പുള്ളിമാനെ വേട്ടയാടി, പാചകത്തിനിടെ പൊലീസെത്തി

MAY 30, 2025, 8:38 PM

സുൽത്താൻബത്തേരി: വനത്തിൽ നിന്ന് ജനവാസ പ്രദേശത്ത് എത്തിയ പുള്ളിമാനിനെ വേട്ടയാടി ഇറച്ചിയാക്കിയ നാല് പേരെ വനംവകുപ്പ് ഉദ്യോഗസ്ഥർ പിടികൂടി.

മുക്കുത്തികുന്ന് പുളിക്കചാലിൽ പി എസ് സുനിൽ (59), തടത്തിൽചാലിൽ ടി എസ് സന്തോഷ്( 56), പുത്തൂർകൊല്ലി പി കെ രാധാകൃഷ്ണൻ (48), വാളംവയൽ ബി എം ശിവരാമൻ (62) എന്നിവരാണ് മാനിറച്ചി പാകം ചെയ്യുന്നതിനിടെ പിടിയിലായത്.

വയനാട് വന്യജീവിസങ്കേതത്തിൽ ഉൾപ്പെട്ട നൂൽപ്പുഴ മുക്കുത്തിക്കുന്ന് പ്രദേശത്താണ് സംഭവം.മുക്കുത്തിക്കുന്ന് വനത്തോട് ചേർന്ന് കിടക്കുന്ന പ്രദേശമാണ്.

സമീപത്തെ തോട്ടത്തിലേക്ക് എത്തിയ മാനിനെ നായ്ക്കൾ ഓടിച്ചു കൊണ്ടുവരികയായിരുന്നു. ഇത് പരിക്കേറ്റതിനാൽ ജനവാസ പ്രദേശത്ത് തന്നെ തങ്ങുകയും ഇതറിഞ്ഞ നാൽവർ സംഘമെത്തി മാനിനെ പിടികൂടുകയുമായിരുന്നു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

സുനിലിൻറെ വീട്ടിൽവെച്ച് മാനിറച്ചി കറിവെക്കുന്ന സമയത്ത് വനംവകുപ്പ് ഉദ്യോഗസ്ഥർക്ക് രഹസ്യവിവരം ലഭിക്കുകയായിരുന്നു. ഇതിന്റെ അടിസ്ഥാനത്തിൽ വെള്ളിയാഴ്ച്ച ഉച്ചയോടെയാണ് നാലുപേരും പിടിയിലായത്. കറിവെച്ച വീട്ടിൽ നിന്ന് തന്നെ പാചകം ചെയ്ത് ഇറച്ചിക്ക് പുറമെ ബക്കറ്റിൽ സൂക്ഷിച്ചിരുന്ന ഇറച്ചിയും വേട്ടയാടാൻ ഉപയോഗിച്ചെന്ന് കരുതുന്ന ആയുധങ്ങളും കണ്ടെടുത്തു.