വാഷിങ്ടണ്‍: അമേരിക്കന്‍ തൊഴില്‍ വിപണിയില്‍ പുതിയ നിയമനങ്ങളും പിരിച്ചുവിടലുകളും കുറഞ്ഞ മന്ദഗതി തുടരുമ്പോഴും രാജ്യത്തിന്റെ വിവിധ ഭാഗങ്ങളില്‍ പണപ്പെരുപ്പം വീണ്ടും ശക്തമാകുന്നതായി ഫെഡറല്‍ റിസര്‍വിന്റെ സാമ്പത്തിക സര്‍വേ റിപ്പോര്‍ട്ട്. ഇതോടെ ഈ മാസം അവസാനം ചേരുന്ന യോഗത്തില്‍ ബെഞ്ച്മാര്‍ക്ക് പലിശ നിരക്ക് വീണ്ടും വര്‍ധിപ്പിക്കാന്‍ കേന്ദ്ര ബാങ്ക് നിര്‍ബന്ധിതമായേക്കും. 12 റീജിയണല്‍ ബാങ്കുകളില്‍ നിന്നുള്ള വിവരങ്ങള്‍ ക്രോഡീകരിച്ച് തയ്യാറാക്കിയ ഫെഡറല്‍ റിസര്‍വിന്റെ ബീജ് ബുക്ക് റിപ്പോര്‍ട്ടിലാണ് സാമ്പത്തിക പ്രതിസന്ധിയുടെ വിശദാംശങ്ങളുള്ളത്.
യുഎസ്-ഇസ്രായേല്‍ യുദ്ധത്തിന്റെ പശ്ചാത്തലത്തില്‍ ഡീസല്‍ വിലയിലുണ്ടായ കുതിച്ചുചാട്ടമാണ് പണപ്പെരുപ്പ സമ്മര്‍ദ്ദം ശക്തമാക്കിയത്. ബീജ് ബുക്ക് റിപ്പോര്‍ട്ടില്‍ 21 തവണയാണ് ഉയര്‍ന്ന ഡീസല്‍ ചെലവുകളെക്കുറിച്ച് പരാമര്‍ശിച്ചിരിക്കുന്നത്. ഡീസല്‍ വിലവര്‍ധനവ് ചരക്കുനീക്കം, കൃഷി, വ്യോമയാനം തുടങ്ങിയ മേഖലകളെ നേരിട്ട് ബാധിക്കുകയും ബിസിനസ് ലാഭവിഹിതം കുറയ്ക്കുകയും ചെയ്തു. ഇതിനുപുറമെ മറ്റ് അസംസ്‌കൃത വസ്തുക്കളുടെ വിലവര്‍ധനവും ട്രംപ് ഭരണകൂടത്തിന്റെ താരിഫ് നയങ്ങളും ഇന്‍ഷുറന്‍സ് ചെലവുകളും തിരിച്ചടിയാകുന്നുണ്ട്. സെപ്റ്റംബറിലെ കണക്കനുസരിച്ച് ഉപഭോക്തൃ വിലസൂചിക 3.7 ശതമാനമായി ഉയര്‍ന്നത് ഫെഡറല്‍ റിസര്‍വിന്റെ 2 ശതമാനം ലക്ഷ്യത്തിനും മുകളിലാണ്.
തൊഴില്‍ വിപണിയില്‍ ആര്‍ട്ടിഫിഷ്യല്‍ ഇന്റലിജന്‍സ് ചെലുത്തുന്ന സ്വാധീനവും റിപ്പോര്‍ട്ടില്‍ വ്യക്തമാക്കുന്നുണ്ട്. എഐ സാങ്കേതികവിദ്യ നടപ്പിലാക്കിയതിലൂടെ ഉല്‍പ്പാദനക്ഷമത വര്‍ധിച്ചതായി ഷിക്കാഗോ ഫെഡിനോട് ഒരു ബിസിനസ് സേവന കമ്പനി വ്യക്തമാക്കി. അതേസമയം ഡാല്ലസിലെ ഒരു സ്റ്റാഫിംഗ് ഏജന്‍സി എഐ ഏജന്റുകള്‍ വഴി രണ്ടു ദിവസത്തിനുള്ളില്‍ 180 മണിക്കൂറിലധികം അഭിമുഖങ്ങള്‍ നടത്തുകയും അത് വിലയിരുത്താന്‍ കൂടുതല്‍ ജീവനക്കാരെ നിയമിക്കുകയും ചെയ്ത ഉദാഹരണം ചൂണ്ടിക്കാട്ടി.
ഉയര്‍ന്ന ബാങ്ക് പലിശ നിരക്കുകള്‍ മൂലം ഭവന വായ്പാ നിരക്കുകള്‍ 7.5 ശതമാനത്തിലേക്ക് ഉയര്‍ന്നത് റിയല്‍ എസ്റ്റേറ്റ് മേഖലയെ കടുത്ത പ്രതിസന്ധിയിലാക്കിയിട്ടുണ്ട്. പുതിയ വായ്പാ ചെലവുകള്‍ വര്‍ധിച്ചതോടെ ആളുകള്‍ വീട് വാങ്ങാന്‍ മടിക്കുന്നതും, കുറഞ്ഞ നിരക്കിലുള്ള പഴയ വായ്പകള്‍ നഷ്ടപ്പെടാതിരിക്കാന്‍ ഉടമകള്‍ വീടുകള്‍ വില്‍പ്പനയ്ക്ക് വെക്കാത്തതും വിപണിയെ മന്ദഗതിയിലാക്കി.
നവംബര്‍ 3-ന് നടക്കാനിരിക്കുന്ന യുഎസ് മിഡ് ടേം തിരഞ്ഞെടുപ്പില്‍ ട്രംപിന്റെ റിപ്പബ്ലിക്കന്‍ പാര്‍ട്ടിക്ക് ഈ വിലക്കയറ്റം വലിയ വെല്ലുവിളിയാകും. റോയിട്ടേഴ്‌സ്-ഇപ്‌സോസ് സര്‍വേ പ്രകാരം വോട്ടര്‍മാരെ അലട്ടുന്ന പ്രധാന വിഷയം ഉയര്‍ന്ന ജീവിതച്ചെലവാണ്. കൂടാതെ കാനഡയുമായുള്ള ട്രംപ് ഭരണകൂടത്തിന്റെ വ്യാപാര തര്‍ക്കങ്ങള്‍ ഉല്‍പ്പാദന മേഖലയെയും വിനോദസഞ്ചാരത്തെയും പ്രതികൂലമായി ബാധിച്ചതായി ഫെഡറല്‍ ബാങ്കുകള്‍ വ്യക്തമാക്കി. ഒക്ടോബര്‍ 27-28 തീയതികളില്‍ നടക്കുന്ന യോഗത്തില്‍ ഫെഡറല്‍ റിസര്‍വ് പലിശ നിരക്ക് വീണ്ടും ഉയര്‍ത്താന്‍ 37 ശതമാനം സാധ്യതയുള്ളതായാണ് വിപണി കണക്കുകൂട്ടുന്നത്.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
1-20261015023417.jpg)
1-20261015022403.jpg)
1-20261015021001.jpg)
1-20261015014724.jpg)
-20260320091758.webp)
