വെമ്പായം ബാർ സംഘർഷം: ആക്രമണത്തിൽ പൊള്ളലേറ്റ നവാസ് മരിച്ചു; പ്രതിയും ഗുരുതരാവസ്ഥയിൽ

JULY 20, 2026, 5:23 AM

തിരുവനന്തപുരം: വെമ്പായം ബാറിലുണ്ടായ തീകൊളുത്തൽ ആക്രമണത്തിൽ ഗുരുതരമായി പൊള്ളലേറ്റ് തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലായിരുന്ന നവാസ് മരിച്ചു. സംഭവത്തിൽ ആക്രമണം നടത്തിയെന്നാരോപിക്കുന്ന നന്നാട്ടുകാവ് സ്വദേശി അനീഷും ഗുരുതര പൊള്ളലേറ്റ് ചികിത്സയിലാണ്.

കഴിഞ്ഞ ദിവസം രാത്രിയാണ് വെമ്പായത്തെ ബാറിൽ സംഭവം നടന്നത്. ബാറിലെ എസി മുറിയിൽ സുഹൃത്തുക്കൾ ഒരുമിച്ച് മദ്യപിക്കുന്നതിനിടെ ഉണ്ടായ വാക്കുതർക്കം ആക്രമണത്തിലേക്ക് നീങ്ങുകയായിരുന്നു.

തർക്കത്തിനിടെ പുറത്തുപോയ അനീഷ് പെട്രോളുമായി തിരിച്ചെത്തി മറ്റ് സുഹൃത്തുക്കളുടെ ദേഹത്ത് ഒഴിച്ച് തീകൊളുത്തിയെന്നാണ് പൊലീസിന്റെ പ്രാഥമിക കണ്ടെത്തൽ. ആക്രമണത്തിനിടെ അനീഷിന്റെ ദേഹത്തേക്കും തീ പടർന്നതോടെ ഇയാൾക്കും ഗുരുതരമായി പൊള്ളലേറ്റു.