താനെയിലെ വൃദ്ധസദനത്തിൽ വിനോദ് കാംബ്ലി; ആരോഗ്യനിലയിൽ ആരാധകർക്ക് ആശങ്ക

SEPTEMBER 26, 2026, 11:01 PM

ഇന്ത്യൻ മുൻ ക്രിക്കറ്റ് താരം വിനോദ് കാംബ്ലിയുടെ താനെയിലെ വയോജന പരിപാലന കേന്ദ്രത്തിൽ നിന്നുള്ള വിഡിയോ ദൃശ്യങ്ങൾ പുറത്തുവന്നതോടെ കടുത്ത ആശങ്കയിലാണ് ക്രിക്കറ്റ് ആരാധകർ. കടുത്ത ആരോഗ്യപ്രശ്നങ്ങളോട് പോരാടുന്ന കാംബ്ലിക്ക് വിഡിയോയിൽ സംസാരിക്കാൻ പോലും ഇടറുന്നതും കൈകൾ വിറയ്ക്കുന്നതും കാണാം.

താനെയിലെ 'നിദാൻ സെന്റർ ഫോർ എൽഡർലി കെയർ' എന്ന കേന്ദ്രത്തിൽ നിലവിൽ ചികിത്സയിലാണ് അദ്ദേഹം. അവിടെയുള്ള ആളുകൾ പകർത്തിയ വിഡിയോയിൽ, താൻ ഇവിടെ സുരക്ഷിതനാണെന്നും മികച്ച സൗകര്യങ്ങളും സ്നേഹവുമാണ് ലഭിക്കുന്നതെന്നും വീടിന് പുറത്താണെന്ന് തോന്നുന്നില്ലെന്നും കാംബ്ലി വ്യക്തമാക്കുന്നുണ്ട്.

സച്ചിൻ തെണ്ടുൽക്കറുടെ ബാല്യകാല സുഹൃത്തും ഇന്ത്യൻ ക്രിക്കറ്റിലെ അപൂർവ്വ പ്രതിഭയുമായിരുന്ന വിനോദ് കാംബ്ലിയെ അന്താരാഷ്ട്ര കരിയറിന് ശേഷം കടുത്ത സാമ്പത്തിക പ്രതിസന്ധിയും ആരോഗ്യപ്രശ്നങ്ങളുമാണ് അലട്ടിയത്.

2013-ൽ കടുത്ത ഹൃദയാഘാതം നേരിട്ട അദ്ദേഹത്തിന് പിന്നീട് തലച്ചോറിൽ രക്തം കട്ടപിടിക്കുന്നതടക്കമുള്ള സങ്കീർണ്ണമായ ആരോഗ്യപ്രശ്നങ്ങൾ നേരിടേണ്ടി വന്നു. അടുത്തിടെ തെരുവിൽ നടക്കാൻ കഴിയാതെ വീഴാൻ പോയ കാംബ്ലിയെ വഴിയാത്രക്കാർ പിടിച്ചെഴുന്നേൽപ്പിക്കുന്ന വിഡിയോയും സമൂഹമാധ്യമങ്ങളിൽ വലിയ ചർച്ചയായിരുന്നു.

കാംബ്ലിക്ക് ആവശ്യമായ അടിയന്തര വൈദ്യസഹായവും സാമ്പത്തിക പിന്തുണയും നൽകാൻ ബി.സി.സി.ഐയും പ്രമുഖ താരങ്ങളും മുന്നോട്ടുവരണമെന്നാണ് ആരാധകരുടെ ആവശ്യം. ഒൻപത് വർഷം നീണ്ടുനിന്ന അന്താരാഷ്ട്ര കരിയറിൽ ഇന്ത്യക്കായി 104 ഏകദിനങ്ങളും 17 ടെസ്റ്റുകളും കളിച്ച കാംബ്ലി, തുടർച്ചയായ ടെസ്റ്റുകളിൽ ഡബിൾ സെഞ്ചുറി നേടുന്ന ആദ്യ ഇന്ത്യൻ താരമെന്ന അപൂർവ്വ നേട്ടത്തിനും ഉടമയാണ്. എന്നാൽ വ്യക്തിജീവിതത്തിലെ അച്ചടക്കമില്ലായ്മയും മദ്യപാനവും അദ്ദേഹത്തിന്റെ ഉജ്ജ്വലമായ ക്രിക്കറ്റ് കരിയറിന് അന്ത്യം കുറിക്കുകയായിരുന്നു.