ദീപാവലി തിരക്ക്; പ്രത്യേക സർവീസുകളുമായി ദക്ഷിണ റെയിൽവേ

OCTOBER 31, 2024, 7:42 AM

തിരുവനന്തപുരം: ദീപാവലി തിരക്കിൽ കൂടുതൽ ട്രെയിന്‍ സർവീസുകൾ പ്രഖ്യാപിച്ച് ദക്ഷിണ റെയിൽവേ. തിരക്കേറിയ പാതകളിൽ 58 പ്രത്യേക ട്രെയിനുകൾ 277 സർവീസുകൾ നടത്തും.

ദീർഘദൂര പാതകളിലും അന്തർസംസ്ഥാന പാതകളിലും വർധിച്ചു വരുന്ന യാത്രക്കാരുടെ എണ്ണം കൈകാര്യം ചെയ്യുന്നതിനും ഗതാഗതസൗകര്യം മെച്ചപ്പെടുത്തുന്നതിനുമായി മറ്റു സേവനങ്ങളും ആസൂത്രണം ചെയ്തിട്ടുണ്ടെന്നും റെയിൽവേ വ്യക്തമാക്കി.

യാത്രക്കാരുടെ തിരക്ക് വർധിച്ചതിന് പിന്നാലെ തിരുവനന്തപുരം ഡിവിഷനിലെ യാത്രക്കാരുടെ ആവശ്യം പരിഗണിച്ച് 10 ട്രെയിനുകളിൽ റെയിൽവേ അധിക കോച്ചുകൾ അനുവദിച്ചിട്ടുണ്ട്.

തിരുവനന്തപുരം നോർത്ത് - ഹസ്രത്ത് നിസാമുദ്ദീൻ - തിരുവനന്തപുരം നോർത്ത്, തിരുവനന്തപുരം നോർത്ത് - എസ്എംവിടി, ബെംഗളൂരു - തിരുവനന്തപുരം നോർത്ത്, കോട്ടയം - എംജിആർ ചെന്നൈ സെൻട്രൽ - കോട്ടയം, യശ്വന്കത്പൂർ - കോട്ടയം - യശ്വന്ത്പൂർ എന്നിവയുൾപ്പെടെ തിരക്കേറിയ റൂട്ടുകളിലാണ് പ്രത്യേക സർവീസുകൾ പ്രഖ്യാപിച്ചിരിക്കുന്നത്. ദക്ഷിണ റെയിൽവേ തിരുവനന്തപുരം ഡിവിഷൻ വാർത്താക്കുറിപ്പിലാണ് ഇത് സംബന്ധിച്ച് പ്രഖ്യാപനമുള്ളത്.