10 മിനിറ്റില്‍ ഒരു ഹ്യൂമനോയിഡ്! റോബോട്ടുകള്‍ തന്നെ റോബോട്ടുകളെ നിര്‍മിക്കുന്ന വിപ്ലവകരമായ ഫാക്ടറിയുമായി യുബോടെക് റോബോട്ടിക്സ്

SEPTEMBER 17, 2026, 5:57 AM

സാങ്കേതികവിദ്യയില്‍ ലോകത്തെ അമ്പരപ്പിക്കുന്ന മുന്നേറ്റവുമായി ചൈനീസ് കമ്പനിയായ യുബോടെക് റോബോട്ടിക്‌സ്. വന്‍തോതില്‍ ഹ്യൂമനോയിഡ് റോബോട്ടുകളെ നിര്‍മിക്കാന്‍ ശേഷിയുള്ള അത്യാധുനിക ഫാക്ടറി ചൈനയിലെ ഗുവാങ്ക്‌സി ഷുവാങ് സ്വയംഭരണ മേഖലയിലുള്ള ലിഷൗവില്‍ പ്രവര്‍ത്തനം ആരംഭിച്ചു. മനുഷ്യശ്രമത്തിന് പകരം റോബോട്ടുകള്‍ തന്നെ നിര്‍മാണ ജോലികള്‍ പൂര്‍ണ്ണമായും ഏറ്റെടുക്കുന്നു എന്നതാണ് ഈ അത്യാധുനിക നിര്‍മാണ കേന്ദ്രത്തിന്റെ പ്രധാന സവിശേഷത.

കേവലം 10 മിനിറ്റിനുള്ളില്‍ ഒരു ഇന്‍ഡസ്ട്രിയല്‍ ഹ്യൂമനോയിഡ് റോബോട്ടിനെ നിര്‍മിച്ചെടുക്കാന്‍ ഈ സംവിധാനത്തിന് സാധിക്കുന്നു. സീമന്‍സ് ഡിജിറ്റല്‍ ഇന്‍ഡസ്ട്രീസ് സോഫ്റ്റ്‌വേയറുമായി സഹകരിച്ചാണ് യുബോടെക് ഈ പ്ലാന്റ് സാക്ഷാത്കരിച്ചത്. 14,000 ചതുരശ്രമീറ്റര്‍ വിസ്തീര്‍ണവും 13.8 മീറ്റര്‍ ഉയരവുമുള്ള ഈ കൂറ്റന്‍ പ്ലാന്റിന് പ്രതിവര്‍ഷം 10,000 റോബോട്ടുകള്‍ നിര്‍മിക്കാനുള്ള ശേഷിയുണ്ട്. കമ്പനിയുടെ ഫ്‌ലാഗ്ഷിപ്പ് മോഡലുകളായ വോക്കര്‍ എസ്, ക്രൂസര്‍ സീരീസിലുള്ള വ്യാവസായിക റോബോട്ടുകളാണ് ഇവിടെ പ്രധാനമായും ഉല്‍പ്പാദിപ്പിക്കുന്നത്.

സ്മാര്‍ട്ട് ബ്രെയിന്‍ എന്ന ഡിജിറ്റല്‍ കണ്‍ട്രോള്‍ സിസ്റ്റമാണ് റോബോട്ടുകളുടെ ഉത്പാദനം മുതല്‍ കൃത്യമായ ഗുണനിലവാര പരിശോധന വരെയുള്ള മുഴുവന്‍ പ്രവര്‍ത്തനങ്ങളും ഏകോപിപ്പിക്കുന്നത്. നിര്‍മാണ ഘട്ടത്തിലെ സുതാര്യതയ്ക്കും ട്രാക്കിംഗിനുമായി നിര്‍മിക്കപ്പെടുന്ന ഓരോ റോബോട്ടിനും പ്രത്യേക സീരിയല്‍ നമ്പറും നല്‍കിവരുന്നു. റോബോട്ട് നിര്‍മാണത്തിന് ആവശ്യമായ അസംസ്‌കൃത വസ്തുക്കള്‍ അണ്‍ലോഡ് ചെയ്യാനും കൃത്യമായി അടുക്കിവെക്കാനും ഉല്‍പ്പന്ന നിരയിലേക്ക് മാറ്റാനും ക്രൂസര്‍ വൈ1, ക്രൂസര്‍ എസ്2 എന്നീ മോഡലുകളെയാണ് ചുമതലപ്പെടുത്തിയിരിക്കുന്നത്. ഇവയ്ക്ക് പുറമെ കൊളാബറേറ്റീവ് റോബോട്ടിക് ആമുകള്‍, ഡ്രൈവറില്ലാ ലോജിസ്റ്റിക്‌സ് വാഹനങ്ങള്‍, റൊട്ടേറ്റിംഗ് വര്‍ക്ക് ടേബിളുകള്‍ എന്നിവയും നിര്‍മാണപ്രക്രിയ സുഗമമാക്കുന്നു.

നിര്‍മാണം പൂര്‍ത്തിയാകുന്ന ഓരോ റോബോട്ടും നാലുമണിക്കൂറിലേറെ നീളുന്ന പരിശോധനകള്‍ക്കും 360 ഡിഗ്രി വിഷ്വല്‍ ഇന്‍സ്‌പെക്ഷനും വിധേയമായ ശേഷമാണ് പുറത്തിറങ്ങുന്നത്. ഡ്രൈവറില്ലാത്ത ഫോര്‍ക്ക്‌ലിഫ്റ്റുകളുടെ സഹായത്തോടെ പൂര്‍ത്തിയായ ഉല്‍പ്പന്നങ്ങള്‍ 65 ചതുരശ്രമീറ്റര്‍ വിസ്തൃതിയുള്ള ഓട്ടോമേറ്റഡ് വെയര്‍ഹൗസിലേക്ക് മാറ്റുന്നു. ഒരേസമയം 112 ഹ്യൂമനോയിഡ് റോബോട്ടുകളെ വരെ സൂക്ഷിക്കാന്‍ ശേഷിയുള്ള ഈ വെയര്‍ഹൗസ് വ്യവസായ ലോകത്ത് ഒരു പുതിയ ചരിത്രം കുറിക്കുകയാണ്.

English summary

UBTECH Robotics has introduced a revolutionary, fully automated factory in Liuzhou, Guangxi, China, capable of producing an industrial humanoid robot every 10 minutes. Built in partnership with Siemens Digital Industries Software, the 14,000-square-meter facility utilizes advanced robotics—including Cruzr Y1 and Cruzr S2 models, collaborative arms, and driverless logistics vehicles—to handle the entire manufacturing workflow without human labor. Guided by an AI system called "Smart Brain," the plant mainly produces UBTECH's Walker S and Cruzr series with an annual capacity of 10,000 units, subjecting each freshly assembled robot to rigorous 360-degree visual inspections and over four hours of quality testing before storage in an automated warehouse.