സ്വകാര്യത മാനിക്കണം; ചന്തുവിന്റെ പ്രതികരണത്തെ പിന്തുണച്ച് ലാൽ ജോസ്

JUNE 8, 2026, 7:32 AM

കൊച്ചി: നടൻ സലിം കുമാറിന്റെ അന്ത്യകർമ ചടങ്ങുകൾക്കിടെ മകൻ ചന്തു വൈകാരികമായി പ്രതികരിച്ച സംഭവത്തിൽ പിന്തുണയുമായി സംവിധായകൻ ലാൽ ജോസ്. ചടങ്ങിനിടെ ഉണ്ടായ സാഹചര്യം ദുഃഖകരമാണെന്നും വ്യക്തിപരമായ ഇടം മാനിക്കുന്നതിൽ കൂടുതൽ ഉത്തരവാദിത്തം കാണിക്കേണ്ടതുണ്ടെന്നും അദ്ദേഹം പറഞ്ഞു.

യുഎഇയിൽ മാധ്യമങ്ങളോട് സംസാരിക്കവെയാണ് ലാൽ ജോസ് വിഷയത്തിൽ പ്രതികരിച്ചത്. ചന്തുവിന് അത്തരത്തിൽ പ്രതികരിക്കേണ്ടി വന്ന സാഹചര്യം സങ്കടകരമാണെന്ന് പറഞ്ഞ അദ്ദേഹം, എല്ലാവർക്കും സ്വകാര്യതയും വ്യക്തിപരമായ ഇടവും ഉണ്ടെന്ന് ചൂണ്ടിക്കാട്ടി.

മൊബൈൽ ഫോണുമായി എവിടെയും കടന്നുകയറി ചിത്രീകരിക്കുന്ന പ്രവണത വർധിച്ചുവരികയാണെന്നും അതിന് നിയന്ത്രണം ആവശ്യമാണ് എന്നും ലാൽ ജോസ് അഭിപ്രായപ്പെട്ടു. പൊതുപ്രവർത്തകരുടേയും കലാകാരൻമാരുടേയും സ്വകാര്യ ജീവിതത്തിലേക്കുള്ള അതിരുവിട്ട ഇടപെടലുകൾ ആശങ്കാജനകമാണെന്നും അദ്ദേഹം പറഞ്ഞു.