പ്രായപൂർത്തിയാകാത്ത പെൺകുട്ടിയെ കൗൺസിലിങ്ങിനിടെ പീഡിപ്പിച്ചു; സൈക്കോളജിസ്റ്റ് അറസ്റ്റിൽ

MAY 23, 2026, 8:29 PM

കൊല്ലം: കൗൺസിലിങ്ങിനിടെ പ്രായപൂർത്തിയാകാത്ത പെൺകുട്ടിയെ ലൈംഗിക പീഡനത്തിനിരയാക്കിയ സൈക്കോളജിസ്റ്റ് അറസ്റ്റിൽ.

കൊല്ലം മയ്യനാട് സ്വദേശി സന്തോഷ് സുകുമാരൻ (69)ആണ് അറസ്റ്റിലായത്. പെൺകുട്ടി ഏഴാം ക്ലാസിൽ പഠിക്കുന്ന സമയം മുതൽ ആശുപത്രിയിൽ കൗൺസിലിങിന് എത്തിയിരുന്നു.

കുട്ടിയെ മാത്രം മുറിക്കുള്ളിൽ പ്രവേശിപ്പിച്ച് കൗൺസിലിങ് എന്ന വ്യാജേനയായിരുന്നു പീഡനം. വർക്കല സ്വകാര്യ ആശുപത്രിയിൽ കൗൺസലിങിനെത്തിയ പ്രായപൂർത്തിയാകാത്ത പെൺകുട്ടിയ്ക്കാണ് ഈ അതിക്രമം നേരിടേണ്ടി വന്നത്.

പത്താം ക്ലാസിൽ എത്തിയപ്പോൾ കുട്ടിയുടെ നഗ്നചിത്രങ്ങൾ എടുത്തും പ്രതിയുടെ നഗ്നചിത്രങ്ങൾ കാണിച്ചും പീഡനത്തിനിരയാക്കി.

നീണ്ട കാലയളവിൽ നിരവധി തവണ പെൺകുട്ടിയെ ഇത്തരത്തിൽ പീഡനത്തിന് ഇരയാക്കിയിരുന്നതായാണ് പൊലീസ് പറയുന്നത്. കുട്ടിയുടെ സ്വഭാവമാറ്റം കണ്ട് രക്ഷിതാക്കൾ മറ്റൊരു സൈക്കോളജിസ്റ്റിനെ സമീപിച്ചിരുന്നു. ഈ കൗൺസിലിങിനിടെയാണ് പെൺക്കുട്ടി ഞെട്ടിക്കുന്ന വിവരങ്ങൾ പുറത്തുപറഞ്ഞത്.