ഷിക്കാഗോ: മലയാളത്തിന്റെ ഗൃഹാതുരതയും ഓർമ്മകളുടെ പൂക്കാലവും, ഒരുമയുടെയും സൗഹൃദത്തിന്റെയും സന്ദേശവുമായി പകർന്നുനൽകി ഷിക്കാഗോ മലയാളി അസോസിയേഷന്റെ ഈ വർഷത്തെ ഓണാഘോഷം ഓണം 2026 പ്രൗഢഗംഭീരമായി അരങ്ങേറി. പാരമ്പര്യത്തിന്റെയും കലാസാംസ്‌കാരിക വൈവിധ്യത്തിന്റെയും വർണപ്പകിട്ടിൽ നടന്ന ആഘോഷം ഷിക്കാഗോയിലെ മലയാളി സമൂഹത്തിന് മറക്കാനാവാത്ത ഒരു ഓണാനുഭവമായി മാറി.

വൈകിട്ട് 5.30ന് വിഭവസമൃദ്ധമായ ഓണസദ്യയോടെയാണ് ആഘോഷങ്ങൾക്ക് തുടക്കമായത്. സീനിയർ അംഗം ഫിലിപ്പ് പുത്തൻ പുര, പ്രിൻസ് ഈപ്പൻ എന്നിവർ ഇതിനു നേതൃത്വം നൽകി. തുടർന്ന് നടന്ന വർണാഭമായ ഘോഷയാത്രയിൽ നൂറുകണക്കിന് ആളുകൾ ആവേശപൂർവ്വം അണിനിരന്നു. മഹാബലി തിരുമേനിയെ സ്വീകരിച്ചുകൊണ്ട് നടന്ന ഘോഷയാത്രയ്ക്ക് താളമേളങ്ങളുടെ അകമ്പടിയോടെ ഗംഭീരമായ വരവേൽപ്പാണ് ഒരുക്കിയത്. ചെണ്ടമേളത്തിന്റെ താളത്തിൽ താലപ്പൊലിയേന്തിയ വനിതകളും കുട്ടികളും വിശിഷ്ടാതിഥികളും ഷിക്കാഗോയിലെ വിവിധ മേഖലകളിൽ നിന്നെത്തിയ മലയാളികളും അണിനിരന്നപ്പോൾ, പങ്കെടുത്ത എല്ലാവർക്കും അത് വേറിട്ടൊരു അനുഭവമായി.

കേരള സർക്കാർ ചീഫ് വിപ്പ് അപു ജോൺ ജോസഫ്, എം.എൽ.എമാരായ അഡ്വ. വി.പി. സജീന്ദ്രൻ, അഡ്വ. എം.ജെ. സെബാസ്റ്റ്യൻ, ഫൊക്കാന, ഫോമാ നേതാക്കൾ തുടങ്ങി നിരവധി പ്രമുഖർ ഘോഷയാത്രയിൽ പങ്കെടുത്തു.

ഘോഷയാത്രയ്ക്കുശേഷം സെന്റ് മേരീസ് ചർച്ച് ഓഡിറ്റോറിയത്തിലെ ഓണവേദിയിലേക്ക് മഹാബലി തിരുമേനി പ്രവേശിച്ചതോടെ ആഘോഷങ്ങൾക്ക് ആവേശകരമായ തുടക്കമായി. ഷിക്കാഗോയിലെ വിവിധ ചെണ്ടമേള സംഘങ്ങളിലെ കലാകാരന്മാർ അണിനിരന്ന ഗംഭീരമായ ചെണ്ടമേളം സദസ്സിന്റെ ഹൃദയം കീഴടക്കി. ചെണ്ടമേള കോ-ഓർഡിനേറ്റർ ജിനോയ് മാത്യുവിന്റെ നേതൃത്വത്തിൽ ഷിക്കാഗോയിലെ വിവിധ ചെണ്ടമേള സംഘങ്ങളുടെ സഹകരണത്തോടെയാണ് പരിപാടി അരങ്ങേറിയത്.

മേളത്തിന്റെ ആവേശത്തിന് കൂടുതൽ മിഴിവേകി പോർട്ട്‌ലൻഡിൽ നിന്നെത്തിയ ആനന്ദനടയോഗിയുടെ വയലിൻ സംഗീതവും ചേർന്നപ്പോൾ, അത് താളത്തിന്റെയും ഈണത്തിന്റെയും അപൂർവ സംഗമമായി മാറി. കേരളത്തിന്റെ തനിമയും പ്രവാസജീവിതത്തിന്റെ സർഗാത്മകതയും ഒരേ വേദിയിൽ ലയിച്ച മനോഹര നിമിഷങ്ങൾക്കാണ് സദസ്സ് സാക്ഷ്യം വഹിച്ചത്.

തുടർന്ന് ഷിക്കാഗോയിലെ വനിതകൾ അണിനിരന്ന് അവതരിപ്പിച്ച മെഗാ തിരുവാതിര അരങ്ങേറി. ചുവടുകളിലും ചലനങ്ങളിലും കേരളത്തിന്റെ പൈതൃകവും മലയാളിയുടെ ഗൃഹാതുരതയും നിറച്ച തിരുവാതിര സദസ്സിനെ ഗതകാലത്തിന്റെ മനോഹര ഓർമ്മകളിലേക്ക് കൂട്ടിക്കൊണ്ടുപോയി. തുടർന്നുള്ള കലാപരിപാടികൾക്ക് സാറ അനിൽ നേതൃത്വം നൽകി. നൃത്തവും സംഗീതവും ഗാനങ്ങളും കോർത്തിണക്കിയ വൈവിധ്യമാർന്ന കലാപരിപാടികൾ കാണികളുടെ മനം കവർന്നു. തുടർന്ന് നടന്ന പൊതുസമ്മേളനത്തിൽ ഷിക്കാഗോ മലയാളി അസോസിയേഷൻ ജനറൽ സെക്രട്ടറി ബിജു മുണ്ടക്കൽ സ്വാഗതം ആശംസിച്ചു. പ്രസിഡന്റ് ജോസ് മണക്കാട്ടിന്റെ അധ്യക്ഷതയിൽ ചേർന്ന സമ്മേളനം കേരള സർക്കാർ ചീഫ് വിപ്പ് അപു ജോൺ ജോസഫ് ഉദ്ഘാടനം ചെയ്തു.

അമേരിക്കയുൾപ്പെടെ ഇന്ത്യയ്ക്ക് പുറത്തുള്ള വിവിധ രാജ്യങ്ങളിൽ മലയാളികൾ ഓണം ആഘോഷിക്കുന്നുണ്ടെങ്കിലും, ഇത്രയും വിപുലവും മനോഹരവുമായ രീതിയിൽ ഓണം ആഘോഷിക്കുന്നത് അത്ഭുതപ്പെടുത്തുന്നതാണെന്ന് അപു ജോൺ ജോസഫ് പറഞ്ഞു. പ്രവാസി മലയാളികളുടെ സാംസ്‌കാരിക പൈതൃകം കാത്തുസൂക്ഷിക്കുന്നതിൽ ഇത്തരം കൂട്ടായ്മകൾ വഹിക്കുന്ന പങ്കിനെയും അദ്ദേഹം പ്രത്യേകം പ്രശംസിച്ചു. അഡ്വ. എം.ജെ. സെബാസ്റ്റ്യൻ എം.എൽ.എ. ഓണാശംസകൾ നേർന്ന് സംസാരിച്ചു. പ്രവാസി മലയാളികളുടെ ക്ഷേമത്തിനും ആവശ്യങ്ങൾക്കുമായി തന്നാൽ കഴിയുന്ന എല്ലാ സഹായങ്ങളും ചെയ്യാൻ ശ്രമിക്കുമെന്ന് അദ്ദേഹം ഉറപ്പുനൽകി.

ചടങ്ങിൽ ഷിക്കാഗോ മലയാളി അസോസിയേഷൻ ട്രഷറർ അച്ചൻകുഞ്ഞ് മാത്യു, വൈസ് പ്രസിഡന്റ് ലൂക്ക് ചിറയിൽ, ജോയിന്റ് സെക്രട്ടറി സാറ അനിൽ, ജോയിന്റ് ട്രഷറർ പ്രിൻസ് ഈപ്പൻ, ഫോമാ നാഷണൽ ജോയിന്റ് ട്രഷറർ ജോൺസൺ കണ്ണൂക്കാടൻ, ഫൊക്കാന മുൻ പ്രസിഡന്റ് പോൾ കറുകപ്പള്ളിൽ, വ്യവസായ പ്രമുഖൻ കോശി സാമുവൽ, ഓണാഘോഷത്തിന്റെ മുഖ്യ സ്‌പോൺസർമാരായ ഹുസൈൻ മിർസ, സാറ മിർസ തുടങ്ങിയവർ വേദിയിൽ സന്നിഹിതരായിരുന്നു.

തുടർന്ന് വിവിധ മേഖലകളിൽ മികവ് തെളിയിച്ച വിദ്യാർത്ഥികൾക്കുള്ള വിദ്യാഭ്യാസ പുരസ്‌കാരങ്ങൾ വിതരണം ചെയ്തു. ഡോ. സൂസൻ ചാക്കോ പുരസ്‌കാര വിതരണത്തിന് നേതൃത്വം നൽകി. തുടർന്ന് ഓണാഘോഷത്തിന്റെ വിജയത്തിന് പിന്തുണ നൽകിയ സ്‌പോൺസർമാരെ ആദരിച്ചു.  പ്രിൻസ് ഈപ്പൻ ചടങ്ങിന് നേതൃത്വം നൽകി. വിശിഷ്ടാതിഥികൾ നിലവിളക്ക് തെളിയിച്ചതോടെ ഓണാഘോഷത്തിന്റെ ഔപചാരിക ഉദ്ഘാടനച്ചടങ്ങിനും തുടക്കമായി. ചടങ്ങിൽ ഷിക്കാഗോ മലയാളി അസോസിയേഷൻ ട്രഷറർ അച്ചൻകുഞ്ഞ് മാത്യു കൃതജ്ഞത രേഖപ്പെടുത്തി. എന്നാൽ ആഘോഷത്തിന്റെ ഏറ്റവും വലിയ ആകർഷണം പിന്നീടായിരുന്നു. ലോകപ്രശസ്ത മജീഷ്യൻ ഗോപിനാഥ് മുതുകാടും സംഘവും അവതരിപ്പിച്ച രണ്ടുമണിക്കൂർ നീണ്ടുനിന്ന M-Cube – Magic, Melody, Mission ഷോ സദസ്സിനെ അക്ഷരാർത്ഥത്തിൽ വിസ്മയത്തിന്റെ മറ്റൊരു ലോകത്തേക്ക് കൂട്ടിക്കൊണ്ടുപോയി.

മാജിക്കിന്റെ ലോകത്തേക്ക് കടന്നുവന്ന നാൾ മുതൽ ഇന്നുവരെയുള്ള തന്റെ ജീവിതയാത്രയും അനുഭവങ്ങളും സന്ദേശങ്ങളും സംഗീതവും മാജിക്കും അവതരണകലയും സമന്വയിപ്പിച്ചുകൊണ്ടാണ് ഗോപിനാഥ് മുതുകാട് M-Cube വേദിയിലെത്തിച്ചത്. വിനോദത്തിനൊപ്പം ചിന്തിപ്പിക്കുകയും പ്രചോദിപ്പിക്കുകയും ചെയ്ത ഈ വേറിട്ട അവതരണം സദസ്സിന് അപൂർവമായൊരു അനുഭവമായി. M-Cube ഷോ ആസ്വദിക്കുന്നതിനായി ഇൻഡ്യാന, വിസ്‌കോൺസിൻ തുടങ്ങിയ വിവിധ സംസ്ഥാനങ്ങളിൽ നിന്നായി നൂറുകണക്കിന് ആളുകൾ ഷിക്കാഗോയിലെ ഓണാഘോഷ വേദിയിലേക്ക് ഒഴുകിയെത്തി. ഷിക്കാഗോയിൽ ആദ്യമായി ഇത്തരമൊരു വലിയ മാജിക്മ്യൂസിക്മിഷൻ ഷോ സംഘടിപ്പിക്കുന്നതിന് മുൻകൈയെടുത്ത ഷിക്കാഗോ മലയാളി അസോസിയേഷൻ ഭാരവാഹികളെ നിരവധി പേർ അഭിനന്ദിച്ചു.

ഓണം ഒരു ആഘോഷം മാത്രമല്ല, തലമുറകളെ തമ്മിൽ ബന്ധിപ്പിക്കുന്ന സാംസ്‌കാരിക പാലം കൂടിയാണെന്ന് ഒരിക്കൽ കൂടി തെളിയിക്കുന്നതായിരുന്നു ഷിക്കാഗോ മലയാളി അസോസിയേഷന്റെ ഈ വർഷത്തെ ഓണാഘോഷം. കേരളത്തിന്റെ തനിമയും പ്രവാസജീവിതത്തിന്റെ പുതുമയും സമന്വയിപ്പിച്ച ആഘോഷം മലയാളി സമൂഹത്തിന്റെ ഐക്യത്തിന്റെയും കൂട്ടായ്മയുടെയും ശക്തമായ പ്രതിഫലനമായി. 2026ലെ ഓണാഘോഷം സംഘടനയ്ക്ക് പുത്തൻ ഉണർവും ഊർജവും പകർന്നുനൽകിയെന്നും, കൂടുതൽ ഉയരങ്ങളിലേക്ക് മുന്നേറാനുള്ള ചാലകശക്തിയായി ഈ ആഘോഷം മാറിയെന്നും പ്രസിഡന്റ് ജോസ് മണക്കാട്ട്, ജനറൽ സെക്രട്ടറി ബിജു മുണ്ടക്കൽ, ട്രഷറർ അച്ചൻകുഞ്ഞു മാത്യു എന്നിവർ പറഞ്ഞു.

ഓണാഘോഷം വിജയകരമാക്കാൻ സഹകരിച്ച വിശിഷ്ടാതിഥികൾ, കലാകാരന്മാർ, സ്‌പോൺസർമാർ, വളണ്ടിയർമാർ, സംഘടനാ ഭാരവാഹികൾ, കമ്മിറ്റി അംഗങ്ങൾ, കുടുംബാംഗങ്ങൾ, ഷിക്കാഗോയിലെ മുഴുവൻ മലയാളി സമൂഹം എന്നിവർക്കും ഭാരവാഹികൾ ഹൃദയം നിറഞ്ഞ നന്ദി അറിയിച്ചു. സ്‌നേഹവും സൗഹൃദവും ഒരുമയും പൂത്തുലഞ്ഞ ആ സായാഹ്നം, ഷിക്കാഗോ മലയാളി സമൂഹത്തിന്റെ ഓർമ്മകളിൽ ഏറെക്കാലം മായാതെ നിൽക്കുന്ന ഒരു പൊന്നോണമായി മാറി.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്