നെയ്മർ ഇനി എങ്ങോട്ട്? സാന്റോസിലേക്ക് സ്വാഗതം ചെയ്ത് പ്രസിഡന്റ്

JANUARY 29, 2025, 4:43 AM

ബ്രസീലിയൻ സൂപ്പർ താരം നെയ്മറുമായുള്ള കരാർ റദ്ദാക്കി സൌദി പ്രോ ലീഗ് ക്ലബ് അല്‍ ഹിലാല്‍. ഏഴ് മത്സരങ്ങളില്‍ നിന്ന് 800 കോടി രൂപയാണ് നെയ്മറിന് അല്‍ ഹിലാല്‍ നല്‍കിയത്.

ഇതോടെ, ഓരോ മത്സരത്തിനും അൽ ഹിലാൽ നെയ്മറിന് 116 കോടി രൂപ നൽകി. ഇതോടെ, നെയ്മറിന്റെ ട്രാൻസ്ഫർ ഫീസും ഒരു വർഷത്തെ ശമ്പളവും കൂടി ചേരുമ്പോൾ, ഐപിഎൽ ടീം ചെന്നൈ സൂപ്പർ കിംഗ്സിന്റെ ബ്രാൻഡ് മൂല്യത്തേക്കാൾ മുകളിലാണ്.

നെയ്മർ തന്റെ പഴയ ക്ലബ്ബായ സാന്റോസിലേക്ക് മടങ്ങാനുള്ള എല്ലാ സാധ്യതകളും തെളിഞ്ഞു. സാന്റോസിലേക്ക് മടങ്ങുമെന്ന് നെയ്മർ സ്ഥിരീകരിച്ചിട്ടില്ല. എന്നാൽ സാന്റോസ് ക്ലബ് പ്രസിഡന്റ് നെയ്മറിനോട് ഒരു സന്ദേശവുമായി എത്തി.

"നെയ്മർ, സമയം വന്നിരിക്കുന്നു. നിങ്ങളുടെ ജനങ്ങളിലേക്ക് മടങ്ങേണ്ട സമയമാണിത്. നിങ്ങളുടെ വീട്ടിലേക്ക്, നിങ്ങളുടെ പ്രിയപ്പെട്ട ക്ലബ്ബിലേക്ക്," സാന്റോസ് ക്ലബ് പ്രസിഡന്റ് നെയ്മറിനോട് പറഞ്ഞു. "നെയ് ബോയ്, തിരികെ സ്വാഗതം! തിരിച്ചുവന്ന് ഈ പവിത്രമായ ജേഴ്‌സി വീണ്ടും ധരിക്കുക. സാന്റോസ് സാമ്രാജ്യം നിങ്ങൾക്കായി തുറന്ന കൈകളോടെ കാത്തിരിക്കുന്നു." സാന്റോസ് ക്ലബ് പ്രസിഡന്റ് എഴുതി.

റിയാദില്‍ 18 മാസമാണ് അല്‍ ഹിലാലില്‍ നെയ്മർ ചിലവഴിച്ചത്. എന്നാല്‍ ഏഴ് മത്സരം മാത്രമാണ് താരത്തിന് കളിക്കാനായത്. പരുക്കിനെ തുടർന്ന് ഭൂരിഭാഗം മത്സരങ്ങളും നെയ്മറിന് നഷ്ടമായി. 104 മില്യണ്‍ ഡോളറായിരുന്നു പ്രതിവർഷം നെയ്മറിന്റെ അല്‍ ഹിലാലിലെ പ്രതിഫലം.

ബ്രസീലിയൻ ക്ലബ്ബായ സാന്റോസിലൂടെയാണ് നെയ്മർ യൂറോപ്യൻ ക്ലബ്ബുകളുടെ ശ്രദ്ധ പിടിച്ചുപറ്റിയത്. സാന്റോസിനായി 225 മത്സരങ്ങളിൽ നിന്ന് നെയ്മർ 136 ഗോളുകൾ നേടി. 2013ല്‍ നെയ്മർ ബാഴ്സയിലേക്ക് എത്തി. ബാഴ്സയ്ക്കൊപ്പം രണ്ട് വർഷം ചാംപ്യൻസ് ട്രോഫി കിരീടത്തിലേക്കും നെയ്മർ എത്തി. മെസിക്കും സുവാരസിനും ഒപ്പം ചേർന്ന് നെയ്മർ യൂറോപ്പിലെ ഏറ്റവും മികച്ച മുന്നേറ്റ നിര സഖ്യം ബാഴ്സയില്‍ സൃഷ്ടിച്ചു.

2017ല്‍ ലോക റെക്കോർഡ് ട്രാൻസ്ഫർ തുകയ്ക്കാണ് നെയ്മറിനെ ബാഴ്സയില്‍ നിന്ന് പിഎസ്ജി തട്ടിയെടുക്കുന്നത്. 220 മില്യണ്‍ യൂറോയായിരുന്നു ട്രാൻസ്ഫർ തുക. എന്നാല്‍ എംബാപ്പെയ്ക്ക് ഒപ്പം നെയ്മറിന് പിഎസ്ജിയില്‍ അസ്വാരസ്യങ്ങള്‍ ഉണ്ടായിരുന്നു എന്ന റിപ്പോർട്ടുകള്‍ ശക്തമായിരുന്നു. നെയ്മർ, എംബാപ്പെ, മെസി സഖ്യം ഉണ്ടായിട്ടും ചാംപ്യൻസ് ട്രോഫി കിരീടം എന്ന നേട്ടത്തിലേക്ക് എത്താൻ പിഎസ്ജിക്ക് സാധിച്ചില്ല.