യൂണിഫോം സേനകളോട് വിമുഖത: പി.എസ്.സി. പരീക്ഷകളിൽ അപേക്ഷകരുടെ എണ്ണത്തിൽ വൻ ഇടിവ്

APRIL 23, 2026, 9:54 PM

തിരുവനന്തപുരം: കേരളത്തിലെ പോലീസ്, എക്സൈസ്, ഫയർഫോഴ്‌സ് തുടങ്ങിയ യൂണിഫോം സേനകളിലേക്കുള്ള സർക്കാർ ജോലികളോട് ഉദ്യോഗാർഥികൾക്കിടയിൽ താൽപര്യം കുറയുന്നതായി കണക്കുകൾ വ്യക്തമാക്കുന്നു. ഓരോ വർഷവും അപേക്ഷകരുടെ എണ്ണത്തിൽ വലിയ കുറവാണ് രേഖപ്പെടുത്തുന്നത്.

പി.എസ്.സി. കണക്കുകൾ പ്രകാരം, പുരുഷ പോലീസ് കോൺസ്റ്റബിൾ തസ്തികയിൽ 2023-ൽ 1,69,000 അപേക്ഷകരുണ്ടായിരുന്നത് 2025 ആയപ്പോഴേക്കും 97,477 ആയി ചുരുങ്ങി. സമാനമായ ഇടിവ് വനിതാ പോലീസ് കോൺസ്റ്റബിൾ അപേക്ഷകരിലും കാണാം; 1.78 ലക്ഷത്തിൽ നിന്ന് ഇത് 1.23 ലക്ഷമായി കുറഞ്ഞു.

എക്സൈസ് ഓഫീസർ തസ്തികയിൽ 2024-ൽ അപേക്ഷകരുടെ എണ്ണം 3.32 ലക്ഷമായി ഉയർന്നെങ്കിലും പരീക്ഷ എഴുതിയത് പകുതിയിൽ താഴെ പേർ മാത്രമാണ്. ഫയർമാൻ ട്രെയിനി തസ്തികയിൽ ഇത്തവണ അപേക്ഷകരുടെ എണ്ണം 1,96,606 ആയി വർധിച്ചിട്ടുണ്ടെങ്കിലും എത്രപേർ പരീക്ഷയ്ക്ക് ഹാജരാകുമെന്ന കാര്യത്തിൽ ആശങ്ക നിലനിൽക്കുന്നുണ്ട്.

പുതിയ തലമുറയ്ക്ക് സർക്കാർ ജോലിയോടുള്ള താൽപര്യം കുറയുന്നതും വിദേശത്തും മറ്റു സംസ്ഥാനങ്ങളിലുമുള്ള ഉന്നതപഠനത്തിനും തൊഴിലിനും മുൻഗണന നൽകുന്നതുമാണ് ഈ മാറ്റത്തിന് പ്രധാന കാരണം. ഉയർന്ന ശമ്പളം ലഭിക്കുന്ന ഐ.ടി., സ്വകാര്യ മേഖലകളിലേക്കാണ് യുവാക്കൾ ഇപ്പോൾ കൂടുതൽ ആകർഷിക്കപ്പെടുന്നത്.

ഇതിനുപുറമെ, പരീക്ഷാ രീതിയിലെ മാറ്റങ്ങളും ഉദ്യോഗാർഥികളെ പിന്നോട്ടടിക്കുന്നു. ഓരോ സേനയെയും സംബന്ധിച്ച പ്രത്യേക വിഷയങ്ങൾ (Special Topics) പരീക്ഷയ്ക്ക് ഉൾപ്പെടുത്തുന്നത് മറ്റ് പി.എസ്.സി. പരീക്ഷകൾക്ക് സഹായകരമാകാത്തതിനാൽ പലരും ഇത് പഠിക്കാൻ വിമുഖത കാണിക്കുന്നുണ്ട്.

വിജ്ഞാപനങ്ങൾ കൃത്യമായി വരുന്നുണ്ടെങ്കിലും നിയമനങ്ങൾ വേഗത്തിൽ നടക്കാത്തതും അപേക്ഷകരുടെ എണ്ണം കുറയാൻ കാരണമാകുന്നുണ്ടെന്ന് പരിശീലന രംഗത്തുള്ളവർ വിലയിരുത്തുന്നു.