കെ.എച്ച്.എൻ.എ കാലിഫോർണിയ ശുഭാരംഭം പ്രൗഢോജ്വലം

MARCH 27, 2025, 1:59 AM

ലോസ് ആഞ്ചലസ്: കേരളാ ഹിന്ദുസ് ഓഫ് നോർത്ത് അമേരിക്കയുടെ കാലിഫോർണിയ അംഗങ്ങൾ അണിയിച്ചൊരുക്കിയ ശുഭാരംഭം ജനപങ്കാളിത്തം കൊണ്ടും വൈവിധ്യമാർന്ന പരിപാടികൾ, സംഘടനാ മികവ് എന്നിവകൊണ്ടും പ്രൗഢഗംഭീരമായിരുന്നു. മാർച്ച് 22ന് സംഘാ വെസ്റ്റ് ഭാരത് സേവാശ്രമത്തിൽ പാഞ്ചജന്യം എന്ന പേരിൽ സംഘടിപ്പിച്ച ശുഭാരംഭം ദുർഗ്ഗാദേവിയുടെ സവിധത്തിൽ പൊങ്കാല അർപ്പണത്തോടെയാണ് ആരംഭിച്ചത്. ശേഷം നടന്ന പൊതുസമ്മേളനം കെ.എച്ച്.എൻ.എ പ്രസിഡന്റ് ഡോ. നിഷ പിള്ള, ജനറൽ സെക്രട്ടറി മധു ചെറിയേടത്ത് എന്നിവർ ഭദ്രദീപം കൊളുത്തിയതോടെ ആരംഭിച്ചു.

ദേവാംഗ് പ്രണബ് അതി മനോഹരമായി പ്രാർത്ഥനാ ശ്ലോകം ആലപിച്ചു. സദസ്സിനു ഏറ്റുചൊല്ലാൻ അവസരം നൽകിയതും പുതുമയായി. 2009ൽ ലോസ് ആഞ്ചലസിൽ നടന്ന കെ.എച്ച്.എൻ.എ കൺവെൻഷന്റെയും ലോസ് ആഞ്ചലസിൽ നടക്കുന്ന പ്രവർത്തനങ്ങളുടെയും വീഡിയോ പ്രസന്റഷനോടുകൂടിയാണ് സമ്മേളനം ആരംഭിച്ചത്. 2009ൽ വെറും മുപ്പത്തിമൂന്നു കുടുംബങ്ങൾ ആയിരുന്നു എങ്കിൽ ഇന്ന് ആയിരത്തിലധികം ഹിന്ദു കുടുംബങ്ങളാണ് അവിടെയുള്ളത് എന്നത് അഭിമാനപൂർവം വീഡിയോയിൽ സമർത്ഥിക്കുന്നു. ഒപ്പം അടുത്ത കൺവെൻഷന് ആതിഥ്യമരുളാൻ കാലിഫോർണിയ തയ്യാറെടുത്തുകഴിഞ്ഞു എന്ന പ്രഖ്യാപനംകൂടി നമ്മെ ബോധ്യപ്പെടുത്തുന്നു. 2009 കൺവെൻഷനുശേഷം നമ്മെ വിട്ടുപിരിഞ്ഞുപോയവരെ അനുസ്മരിച്ചു വീഡിയോ അവതരണം അവസാനിക്കുന്നു.

അശ്വമേധത്തിനുശേഷം(2023 ഹ്യൂസ്റ്റൻ കൺവെൻഷൻ) ഭഗവാൻ പ്രദർശിപ്പിച്ച തന്റെ വിരാട് സ്വരൂപത്തിനു സമാനം ഉജ്ജ്വലവും ഉത്കൃഷ്ടവുമായിരിക്കും ഈ വർഷം ആഗസ്റ്റിൽ അറ്റ്‌ലാന്റിക് സിറ്റിയിൽ നടക്കുന്ന കൺവെൻഷൻ എന്ന് ഉത്ഘാടനപ്രസംഗത്തിൽ പ്രസിഡന്റ് ഡോ. നിഷ പിള്ള പറഞ്ഞു. കെ.എച്ച്.എൻ.എയുടെ സിൽവർജൂബിലി കൺവെൻഷന്റെ പ്രത്യേകതകൾ വിവരിച്ച ഡോ. നിഷ പിള്ള അതിലേക്കു എല്ലാവരെയും ക്ഷണിക്കുകയും ചെയ്തു.

കെ.എച്ച്.എൻ.എയുടെ വളർച്ചയിൽ കാലിഫോർണിയയുടെ പ്രസക്തി ആർക്കും അവഗണിക്കാനാവില്ല എന്നും ന്യൂ ജേഴ്‌സിയിൽ നടക്കാൻ പോകുന്ന ചരിത്രത്തിൽ എന്നും ഓർമ്മിക്കുന്ന വിരാട് കൺവെൻഷൻ വിജയിപ്പിക്കാൻ ഏവരുടെയും സഹായസഹകരണങ്ങൾ ഉണ്ടാവണമെന്ന് തുടർന്ന് സംസാരിച്ച സെക്രട്ടറി മധു ചെറിയേടത്ത് അഭ്യർത്ഥിച്ചു.

ട്രസ്റ്റീ ബോർഡ് അംഗം ഗോപിനാഥക്കുറുപ്പ്, മുൻ പ്രസിഡന്റുമാരായ ജി.കെ. പിള്ള, ഡോ. രാംദാസ് പിള്ള, മുൻ കൺവെൻഷൻ ചെയർമാൻ രഞ്ജിത് പിള്ള എന്നിവരും സംസാരിച്ചു. കെ.എച്ച്.എൻ.എ മറ്റൊരു തലത്തിലേക്ക് ഉയർത്തുന്നതുൾപ്പടെ എല്ലാവരും ജാഗരൂകരായി പ്രവർത്തിക്കണമെന്നും ഒപ്പം ഉജ്വലമായ ഒരു ശുഭാരംഭം കാഴ്ചവെക്കാൻ കഴിഞ്ഞ കാലിഫോർണിയ അടുത്ത കൺവെൻഷന് വേദിയാകണമെന്നും നേതാക്കൾ ആവശ്യപ്പെട്ടു.

ആശംസകൾ അറിയിച്ച മുൻ ട്രസ്റ്റീ സെക്രട്ടറി പ്രൊഫ. ജയകൃഷ്ണൻ നായർ, ഈ ശുഭാരംഭത്തിനു ചാലക ശക്തിയായി പ്രവർത്തിച്ച ആതിര സുരേഷിന്റെ നേതൃത്വത്തിൽ 2026 -27ലെ കൺവെൻഷൻ കാലിഫോർണിയയിലേക്കു കൊണ്ടുവരുമെന്നും പ്രഖ്യാപിച്ചത് ജനം ഹർഷാരവത്തോടെ സ്വീകരിച്ചു.

വിജയലക്ഷ്മി അവതരിപ്പിച്ച മോഹിനിയാട്ടം, കലാപരിപാടികളിൽ അവതരിപ്പിക്കപ്പെട്ട ഭരതനാട്യവും കഥക്കും എല്ലാം മനോഹരമായിരുന്നു. കവിത മേനോൻ, രമ നായർ എന്നിവർ പൊങ്കാലയ്ക്ക് നേതൃത്വം നൽകി. തങ്കമണി ഹരികുമാർ, അഞ്ജു ശ്രീധരൻ, ശീതൾ അയ്യാത്തൻ, സുനിത ഗോപാലൻ, സജിത എന്നിവർ താലപ്പൊലിക്ക് നേതൃത്വം നൽകി.

ആതിര സുരേഷ്, രവി വള്ളത്തേരി, ഹരികുമാർ ഗോവിന്ദൻ, രാജൻ, ഓം (OHM) പ്രസിഡന്റ് സുരേഷ് ഇഞ്ചൂർ, സെക്രട്ടറി രഘു അരങ്ങാശ്ശേരി, ബാബ എന്നിവരാണ് പ്രധാനമായും ഉജ്ജ്വലമായ ഈ പരിപാടിയുടെ വിജയത്തിന് പിന്നിൽ പ്രവർത്തിച്ചത്.