‘എയിംസ് കേരളത്തിലെത്തിച്ചില്ലെങ്കിൽ രാഷ്ട്രീയ ജീവിതം അവസാനിപ്പിക്കും’; വെല്ലുവിളി ആവർത്തിച്ച് സുരേഷ് ഗോപി

JUNE 3, 2026, 1:53 AM

തൃശൂർ: കേരളത്തിൽ എയിംസ് സ്ഥാപിക്കുമെന്ന വാഗ്ദാനത്തിൽ ഉറച്ചുനിൽക്കുന്നതായി വ്യക്തമാക്കി കേന്ദ്രമന്ത്രി സുരേഷ് ഗോപി. എയിംസ് സംസ്ഥാനത്ത് യാഥാർഥ്യമാകാതെ പോയാൽ രാഷ്ട്രീയ രംഗത്ത് തുടരില്ലെന്ന തന്റെ മുൻ നിലപാട് അദ്ദേഹം വീണ്ടും ആവർത്തിച്ചു.

എയിംസ് വിഷയത്തിന്റെ പേരിൽ നിരവധി വിമർശനങ്ങളും പരിഹാസങ്ങളും നേരിട്ടിട്ടുണ്ടെന്ന് പറഞ്ഞ സുരേഷ് ഗോപി, പദ്ധതി കേരളത്തിലെത്തുകയാണെങ്കിൽ അതിന്റെ ഉത്തരവാദിത്തവും നേട്ടവും ഏറ്റെടുക്കാൻ തയ്യാറാണെന്നും വ്യക്തമാക്കി. കേന്ദ്ര സർക്കാർ പുറത്തിറക്കിയ പുതിയ മാർഗനിർദേശങ്ങൾ അനുസരിച്ച് സംസ്ഥാന സർക്കാർ എയിംസിനായുള്ള ശുപാർശ സമർപ്പിക്കണമെന്നും അദ്ദേഹം ആവശ്യപ്പെട്ടു.

എയിംസിനായി സ്ഥലം തിരഞ്ഞെടുക്കുമ്പോൾ തൃശൂരും ഇടുക്കിയും ഉൾപ്പെടെയുള്ള ജില്ലകളെ ഗൗരവമായി പരിഗണിക്കണമെന്നും അടുത്ത കേന്ദ്ര ബജറ്റിൽ തന്നെ പദ്ധതി ഉൾപ്പെടുത്താൻ ആവശ്യമായ ഇടപെടലുകൾ ഉണ്ടാകണമെന്നും അദ്ദേഹം അഭിപ്രായപ്പെട്ടു.

ഇതിനൊപ്പം രാജ്യത്തെ ഇന്ധനവില വർധനവിനെക്കുറിച്ചും സുരേഷ് ഗോപി പ്രതികരിച്ചു. നിലവിലെ സാഹചര്യങ്ങളെ മുൻ ഭരണകാലങ്ങളുമായി താരതമ്യം ചെയ്യണമെന്നും, യുദ്ധസാഹചര്യങ്ങളും ആഗോള വിപണിയിലെ മാറ്റങ്ങളും ഇന്ധനവിലയെ സ്വാധീനിക്കുന്ന ഘടകങ്ങളാണെന്നും അദ്ദേഹം പറഞ്ഞു.

ഇന്ധനവില വർധന നിയന്ത്രിക്കുന്നതിൽ സംസ്ഥാന സർക്കാരിനും നിർണായക പങ്കുണ്ടെന്ന് ചൂണ്ടിക്കാട്ടിയ സുരേഷ് ഗോപി, നികുതി കുറയ്ക്കുന്നതുൾപ്പെടെയുള്ള നടപടികൾ സ്വീകരിക്കാത്തതിനെ വിമർശിച്ചു. ജനങ്ങൾക്ക് ആശ്വാസം നൽകുന്ന തീരുമാനങ്ങൾ സംസ്ഥാന സർക്കാർ കൈക്കൊള്ളേണ്ട സമയമാണിതെന്നും അദ്ദേഹം കൂട്ടിച്ചേർത്തു.