'പുരുഷ ആക്ഷൻ സിനിമകൾ ആഘോഷിക്കപ്പെടുന്നു, സ്ത്രീകൾക്ക് ആ ആനുകൂല്യമില്ല'; തപ്സി പന്നു

SEPTEMBER 1, 2026, 10:59 PM

നടി തപ്സി പന്നു പ്രധാന വേഷത്തിലെത്തുന്ന ഏറ്റവും പുതിയ ആക്ഷൻ ചിത്രമാണ് 'ഗാന്ധാരി'. സെപ്റ്റംബർ 3-ന് നെറ്റ്ഫ്ലിക്സിലൂടെ റിലീസ് ചെയ്യുന്ന ചിത്രത്തിന്റെ വിശേഷങ്ങൾ പങ്കുവെക്കുന്നതിനിടെ ബോളിവുഡിലെ പുരുഷ-സ്ത്രീ കേന്ദ്രീകൃത ആക്ഷൻ സിനിമകളോടുള്ള സമീപനത്തെയും പ്രേക്ഷകരുടെയും നിർമ്മാതാക്കളുടെയും ഇരട്ടത്താപ്പിനെയും താരം തുറന്ന് സംസാരിച്ചു.

സ്ത്രീകൾ പ്രധാന വേഷത്തിലെത്തുന്ന ആക്ഷൻ ചിത്രങ്ങൾക്ക് ബോളിവുഡിൽ തിയേറ്ററുകളിൽ ബജറ്റ് ലഭിക്കാൻ വലിയ ബുദ്ധിമുട്ടാണെന്ന് തപ്സി വ്യക്തമാക്കുന്നു. "ആക്ഷൻ ചിത്രങ്ങൾ നിർമ്മിക്കാൻ വലിയ തുക ആവശ്യമാണ്. എന്നാൽ നായിക കേന്ദ്രീകൃത സിനിമകൾക്ക് ആളുകൾ പണം മുടക്കാൻ തയ്യാറാകുന്നില്ല. കാരണം ഇത്തരം സിനിമകൾ തിയേറ്ററിൽ കാണാൻ പ്രേക്ഷകർ താല്പര്യം കാണിക്കാറില്ല എന്നത് തെളിയിക്കപ്പെട്ട വസ്തുതയാണ്," എന്ന് തപ്സി പറഞ്ഞു.

"പേരുകൾ എടുത്തു പറയാൻ ഞാൻ ആഗ്രഹിക്കുന്നില്ല, എങ്കിലും അടുത്തകാലത്ത് ഇറങ്ങിയ പല പുരുഷ കേന്ദ്രീകൃത ആക്ഷൻ ചിത്രങ്ങളും പരിശോധിച്ചാൽ സാധാരണ കഥയും, പ്രവചിക്കാവുന്ന പ്ലോട്ടും മാത്രമേ കാണാനാകൂ. എന്നാൽ ആളുകൾ അതിനെ വിജയിപ്പിക്കും.

അതേസമയം നായികമാർ ഇത്തരം സിനിമകൾ ചെയ്യുമ്പോൾ കഥയിലും അഭിനയത്തിലും ചെറിയൊരു തെറ്റുപറ്റിയാൽ പോലും പ്രേക്ഷകർ വിമർശിക്കും. ഇവിടെ സ്ത്രീകൾക്ക് തെറ്റുപറ്റാൻ അവസരമില്ല. എല്ലാം തികഞ്ഞതാണെങ്കിൽ മാത്രമേ സ്വീകരിക്കപ്പെടൂ," തപ്സി കൂട്ടിച്ചേർത്തു.

ഇശ്വാക് സിംഗ്, ഛായാ കദം, മിതാ വസിഷ്ട് എന്നിവർ അണിനിരക്കുന്ന 'ഗാന്ധാരി' തിയേറ്റർ കളക്ഷൻ സമ്മർദ്ദങ്ങളില്ലാതെ ഒ.ടി.ടി പ്ലാറ്റ്‌ഫോമിൽ എത്തിക്കാൻ സാധിച്ചതിൽ സന്തോഷമുണ്ടെന്നും താരം വ്യക്തമാക്കി.