നാട്ടിൽ ടെസ്റ്റ് ജയിക്കാൻ കഴിയുന്നില്ലെന്ന പരാതി തീർക്കാൻ സ്പിൻ പിച്ചുകളൊരുക്കി എതിരാളികളെ വീഴ്ത്തുന്ന പാകിസ്ഥാന് ഇത്തവണ അടിതെറ്റി. വെസ്റ്റ് ഇൻഡീസിനെതിരായ രണ്ടാം ക്രിക്കറ്റ് ടെസ്റ്റിൽ 120 റൺസിന് തോറ്റ പാകിസ്ഥാന് പരമ്പര നേട്ടമെന്ന സ്വപ്നം കൈവിട്ടു. രണ്ട് മത്സര പരമ്പരയിലെ ഓരോ മത്സരം വീതം ജയിച്ച പാകിസ്ഥാനും വിൻഡീസും സമനിലയിൽ പിരിഞ്ഞു. മൂന്നാം ദിനം വിൻഡീസ് ഉയർത്തിയ 253 റൺസ് വിജയലക്ഷ്യത്തിലേക്ക് 764 എന്ന സ്‌കോറിൽ ക്രീസിലിറങ്ങിയ പാകിസ്ഥാൻ 133 റൺസിന് ഓൾ ഔട്ടായി. സ്‌കോർ വെസ്റ്റ് ഇൻഡീസ് 163, 244, പാകിസ്ഥാൻ 154, 133.

34 വർഷത്തിനുശേഷമാണ് വെസ്റ്റ് ഇൻഡീസ് പാകിസ്ഥാനിൽ ഒരു ടെസ്റ്റ് ജയിക്കുന്നത്. 1990 നവംബറിൽ ഫൈസലാബാദിലായിരുന്നു അവസാനം വെസ്റ്റ് ഇൻഡീസ് പാകിസ്ഥാനെതിരെ ജയിച്ചത്. അഞ്ച് വിക്കറ്റ് വീഴ്ത്തിയ ജോമെൽ വാറിക്കനും മൂന്ന് വിക്കറ്റെടുത്ത കെവിൻ സിംഗ്ലയറും രണ്ട് വിക്കറ്റെടുത്ത ഗുകേഷ് മോടിയും ചേർന്നാണ് പാകിസ്ഥാനെ കറക്കി വീഴ്ത്തിയത്. 31 റൺസെടുത്ത ബാബർ അസമാണ് പാകിസ്ഥാന്റെ ടോപ് സ്‌കോറർ. കമ്രാൻ ഗുലാം(19), മുഹമ്മദ് റിസ്‌വാൻ(25), സൗദ് ഷക്കീൽ(13), ആഗ സൽമാൻ(15) എന്നിവർ മാത്രമാണ് പാക് രണ്ടാം ഇന്നിംഗ്‌സിൽ രണ്ടക്കം കടന്നത്.

764 എന്ന സ്‌കോറിൽ ക്രീസിലിറങ്ങിയ പാകിസ്ഥാന് മൂന്നാം ദിനം ഒരു റൺ പോലും കൂട്ടിച്ചേർക്കുന്നതിന് മുമ്പ് സൗദ് ഷക്കീലിനെയും കാഷിഫ് അലിയെയും നഷ്ടമായിരുന്നു. ഇതോടെ 76/6ലേക്ക് കൂപ്പുകുത്തിയ പാകിസ്ഥാനെ മുഹമ്മദ് റിസ്‌വാനും ആഗ സൽമാനും ചേർന്ന് 100 കടത്തി പ്രതീക്ഷ നൽകിയെങ്കിലും ആഗ സൽമാനെ വിക്കറ്റിന് മുമ്പിൽ കുടുക്കിയ വാറിക്കൻ കൂട്ടുകെട്ട് പൊളിച്ചതോടെ പാകിസ്ഥാൻ വീണ്ടും തകർന്നടിഞ്ഞു. പൊരുതി നോക്കിയ റിസ്‌വാനെയും വാറിക്കൻ ബൗൾഡാക്കി. പിന്നാലെ പാക് വാലറ്റത്തെ മടക്കി വാറിക്കനും മോടിയും ചേർന്ന് വിൻഡീസിന് ഐതിഹാസിക വിജയം സമ്മാനിച്ചു.

2024ൽ ഓസ്‌ട്രേലിയക്കെതിരായ ടെസ്റ്റ് പരമ്പര 1 -1 സമനിലയാക്കി തുടങ്ങിയ വെസ്റ്റ് ഇൻഡീസ് 2025ൽ പാകിസ്ഥാനെതിരെ ടെസ്റ്റ് പരമ്പര 1 -1 സമനിലയാക്കിയാണ് തുടങ്ങിയത്. പരമ്പരയിലെ ആദ്യ മത്സരം പാകിസ്ഥാൻ 127 റൺസിന് ജയിച്ചിരുന്നു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്