തൃശൂരിൽ മദ്യലഹരിയിൽ റോഡിൽ കാറുകൾ തടഞ്ഞു; എഎസ്ഐയെ കടിച്ച യുവതി അറസ്റ്റിൽ

SEPTEMBER 10, 2026, 12:18 AM

തൃശൂർ: നഗരത്തിൽ മദ്യലഹരിയിൽ വാഹനങ്ങൾ തടഞ്ഞ് യാത്രക്കാരിൽ നിന്ന് പണം ആവശ്യപ്പെട്ട യുവതി അറസ്റ്റിൽ. ചാഴൂർ സ്വദേശിനിയായ റഹ്മത്ത് (21) ആണ് പൊലീസ് പിടിയിലായത്. യുവതിയെ കസ്റ്റഡിയിലെടുക്കുന്നതിനിടെ പൊലീസ് ഉദ്യോഗസ്ഥയ്ക്ക് കടിയേറ്റു പരിക്കേറ്റു എന്നും റിപ്പോർട്ടുകൾ ഉണ്ട്.

ഇന്നലെ അർധരാത്രിയോടെയാണ് സംഭവം. മദ്യലഹരിയിലായിരുന്ന റഹ്മത്ത് റോഡിൽ വാഹനങ്ങൾ തടഞ്ഞുനിർത്തി യാത്രക്കാരോട് പണം ആവശ്യപ്പെട്ടതായാണ് പൊലീസ് പറയുന്നത്.

വിവരമറിഞ്ഞ് സ്ഥലത്തെത്തിയ പൊലീസ് യുവതിയെ കസ്റ്റഡിയിലെടുത്ത് വൈദ്യപരിശോധനയ്ക്കായി കൊണ്ടുപോകുന്നതിനിടെയാണ് ഉദ്യോഗസ്ഥയെ ആക്രമിച്ചത്. എഎസ്ഐ കലയെയാണ് യുവതി കടിച്ചത്. പരിക്കേറ്റ ഉദ്യോഗസ്ഥയ്ക്ക് ചികിത്സ നൽകി.