സോഷ്യല്‍ മീഡിയ പ്ലാറ്റ്ഫോമായ എക്സ് ഉപയോക്താക്കള്‍ക്ക് പണം സമ്പാദിക്കാനുള്ള വഴികള്‍ കൂടുതല്‍ കാര്‍ക്കശ്യമുള്ളതാക്കുന്നു. കഴിഞ്ഞ മൂന്ന് വര്‍ഷമായി നിലവിലിരുന്ന ജനപ്രിയ റെവന്യൂ ഷെയറിങ് പ്രോഗ്രാം അവസാനിപ്പിക്കുകയാണെന്ന് ഇലോണ്‍ മസ്‌കിന്റെ ഉടമസ്ഥതയിലുള്ള എക്സ് പ്രഖ്യാപിച്ചിരിക്കുകയാണ്. ട്വിറ്ററിനെ ഏറ്റെടുത്ത് എക്സ് എന്ന് പുനര്‍നാമകരണം ചെയ്ത വേളയില്‍, ആളുകളെ കൂടുതല്‍ പോസ്റ്റുകള്‍ പങ്കുവെക്കാനും പ്ലാറ്റ്ഫോമില്‍ സജീവമായി നിലനിര്‍ത്താനും ലക്ഷ്യമിട്ടാണ് മസ്‌ക് ഈ വരുമാന പങ്കിടല്‍ രീതി അവതരിപ്പിച്ചിരുന്നത്. എന്നാല്‍ ഈ സംവിധാനം വരുന്ന സെപ്റ്റംബര്‍ ഏഴിന് ഔദ്യോഗികമായി അവസാനിക്കുകയാണ്. പകരം സെപ്റ്റംബര്‍ എട്ട് മുതല്‍ കൂടുതല്‍ കര്‍ശനമായ ഒറിജിനല്‍ കണ്ടന്റ് റിവാര്‍ഡ്സ് പ്രോഗ്രാം നിലവില്‍ വരും.

മാറ്റത്തിന് പിന്നിലെ കാരണങ്ങള്‍

പഴയ റെവന്യൂ ഷെയറിങ് പ്രോഗ്രാമിന് കീഴില്‍ ആര്‍ക്കും എളുപ്പത്തില്‍ പണം നേടാന്‍ സാധിക്കുമായിരുന്നു. ഉപയോക്താവ് പോസ്റ്റ് ചെയ്യുന്ന ഉള്ളടക്കം സ്വന്തമായിരിക്കണമെന്ന് നിര്‍ബന്ധമില്ലായിരുന്നു എന്നതും മറ്റുള്ളവരുടെ പോസ്റ്റുകള്‍ പകര്‍ത്തിയിട്ടും വരുമാനം ഉണ്ടാക്കാമായിരുന്നു എന്നതും സിസ്റ്റത്തിന്റെ വലിയൊരു പോരായ്മയായിരുന്നു. പണം ഉണ്ടാക്കുക എന്ന ഒരൊറ്റ ലക്ഷ്യത്തോടെ അനാവശ്യ പോസ്റ്റുകള്‍ പങ്കുവെക്കുന്നതും, നിര്‍മിത ബുദ്ധി ഉപയോഗിച്ച് സൃഷ്ടിക്കുന്ന ഗുണമേന്മയില്ലാത്ത ഉള്ളടക്കങ്ങള്‍ വര്‍ദ്ധിക്കുന്നതും, അല്‍ഗോരിതങ്ങളെ ദുരുപയോഗം ചെയ്യുന്നതും പ്ലാറ്റ്ഫോമിന്റെ നിലവാരത്തെ ദോഷകരമായി ബാധിച്ചു. ഇത്തരം ദുരുപയോഗങ്ങള്‍ തടയുന്നതിനും യഥാര്‍ത്ഥ സൃഷ്ടികളെ പ്രോത്സാഹിപ്പിക്കുന്നതിനുമാണ് എക്സ് പുതിയ പ്രതിഫല രീതി അവതരിപ്പിക്കുന്നത്.

പുതിയ പ്രോഗ്രാം അനുസരിച്ച് ഉപയോക്താവിന്റെ സ്വന്തം ഉള്ളടക്കങ്ങള്‍ക്ക് ലഭിക്കുന്ന ക്വാളിഫൈഡ് ഇംപ്രഷനുകള്‍ക്ക് മാത്രമേ വരുമാനം ലഭിക്കുകയുള്ളൂ.

ക്രിയേറ്റര്‍മാരെ എങ്ങനെ ബാധിക്കും?

പുതിയ തീരുമാനം പ്രാബല്യത്തില്‍ വരുന്നതോടെ എക്സില്‍ നിന്ന് വരുമാനം ലഭിക്കുന്ന ക്രിയേറ്റര്‍മാരുടെ എണ്ണത്തില്‍ വന്‍ ഇടിവുണ്ടാകും. ടെക് അനലിസ്റ്റായ യോഗേഷ് ബ്രാറിന്റെ വിലയിരുത്തല്‍ അനുസരിച്ച്, പ്ലാറ്റ്ഫോമില്‍ നിന്ന് നിലവില്‍ പ്രതിഫലം വാങ്ങുന്ന പ്രീമിയം ക്രിയേറ്റര്‍മാരുടെ എണ്ണം 60-70 ശതമാനത്തില്‍ നിന്ന് വെറും 10 ശതമാനമായി ചുരുങ്ങാന്‍ സാധ്യതയുണ്ട്. പുതിയ സംവിധാനത്തില്‍ ഇംപ്രഷനുകളുടെ പരിധി 50 ലക്ഷത്തില്‍ നിന്ന് അഞ്ച് ലക്ഷമായി കുറച്ചിട്ടുണ്ടെങ്കിലും, ഈ ഇംപ്രഷനുകള്‍ എക്സിലെ പെയ്ഡ് (വെരിഫൈഡ്) വരിക്കാരില്‍ നിന്ന് തന്നെ ലഭിക്കണമെന്ന നിബന്ധനയുണ്ട്.

കൂടാതെ പോസ്റ്റുകള്‍ക്ക് താഴെ വരുന്ന മറുപടികളില്‍ നിന്നുള്ള ഇംപ്രഷനുകള്‍ ഇനി വരുമാനത്തിനായി പരിഗണിക്കുകയുമില്ല. വലിയ റീച്ച് ഇല്ലാത്ത സാധാരണ ഉപയോക്താക്കള്‍ക്ക് അഞ്ച് ലക്ഷം പെയ്ഡ് വരിക്കാരില്‍ നിന്ന് ഇംപ്രഷനുകള്‍ നേടിയെടുക്കുക എന്നത് വലിയ വെല്ലുവിളിയായിരിക്കും.

പുതിയ അപേക്ഷയും പേയ്മെന്റ് തിയതികളും

പഴയ റെവന്യൂ ഷെയറിങ് പ്രോഗ്രാമിന്റെ ഭാഗമായിരുന്ന ക്രിയേറ്റര്‍മാര്‍ക്ക് പുതിയ സംവിധത്തിലേക്ക് ഓട്ടോമാറ്റിക് എന്‍ട്രി ലഭിക്കില്ല. വരുമാനം തുടര്‍ന്നും ലഭിക്കണമെങ്കില്‍ ഇവര്‍ പുതിയ മാനദണ്ഡങ്ങള്‍ക്ക് അനുസരിച്ച് വീണ്ടും അപേക്ഷ സമര്‍പ്പിക്കേണ്ടതുണ്ട്. മുന്‍ പ്രോഗ്രാമിന്റെ ഭാഗമായിട്ടുള്ള ക്രിയേറ്റര്‍മാര്‍ക്കുള്ള അവസാന പേയ്മെന്റുകള്‍ ഓഗസ്റ്റ് 14, ഓഗസ്റ്റ് 28, സെപ്റ്റംബര്‍ 11 എന്നീ തീയതികളിലായി ഘട്ടംഘട്ടമായി വിതരണം ചെയ്ത് തീര്‍ക്കും.

രീതികള്‍ മാറ്റേണ്ടി വരും

റീച്ചും ഇംപ്രഷനുകളും മാത്രം ലക്ഷ്യമിട്ട് നിലവാരമില്ലാത്ത പോസ്റ്റുകള്‍ ഇടുന്ന രീതി ക്രിയേറ്റര്‍മാര്‍ക്ക് ഇനി അവസാനിപ്പിക്കേണ്ടി വരും. വരുമാനം ലഭിക്കുമെന്ന പ്രതീക്ഷയില്‍ എന്ത് ഉള്ളടക്കവും പങ്കുവെക്കാമെന്ന ചിന്താഗതി മാറ്റാന്‍ ഈ പരിഷ്‌കാരം വഴിവെക്കും. സ്വന്തം കഴിവുകളും എഴുത്തും മെച്ചപ്പെടുത്തി സ്വന്തമായി വിശ്വസനീയമായ ഒരു ബ്രാന്‍ഡ് വാല്യൂ ഉണ്ടാക്കിയെടുക്കാനും, പ്ലാറ്റ്ഫോമിന് പുറത്തുനിന്ന് സ്‌പോണ്‍സര്‍ഷിപ്പുകള്‍ കണ്ടെത്താനും ഈ മാറ്റം ക്രിയേറ്റര്‍മാരെ പ്രേരിപ്പിക്കും. പെയ്ഡ് ഉപയോക്താക്കള്‍ക്ക് കൂടുതല്‍ പ്രാധാന്യമുള്ളതിനാല്‍, ഗുണനിലവാരമുള്ള ഒരു കൂട്ടം വായനക്കാരിലേക്ക് കൃത്യമായി എത്തിച്ചേരാനും ഇത് സഹായിക്കും.

ആശങ്കകള്‍ ബാക്കി

പുതിയ നിബന്ധനകള്‍ പ്രാബല്യത്തില്‍ വന്നാലും ചിലര്‍ അല്‍ഗോരിതങ്ങളില്‍ കൃത്രിമം കാണിച്ച് സംവിധാനത്തെ ദുരുപയോഗം ചെയ്യാന്‍ സാധ്യതയുണ്ടെന്ന് ക്രിയേറ്റര്‍മാര്‍ ആശങ്കപ്പെടുന്നു. ഒറിജിനല്‍ ഉള്ളടക്കങ്ങളില്‍ ചെറിയ മാറ്റങ്ങള്‍ വരുത്തി പകര്‍പ്പുകള്‍ സൃഷ്ടിച്ച് തട്ടിപ്പുകള്‍ നടത്താന്‍ ആളുകള്‍ ഇപ്പോഴും ശ്രമിച്ചേക്കാം. യഥാര്‍ത്ഥ ക്രിയേറ്റര്‍മാരെ എക്സ് നേരിട്ട് കണ്ടെത്തി ഒരു പ്രത്യേക ലിസ്റ്റില്‍ ഉള്‍പ്പെടുത്താത്ത പക്ഷം, പുതിയ മാറ്റം കൊണ്ടും പൂര്‍ണ്ണമായ ഫലം ലഭിച്ചേക്കില്ലെന്നാണ് ഒരു വിഭാഗം വിലയിരുത്തുന്നത്.

English Summary

Elon Musk's X is officially shutting down its three-year-old Creator Revenue Sharing Program on September 7 and replacing it with a stricter Original Content Rewards Program starting September 8 to combat AI spam, low-quality posts, and system abuse. Under the new model, creators will earn money solely from qualified impressions on authentic, original content generated by paid verified subscribers, while impressions from post replies will no longer count. This significant shift—which requires existing creators to reapply—is expected to drastically reduce the eligible creator pool from 60–70% to around 10%, forcing creators to focus on original, high-value content and outside sponsorships rather than quick engagement farming.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്