വാഷിങ്ടൺ: അമേരിക്കയിലെ വിമാനഗതാഗത നിയന്ത്രണ സംവിധാനത്തിൽ വിപ്ലവകരമായ മാറ്റത്തിന് തുടക്കമിട്ട് രാജ്യത്തെ ആദ്യ ഡിജിറ്റൽ എയർ ട്രാഫിക് കൺട്രോൾ ടവറുകൾ പ്രവർത്തനം ആരംഭിച്ചു. പരമ്പരാഗത കൺട്രോൾ ടവറുകളിലെ നിരീക്ഷണ സംവിധാനങ്ങൾക്ക് പകരമായി അത്യാധുനിക ക്യാമറകളും ഡിജിറ്റൽ സ്‌ക്രീനുകളും ഉപയോഗിക്കുന്ന പുതിയ സാങ്കേതികവിദ്യയാണ് അമേരിക്ക നടപ്പാക്കിയിരിക്കുന്നത്.

2026 നവംബർ ആറിന് അമേരിക്കൻ ഫെഡറൽ ഏവിയേഷൻ അഡ്മിനിസ്‌ട്രേഷൻ പുറത്തിറക്കിയ ഔദ്യോഗിക പ്രഖ്യാപനപ്രകാരം ഫ്‌ളോറിഡയിലെ ബാർട്ടോ എക്‌സിക്യൂട്ടീവ് എയർപോർട്ടിലും അലാസ്‌കയിലെ കെനായ് മുനിസിപ്പൽ എയർപോർട്ടിലുമാണ് പുതിയ സംവിധാനം പ്രവർത്തനക്ഷമമായിരിക്കുന്നത്.

സാധാരണ എയർ ട്രാഫിക് കൺട്രോൾ ടവറുകളിൽ ഉദ്യോഗസ്ഥർ ഉയരത്തിലുള്ള കെട്ടിടങ്ങളിൽനിന്ന് നേരിട്ട് വിമാനങ്ങളുടെ ചലനങ്ങൾ നിരീക്ഷിക്കുന്ന രീതിയാണ് നിലവിലുള്ളത്. എന്നാൽ പുതിയ ഡിജിറ്റൽ ടവറുകളിൽ വിമാനത്താവളത്തിന് ചുറ്റും സ്ഥാപിച്ചിരിക്കുന്ന ഉയർന്ന റെസല്യൂഷനുള്ള ക്യാമറകളിലൂടെ ലഭിക്കുന്ന ദൃശ്യങ്ങൾ വലിയ സ്‌ക്രീനുകളിൽ പ്രദർശിപ്പിക്കുന്നു.

ഇതിലൂടെ റൺവേകൾ, വിമാനങ്ങൾ സഞ്ചരിക്കുന്ന ടാക്‌സിവേകൾ, വിമാനത്താവളത്തിന് ചുറ്റുമുള്ള ആകാശമേഖല എന്നിവയുടെ 360 ഡിഗ്രി ദൃശ്യങ്ങൾ കൺട്രോൾ ഉദ്യോഗസ്ഥർക്ക് ലഭ്യമാകും. വിമാനങ്ങളുടെ നീക്കങ്ങൾ കൂടുതൽ വ്യക്തമായി നിരീക്ഷിക്കുന്നതിനൊപ്പം സുരക്ഷിതമായ തീരുമാനങ്ങൾ എടുക്കാൻ ആവശ്യമായ വിവരങ്ങളും ലഭിക്കും.

എന്നാൽ ഈ സംവിധാനം മനുഷ്യരായ എയർ ട്രാഫിക് കൺട്രോളർമാരെ ഒഴിവാക്കുന്നതല്ല. വിമാനഗതാഗതം നിയന്ത്രിക്കുന്നതിനുള്ള ഉത്തരവാദിത്വം ഉദ്യോഗസ്ഥർക്കുതന്നെയായിരിക്കും. അവരുടെ പ്രവർത്തനം കൂടുതൽ സുരക്ഷിതവും കാര്യക്ഷമവുമാക്കുന്നതിനുള്ള സാങ്കേതിക സഹായമാണ് ഡിജിറ്റൽ ടവറുകൾ നൽകുന്നത്.

അമേരിക്കയുടെ വ്യോമഗതാഗത സുരക്ഷയ്ക്ക് പുതിയ സാങ്കേതികവിദ്യ നിർണായകമായ സഹായമാകുമെന്ന് FAA അഡ്മിനിസ്‌ട്രേറ്റർ ബ്രയാൻ ബെഡ്‌ഫോർഡ് വ്യക്തമാക്കി. വിമാനങ്ങളെ സുരക്ഷിതമായി വേർതിരിച്ച് നിയന്ത്രിക്കുന്ന നിർണായക ജോലി എയർ ട്രാഫിക് കൺട്രോളർമാർ തുടരുമെന്നും അതിനാവശ്യമായ കൂടുതൽ മികച്ച ഉപകരണങ്ങളാണ് സർക്കാർ ലഭ്യമാക്കുന്നതെന്നും അദ്ദേഹം പറഞ്ഞു.

ആദ്യഘട്ടത്തിലെ വിജയത്തെ തുടർന്ന് അഞ്ച് വിമാനത്താവളങ്ങളിലേക്കുകൂടി ഡിജിറ്റൽ ടവർ സംവിധാനം വ്യാപിപ്പിക്കാൻ FAA പദ്ധതിയിടുന്നു. ഫ്‌ളോറിഡയിലെ വിന്റർ ഹേവൻ റീജിയണൽ എയർപോർട്ട്, വെനീസ് മുനിസിപ്പൽ എയർപോർട്ട്, മേരിലാൻഡിലെ മോണ്ട്‌ഗോമറി കൗണ്ടി എയർപാർക്ക്, നോർത്ത് കരോലൈനയിലെ ജോൺസ്റ്റൺ റീജിയണൽ എയർപോർട്ട്, കൊളറാഡോയിലെ ഡുറാംഗോ-ലാ പ്ലാറ്റ കൗണ്ടി എയർപോർട്ട് എന്നിവയാണ് അടുത്ത ഘട്ടത്തിൽ ഉൾപ്പെടുത്തിയിരിക്കുന്നത്.

ഓസ്ട്രിയ ആസ്ഥാനമായുള്ള Frequentis കമ്പനിയുടെ സാങ്കേതിക സംവിധാനമാണ് ഇതിനായി എഅഅ തിരഞ്ഞെടുത്തിരിക്കുന്നത്. ന്യൂജേഴ്‌സിയിലെ വില്യം ജെ. ഹ്യൂസ് ടെക്‌നിക്കൽ സെന്ററിലും മറ്റു കേന്ദ്രങ്ങളിലും വർഷങ്ങളായി നടത്തിയ പരിശോധനകൾക്കുശേഷമാണ് സാങ്കേതികവിദ്യയ്ക്ക് ആവശ്യമായ അംഗീകാരങ്ങൾ ലഭിച്ചത്.

അമേരിക്കയിലെ പഴയ വിമാനഗതാഗത നിയന്ത്രണ സംവിധാനങ്ങൾ ആധുനികവൽക്കരിക്കുന്ന വിപുലമായ പദ്ധതിയുടെ ഭാഗമായാണ് പുതിയ മാറ്റം. പതിറ്റാണ്ടുകൾ പഴക്കമുള്ള കമ്പ്യൂട്ടറുകളും ആശയവിനിമയ ഉപകരണങ്ങളും മാറ്റിസ്ഥാപിച്ച് കൂടുതൽ വിശ്വസനീയമായ ഡിജിറ്റൽ സംവിധാനങ്ങൾ സ്ഥാപിക്കുകയാണ് ലക്ഷ്യം.

2025ൽ കോൺഗ്രസ് അംഗീകരിച്ച 12.5 ബില്യൺ ഡോളറിന്റെ വിമാനഗതാഗത നിയന്ത്രണ ആധുനികവൽക്കരണ പദ്ധതിക്ക് പുറമേ കൂടുതൽ നിക്ഷേപവും ഫെഡറൽ സർക്കാർ പരിഗണിക്കുന്നുണ്ട്.

ഫ്‌ളോറിഡയിലെ ബാർട്ടോ വിമാനത്താവളത്തിൽ 2026 സെപ്തംബറിൽ തന്നെ ഡിജിറ്റൽ സംവിധാനം പ്രവർത്തനം ആരംഭിച്ചിരുന്നു. നവംബർ ആറിനാണ് ഫ്‌ളോറിഡയിലെയും അലാസ്‌കയിലെയും ആദ്യ സംവിധാനങ്ങൾ പ്രവർത്തനക്ഷമമായതായി എഅഅ ദേശീയതലത്തിൽ ഔദ്യോഗികമായി പ്രഖ്യാപിച്ചത്.

വിമാനത്താവളങ്ങളുടെ സുരക്ഷയും പ്രവർത്തനക്ഷമതയും വർധിപ്പിക്കുന്നതിൽ ഈ സാങ്കേതികവിദ്യയ്ക്ക് നിർണായക പങ്കുവഹിക്കാനാകുമെന്നാണ് അധികൃതരുടെ പ്രതീക്ഷ. അമേരിക്കയിലെ വിമാനഗതാഗത നിയന്ത്രണത്തിന്റെ ഭാവിയിൽ ഡിജിറ്റൽ ടവറുകൾ ഒരു പ്രധാന ചുവടുവയ്പായി മാറുകയാണ്.

അനിൽ മറ്റത്തിക്കുന്നേൽ

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്