“ഒരു തരം, രണ്ടു തരം, മൂന്ന് തരം യുഡിഎഫ് ഭരണം ഉറപ്പായി”; യുഡിഎഫിന് ചരിത്ര വിജയം ഉണ്ടാകുമെന്ന് എ കെ ആന്റണി

APRIL 9, 2026, 6:50 AM

തിരുവനന്തപുരം: ഇത്തവണത്തെ നിയമസഭാ തെരഞ്ഞെടുപ്പില്‍ യുഡിഎഫിന് ചരിത്ര വിജയം ഉണ്ടാകുമെന്ന് ആത്മവിശ്വാസം പ്രകടിപ്പിച്ചു എ കെ ആന്റണി. .

തിരുവനന്തപുരത്ത് വോട്ട് രേഖപ്പെടുത്തിയ ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. “ഒരു തരം, രണ്ടു തരം, മൂന്ന് തരം യുഡിഎഫ് ഭരണം ഉറപ്പായി” എന്നും ആന്റണി പറഞ്ഞു.

കേരളം മുഴുവന്‍ ഭരണവിരുദ്ധ വികാരം വലിയ ജനരോഷമായി മാറിയിരിക്കുകയാണെന്നും, കഴിഞ്ഞ 10 വര്‍ഷത്തെ ഭരണത്തിന് വോട്ടര്‍മാര്‍ കണക്കു ചോദിക്കുമെന്നും അദ്ദേഹം പറഞ്ഞു. ജനാധിപത്യത്തില്‍ നല്‍കാവുന്ന ഏറ്റവും വലിയ ശിക്ഷ ഈ സര്‍ക്കാരിന് ലഭിക്കുമെന്നും, യുഡിഎഫ് കേരളം തൂത്തുവാരുമെന്നും ആന്റണി കൂട്ടിച്ചേര്‍ത്തു.

ഇടതുപാര്‍ട്ടികളെ പിന്തുണച്ചിരുന്ന പലരും ഇപ്പോൾ തുടര്‍ഭരണത്തിന് എതിരായി യുഡിഎഫിനൊപ്പം നില്‍ക്കുകയാണെന്നും, അതില്‍ SFIയുടെ സ്ഥാപക നേതാക്കളും ഉള്‍പ്പെടുന്നുവെന്നും അദ്ദേഹം അവകാശപ്പെട്ടു.

വോട്ടെടുപ്പ് അവസാനിക്കുന്നതോടെ നിലവിലെ പിണറായി വിജയൻ സര്‍ക്കാര്‍ ‘കെയര്‍ടേക്കര്‍ സര്‍ക്കാര്‍’ ആയി മാറുമെന്നും ആന്റണി പറഞ്ഞു. മെയ് 4ന് ശേഷം ഇടതുനേതാക്കള്‍ക്ക് പ്രതിപക്ഷത്ത് ഇരുന്ന് ആത്മപരിശോധന നടത്താമെന്നും അദ്ദേഹം കൂട്ടിച്ചേര്‍ത്തു.

അതേസമയം, ബിജെപിക്ക് കേരളത്തില്‍ വേരോട്ടമുണ്ടാകില്ലെന്നും, ജയിക്കാവുന്ന ഒരു സീറ്റ് പോലും കാണുന്നില്ലെന്നും ആന്റണി വിലയിരുത്തി.