'റിയൽ കേരള സ്റ്റോറി' പാളി! കുംഭമേള താരത്തിന്റെ വിവാഹം: സി.പി.എം നേതാക്കൾ വെട്ടിൽ

APRIL 10, 2026, 8:21 AM

തിരുവനന്തപുരം: കുംഭമേളയിലൂടെ വൈറലായ താരം പ്രായപൂർത്തിയാകുന്നതിന് മുൻപേ വിവാഹിതയായെന്ന കണ്ടെത്തലിനെത്തുടർന്ന് ഭർത്താവ് ഫർമാൻ ഖാനെതിരെ പോക്സോ കേസെടുത്തു. ദേശീയ പട്ടികവർഗ്ഗ കമ്മീഷൻ നടത്തിയ അന്വേഷണത്തിൽ വിവാഹസമയത്ത് പെൺകുട്ടിക്ക് 16 വയസ്സും രണ്ട് മാസവും മാത്രമായിരുന്നു പ്രായമെന്ന് വ്യക്തമായതോടെയാണ് നടപടി. ഇതോടെ വിവാഹത്തിന് കാർമികത്വം വഹിച്ച സി.പി.എം നേതാക്കളും വെട്ടിലായിരിക്കുകയാണ്.

കഴിഞ്ഞ മാർച്ച് 11-ന് തിരുവനന്തപുരം അരുമാനൂർ ശ്രീ നൈനാർ ദേവ ക്ഷേത്രത്തിൽ വെച്ചായിരുന്നു വിവാഹം നടന്നത്. വിവാഹസമയത്ത് യുവാവ് പൊലീസിന് മുന്നിൽ ഹാജരാക്കിയത് വ്യാജ ജനന സർട്ടിഫിക്കറ്റാണെന്ന് ഇപ്പോൾ തെളിഞ്ഞിട്ടുണ്ട്.

ആ സർട്ടിഫിക്കറ്റ് പ്രകാരം പെൺകുട്ടിക്ക് പ്രായപൂർത്തിയായിരുന്നു. എന്നാൽ, മധ്യപ്രദേശിലെ ആശുപത്രി രേഖകൾ പരിശോധിച്ച കമ്മീഷൻ, പെൺകുട്ടിയുടെ യഥാർത്ഥ ജനനത്തീയതി 2009 ഡിസംബർ 30 ആണെന്ന് കണ്ടെത്തി. വിവാഹത്തിനായി പ്രത്യേകമായി വ്യാജ സർട്ടിഫിക്കറ്റ് ചമച്ചതായും റിപ്പോർട്ടിലുണ്ട്.

'റിയൽ കേരള സ്റ്റോറി' എന്ന് വിശേഷിപ്പിച്ച് ഈ വിവാഹത്തെ ആഘോഷമാക്കിയ സി.പി.എം സംസ്ഥാന സെക്രട്ടറി എം.വി. ഗോവിന്ദൻ, മന്ത്രി വി. ശിവൻകുട്ടി, എ.എ. റഹീം എം.പി എന്നിവർ കേസ് പുറത്തുവന്നതോടെ പ്രതിരോധത്തിലായിരിക്കുകയാണ്. വിവാഹത്തിന് നേരിട്ട് നേതൃത്വം നൽകിയ ഇവർ, പെൺകുട്ടിക്ക് പ്രായപൂർത്തിയായിരുന്നില്ല എന്ന സത്യം പുറത്തുവന്നതോടെ പ്രതികരിക്കാൻ തയ്യാറായിട്ടില്ല. വിഷയത്തിൽ വലിയ രാഷ്ട്രീയ വിവാദമാണ് നിലവിൽ ഉടലെടുത്തിരിക്കുന്നത്.

സംഭവം അതീവ ഗൗരവകരമായി കണ്ട ദേശീയ പട്ടികവർഗ്ഗ കമ്മീഷൻ, കേരള, മധ്യപ്രദേശ് ഡി.ജി.പിമാരോട് ഡൽഹിയിൽ നേരിട്ട് ഹാജരാകാൻ നിർദ്ദേശിച്ചിട്ടുണ്ട്. മധ്യപ്രദേശ് പൊലീസാണ് ഫർമാൻ ഖാനെതിരെ പോക്സോ നിയമപ്രകാരം കേസ് രജിസ്റ്റർ ചെയ്തത്. രണ്ട് വ്യത്യസ്ത ജനന സർട്ടിഫിക്കറ്റുകളും മാധ്യമങ്ങൾക്ക് ലഭ്യമായിട്ടുണ്ട്, ഇത് വ്യാജരേഖ ചമച്ചെന്ന ആരോപണത്തെ ബലപ്പെടുത്തുന്നു.