സാൾട്ട് ലേക്ക് സിറ്റി: വർഷത്തിൽ വളരെ അപൂർവമായി മാത്രം വെള്ളമൊഴുകുന്ന അമേരിക്കയിലെ യൂട്ടാ സംസ്ഥാനത്തെ ഗൺലോക്ക് വെള്ളച്ചാട്ടം അപ്രതീക്ഷിതമായി വീണ്ടും സജീവമായി. ശക്തമായ മഴയെ തുടർന്ന് ചുവന്ന മണൽക്കല്ലുകൾ നിറഞ്ഞ വരണ്ട പ്രദേശത്തിലൂടെ വെള്ളം കുത്തിയൊഴുകുന്ന അപൂർവ കാഴ്ച കാണാൻ നിരവധി സന്ദർശകരാണ് എത്തുന്നത്.
യൂട്ടായിലെ സെന്റ് ജോർജ് നഗരത്തിന് സമീപമുള്ള ഗൺലോക്ക് സ്റ്റേറ്റ് പാർക്കിലാണ് ഈ പ്രകൃതിദൃശ്യം. സാധാരണയായി വസന്തകാലത്ത് സമീപപ്രദേശങ്ങളിലെ മഞ്ഞുരുകി ജലനിരപ്പ് ഉയരുമ്പോഴാണ് ഇവിടെ വെള്ളച്ചാട്ടം പ്രത്യക്ഷപ്പെടാറുള്ളത്. എന്നാൽ ഇത്തവണ നവംബർ മാസത്തിൽ തന്നെ വെള്ളച്ചാട്ടം സജീവമായതാണ് പ്രത്യേകത.
ഒക്ടോബറിലും നവംബർ ആദ്യവാരത്തിലുമായി തെക്കൻ യൂട്ടായിൽ ലഭിച്ച കനത്ത മഴയാണ് വെള്ളച്ചാട്ടത്തിന് കാരണമായത്. ഗൺലോക്ക് റിസർവോയറിലെ ജലനിരപ്പ് ഉയർന്ന് സംഭരശേഷി കവിഞ്ഞതോടെ അധികജലം ചുവന്ന പാറക്കെട്ടുകളിലൂടെ താഴേക്ക് ഒഴുകിത്തുടങ്ങി. സംസ്ഥാന പാർക്ക് അധികൃതരുടെ കണക്കനുസരിച്ച് കഴിഞ്ഞ 15 വർഷത്തിനിടെ ആറു തവണ മാത്രമാണ് ഇവിടെ വെള്ളച്ചാട്ടം സജീവമായിട്ടുള്ളത്. നവംബർ മാസത്തിൽ ഇത്തരമൊരു കാഴ്ച പ്രത്യക്ഷപ്പെടുന്നത് അത്യപൂർവമാണെന്നും അധികൃതർ വ്യക്തമാക്കുന്നു.
അഞ്ചാഴ്ചയ്ക്കിടെ ജലസംഭരണിയിലെ ജലനിരപ്പ് ഏകദേശം 27 അടി ഉയർന്നതായാണ് റിപ്പോർട്ട്. തെക്കുപടിഞ്ഞാറൻ യൂട്ടായിൽ ഒക്ടോബർ തുടക്കം മുതൽ ലഭിച്ച അസാധാരണമായ മഴയാണ് ഇതിന് പിന്നിൽ. ചുവന്ന മണൽക്കല്ലുകൾക്കിടയിലൂടെ ശക്തമായി ഒഴുകുന്ന വെള്ളത്തിന്റെ ദൃശ്യങ്ങൾ സമൂഹമാധ്യമങ്ങളിലും ശ്രദ്ധ നേടുകയാണ്. പ്രകൃതിയുടെ ഈ അപൂർവ കാഴ്ച നേരിൽ കാണാൻ സമീപപ്രദേശങ്ങളിൽനിന്നും മറ്റു സംസ്ഥാനങ്ങളിൽനിന്നും വിനോദസഞ്ചാരികൾ എത്തുന്നുണ്ട്.
അതേസമയം വെള്ളച്ചാട്ടത്തിന് സമീപം അതീവ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകിയിട്ടുണ്ട്. ശക്തമായ ഒഴുക്ക്, വഴുക്കലുള്ള പാറകൾ, വെള്ളത്തിനടിയിൽ മറഞ്ഞുകിടക്കുന്ന മരക്കൊമ്പുകളും മറ്റു അവശിഷ്ടങ്ങളും അപകടസാധ്യത വർധിപ്പിക്കുന്നു.
നവംബർ രണ്ടിന് സമീപത്തെ നദിയിലൂടെ വാഹനം കടത്താൻ ശ്രമിക്കുന്നതിനിടെ കുടുങ്ങിയ രണ്ടുപേരെ രക്ഷാപ്രവർത്തകർ സുരക്ഷിതമായി പുറത്തെടുത്തിരുന്നു. വെള്ളച്ചാട്ടത്തിനടുത്ത് പാറകളിൽ കയറുന്നതും വെള്ളത്തിലേക്ക് ചാടുന്നതും ഒഴിവാക്കണമെന്ന് അധികൃതർ നിർദേശിക്കുന്നു.
മരുഭൂമിയുടെ സ്വഭാവമുള്ള പ്രദേശത്തുണ്ടായ ഈ അപൂർവ ജലപ്രവാഹം, കാലാവസ്ഥയിലെ മാറ്റങ്ങൾ പ്രകൃതിദൃശ്യങ്ങളെ എത്ര വേഗത്തിൽ മാറ്റിമറിക്കാമെന്നതിന്റെ ശ്രദ്ധേയമായ ഉദാഹരണമായി മാറിയിരിക്കുകയാണ്.
അനിൽ മറ്റത്തിക്കുന്നേൽ
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
