകളെയാണ് എ.ഐ ഏറ്റവും കഠിനമായി ബാധിക്കുന്നത്. കൂടുതല്‍ എ.ഐ കടന്നുവരുന്ന സാഹചര്യത്തില്‍ ഈ മൂന്ന് മേഖലകളിലെയും മൊത്തം തൊഴില്ലായ്മ നിരക്ക് 2025 ലെ 4% ല്‍ നിന്ന് 2032 ഓടെ 12% ആയി ഉയരാം. ഐ.ടി മേഖലയില്‍ ഇത് 21.2% വരെ ഉയര്‍ന്നേക്കാം.

അതേസമയം ആരോഗ്യം, നഴ്‌സിംഗ്, ഗവണ്‍മെന്റ്, നിര്‍മ്മാണം, ഹോം ഹെല്‍ത്ത് എയ്ഡ് തുടങ്ങിയ മേഖലകളില്‍ കടുത്ത തൊഴിലാളി ക്ഷാമം നേരിടുന്നുണ്ട്. ഉദാഹരണത്തിന് ന്യൂ മെക്‌സിക്കോയില്‍ 39.2% ഫിസിഷ്യന്‍മാരും 60 വയസ്സിന് മുകളിലുള്ളവരാണ്. എന്നാല്‍ ഉയര്‍ന്ന യോഗ്യതാ മാനദണ്ഡങ്ങളും കുറഞ്ഞ വേതനവും കാരണം യുവാക്കള്‍ ഇത്തരം മേഖലകളിലേക്ക് കടന്നുവരാന്‍ മടിക്കുന്നു. എ.ഐ സാങ്കേതിക വിദ്യ വികസിക്കുന്നുണ്ടെങ്കിലും, ആരോഗ്യ-നിര്‍മ്മാണ മേഖലകളിലെ തൊഴിലാളി ക്ഷാമത്തിന് പരിഹാരമാകാന്‍ എ.ഐക്ക് സാധിക്കുന്നില്ല.

കുടുംബ സമ്പത്തും നേരത്തെയുള്ള വിരമിക്കലും

ബേബി ബൂമര്‍ തലമുറയില്‍ നിന്ന് അടുത്ത തലമുറകളിലേക്ക് കൈമാറ്റം ചെയ്യപ്പെടാനിരിക്കുന്ന ഭീമമായ സ്വത്തും തൊഴില്‍ പങ്കാളിത്തത്തെ ബാധിക്കുന്നുണ്ട്. സാമ്പത്തികമായി ഭദ്രതയുള്ള കുടുംബങ്ങളിലെ ആളുകള്‍ നേരത്തെ വിരമിക്കാനോ തൊഴില്‍ വിപണിയില്‍ നിന്ന് മാറിനില്‍ക്കാനോ ഇത് കാരണമാകുന്നു. നിലവില്‍ 72%-73% അമേരിക്കക്കാരും തങ്ങള്‍ സാമ്പത്തികമായി സുരക്ഷിതരാണെന്ന് വ്യക്തമാക്കുന്നുണ്ട്.

ചുരുക്കത്തില്‍, കേവലം തൊഴിലില്ലായ്മയോ സാമ്പത്തിക മാന്ദ്യമോ മാത്രമല്ല, മറിച്ച് ജനസംഖ്യാ വ്യതിയാനവും കുടിയേറ്റ നയങ്ങളും സാങ്കേതികവിദ്യയുടെ കടന്നുവരവും ചേര്‍ന്നാണ് അമേരിക്കന്‍ തൊഴില്‍ വിപണിയില്‍ ചരിത്രപരമായ ഈ മാറ്റങ്ങള്‍ സൃഷ്ടിക്കുന്നത്.