പുതിയ എച്ച്-1ബി വിസകൾക്ക് യുഎസ് ഏർപ്പെടുത്തിയ കടുത്ത നിയന്ത്രണങ്ങൾ അന്താരാഷ്ട്ര തലത്തിൽ ടെക് മേഖലയിൽ വലിയ ആശങ്കകൾ സൃഷ്ടിച്ചിരിക്കുകയാണ്. പുതിയ എച്ച്‌-1ബി വിസ അപേക്ഷകര്‍ ഒറ്റത്തവണ ഫീയായി ഒരുലക്ഷം ഡോളര്‍ അടയ്‌ക്കണം എന്നാണ്  ട്രംപിന്‍റെ ഉത്തരവ്. ടെക് പഠനത്തിനും ജോലിക്കുമായി യുഎസിലേക്ക് പറക്കേണ്ടിയിരുന്ന ആയിരക്കണക്കിന് ഇന്ത്യക്കാർ ഇതോടെ പ്രതിസന്ധിയിലാണ്. 

ട്രംപിന്റെ പുതിയ തീരുമാനം സ്ഥാനാർത്ഥികൾക്ക് മാത്രമല്ല, ടെക് കമ്പനികൾക്കും വലിയ ആശങ്കയുണ്ടാക്കിയിട്ടുണ്ട്. അമേരിക്കയെ ഇന്ന് കാണുന്ന ടെക് അധിപരായി  മാറ്റിയവരില്‍ ഏറെ പ്രമുഖര്‍ മുമ്പ് H-1B വിസയില്‍ അമേരിക്കയിലേക്ക് ചേക്കേറിയവരാണ്. അവരില്‍ ചിലരെ പരിചയപ്പെടാം.

സത്യ നാദെല്ല

ഇന്ത്യൻ വംശജയായ സത്യ നാദെല്ല, അമേരിക്കയിലെ ബിഗ് 6 ടെക് കമ്പനികളിൽ ഒന്നായ മൈക്രോസോഫ്റ്റിന്റെ ചീഫ് എക്സിക്യൂട്ടീവ് ഓഫീസറാണ്. ഹൈദരാബാദിൽ ജനിച്ച സത്യ നാദെല്ല തന്റെ എംഎസിനു പഠിക്കാൻ യുഎസിലെത്തി. സത്യ നാദെല്ല 1992 ൽ മൈക്രോസോഫ്റ്റിൽ ചേരുകയും 1994 ൽ എച്ച് -1 ബി വിസ നേടുകയും ചെയ്തു. നാദെല്ലയുടെ നേതൃത്വത്തിൽ മൈക്രോസോഫ്റ്റ് ക്ലൗഡ് കമ്പ്യൂട്ടിംഗിലും എഐയിലും ആഗോള ശക്തിയായി മാറി. മൈക്രോസോഫ്റ്റിനായി വിദേശികളെ നിയമിക്കുന്നതിൽ സത്യ നാദെല്ല വളരെ സന്തുഷ്ടനാണെന്ന് റിപ്പോർട്ടുകൾ പറയുന്നു.

ഇലോണ്‍ മസ്‌ക്

ടെസ്‌ല, സ്പേസ് എക്‌സ്, എക്‌സ് തുടങ്ങിയ വമ്പന്‍ കമ്പനികളുടെ അധിപനായ ഇലോണ്‍ മസ്‌ക് ആദ്യം യുഎസില്‍ ജെ-1 എക്‌സ്‌ചേഞ്ച് വിസിറ്റര്‍ വിസയുടെ ഉടമയായിരുന്നു. ഇതിന് ശേഷം അക്കാഡമിക് പരിശീലനത്തിനായി മസ്‌ക് എച്ച്‌-1ബി വിസയിലേക്ക് മാറി. അമേരിക്ക എച്ച്-1ബി വിസകൾ നിയന്ത്രിക്കാനുള്ള ശ്രമങ്ങളെ നിരന്തരം വിമര്‍ശിച്ചിട്ടുള്ളയാളാണ് ഇലോണ്‍ മസ്‌ക്. എച്ച്‌-1ബി വിസ നിയന്ത്രണം യുഎസിലേക്ക് പ്രതിഭകളുടെ പ്രവേശനം പരിമിതപ്പെടുത്തുമെന്നാണ് മസ്‌കിന്‍റെ വാദം. മാത്രമല്ല, തന്‍റെ കമ്പനികളില്‍ എച്ച്-1ബിയെയും മറ്റ് വർക്ക് വിസകളെയും ആശ്രയിക്കുന്ന നൂറുകണക്കിന് വിദേശ എഞ്ചിനീയർമാരെ നിയമിക്കുന്നുണ്ട് മസ്‌ക്.

രാജീവ് ജെയിൻ

ഫ്ലോറിഡ ആസ്ഥാനമായുള്ള 150 ബില്യൺ ഡോളറിലധികം പോർട്ട്‌ഫോളിയോയുള്ള ഒരു അസറ്റ് മാനേജ്‌മെന്റ് സ്ഥാപനമായ ജിക്യുജി പാർട്‌ണേഴ്‌സിന്റെ സഹസ്ഥാപകനും ചെയർമാനും ചീഫ് ഇൻവെസ്റ്റ്‌മെന്റ് ഓഫീസറുമാണ് രാജീവ് ജെയിൻ. 1990 കളുടെ തുടക്കത്തിൽ മിയാമി സർവകലാശാലയിൽ എംബിഎ പഠിക്കാൻ വേണ്ടിയാണ് രാജീവ് ജെയിൻ ഇന്ത്യയിൽ നിന്ന് യുഎസിലെത്തിയത്. ആ സമയത്ത് അദ്ദേഹം എച്ച്-1ബി വിസയ്ക്കും അപേക്ഷിച്ചു. സാമ്പത്തിക, സാങ്കേതിക മേഖലകളിലെ വിദേശ പ്രതിഭകളെ യുഎസിലേക്ക് ആകർഷിക്കുന്നതിനുള്ള ശക്തമായ വക്താവാണ് അദ്ദേഹം.

ആൻഡ്രൂ എൻജി

Coursera-യുടെ സഹസ്ഥാപകനാണ് ബ്രിട്ടീഷ്- അമേരിക്കൻ കമ്പ്യൂട്ടർ ശാസ്ത്രജ്ഞനും മെഷീൻ ലേണിംഗ്, ആർട്ടിഫിഷ്യൽ ഇന്‍റലിജന്‍സ് ഗവേഷകനുമായ ആൻഡ്രൂ യാൻ-തക് എൻജി. ഗൂഗിൾ ബ്രെയിനിന്‍റെ സഹസ്ഥാപകനും തലവനുമായിരുന്നു എൻജി. 1993ല്‍ അമേരിക്കയില്‍ എഫ്-1 വിസയിലാണ് ആൻഡ്രൂ എൻജി എത്തിയത്. ഇതിന് ശേഷം സ്റ്റാൻഫോർഡ് സർവ്വകലാശാലയില്‍ ജോലി ചെയ്യവേ എച്ച്-1ബി വിസയിലേക്ക് മാറി. എഐ, ഡീപ് ലേണിംഗ് രംഗത്തെ അതികായനായ അധ്യാപകനായി എൻജി അറിയപ്പെടുന്നു.

എറിക് എസ് യുവാൻ

എട്ട് തവണ തള്ളിയ ശേഷം 1997ല്‍ എച്ച്-1ബി വിസ ലഭിച്ചയാളാണ് വിഖ്യാതമായ സൂം വീഡിയോ കോണ്‍ഫറന്‍സ് പ്ലാറ്റ്‌ഫോമിന്‍റെ സ്ഥാപകനും സിഇഒയുമായ എറിക് എസ് യുവാൻ. ചൈനയില്‍ ജനിച്ച യുവാന്‍, ബില്‍ ഗേറ്റ്‌സില്‍ നിന്ന് പ്രചോദനം ഉള്‍ക്കൊണ്ട് പിന്നീട് അമേരിക്കയിലേക്ക് കുടിയേറുകയായിരുന്നു.

ജ്യോതി ബൻസാൽ

ആപ്പ്ഡൈനാമിക്സിന്റെ സ്ഥാപകയായ ജ്യോതി ബൻസാൽ മറ്റൊരു പ്രമുഖ എച്ച്-1ബി വിസ ഉടമയാണ്. രാജസ്ഥാനിൽ ജനിച്ച ബൻസാൽ, ഐഐടി ഡൽഹിയിലെ പഠനത്തിന് ശേഷം സിലിക്കൺ വാലിയിലേക്ക് താമസം മാറി. 2008 ൽ ജ്യോതി ബൻസാൽ ആപ്പ്ഡൈനാമിക്സ് എന്ന ആപ്ലിക്കേഷൻ പെർഫോമൻസ് മാനേജ്മെന്റ് കമ്പനി സ്ഥാപിച്ചു. കമ്പനി ഇപ്പോൾ സിസ്കോ സിസ്റ്റംസിന്റെ ഉടമസ്ഥതയിലാണ്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്