ലഹരി മൂത്ത ഭ്രാന്ത്; ഗർഭിണിയായ യുവതിയെ മഴു കൊണ്ട് വെട്ടിക്കൊന്ന് യുവാവ്

MAY 10, 2026, 10:12 PM

സഹാരൻപുർ: ഉത്തർപ്രദേശിലെ സഹാരൻപുരിൽ ലഹരിക്കടിമയായ യുവാവ് ഗർഭിണിയെ ക്രൂരമായി കൊലപ്പെടുത്തി. സഹാരൻപുർ സ്വദേശി ആമിറാണ് സഹോദരൻ സൽമാന്റെ ഭാര്യ സന നാസിനെ (23) വീടിനുള്ളിൽ വെച്ച് കൊലപ്പെടുത്തിയത്. കൊലപാതകത്തിന് ശേഷം രക്തം പുരണ്ട മഴുവും ഗ്യാസ് സിലിണ്ടറുമായി വീടിന് തീയിടുമെന്ന് ഭീഷണി മുഴക്കിയ പ്രതി പരിഭ്രാന്തി സൃഷ്ടിച്ചു.

ആറുമാസം മുൻപായിരുന്നു സൽമാനും സനയും തമ്മിലുള്ള പ്രണയവിവാഹം നടന്നത്. ഞായറാഴ്ച വൈകുന്നേരം ലഹരി ഉപയോഗിച്ചെത്തിയ ആമിർ സനയുമായി തർക്കത്തിലേർപ്പെടുകയും തുടർന്ന് വീട്ടിലിരുന്ന മഴു ഉപയോഗിച്ച് ആക്രമിക്കുകയുമായിരുന്നു.

സനയുടെ തലയ്ക്കും കഴുത്തിനും വയറിനും മാരകമായി പരിക്കേറ്റു. നിലവിളി കേട്ടെത്തിയ ഭർത്താവിനെ മഴു കാട്ടി ഭീഷണിപ്പെടുത്തി ആമിർ തടഞ്ഞു. തുടർന്ന് സൽമാൻ ഓടിപ്പോയി പോലീസിനെ വിവരമറിയിക്കുകയായിരുന്നു.

പോലീസ് എത്തിയപ്പോൾ ഗ്യാസ് സിലിണ്ടർ തുറന്നുവിട്ട് വീട് സ്ഫോടനത്തിൽ തകർക്കുമെന്ന് പ്രതി ഭീഷണി മുഴക്കി. ഇതോടെ സമീപവാസികൾ ഭയന്ന് വീടിനുള്ളിൽ ഒളിച്ചു. രണ്ടു മണിക്കൂർ നീണ്ട പരിശ്രമത്തിനൊടുവിൽ പോലീസ് വീട് വളഞ്ഞ് പ്രതിയെ കീഴ്പ്പെടുത്തി.

മൃതദേഹം പോസ്റ്റ്‌മോർട്ടത്തിനായി അയച്ചു. പ്രാഥമിക അന്വേഷണത്തിൽ ലഹരി ഉപയോഗവും കുടുംബവഴക്കുമാണ് കൊലപാതകത്തിന് കാരണമെന്ന് പോലീസ് പറഞ്ഞു. യുവതിയുടെ പിതാവിന്റെ പരാതിയിൽ പോലീസ് കേസെടുത്ത് അന്വേഷണം ആരംഭിച്ചു.