വി.ഡി. സതീശൻ മികച്ച മുഖ്യമന്ത്രി, കൂടെയുള്ള മന്ത്രിമാരെ സൂക്ഷിക്കണമെന്ന് ജി. സുധാകരൻ

SEPTEMBER 13, 2026, 9:53 PM

അമ്പലപ്പുഴ: വി.ഡി. സതീശൻ മികച്ച മുഖ്യമന്ത്രിയാണെന്ന് ജി. സുധാകരൻ എം.എൽ.എ പ്രസ്താവിച്ചു. അദ്ദേഹത്തിന്റെ ഭരണത്തിൽ ഇതുവരെ യാതൊരു അപാകവും സംഭവിച്ചിട്ടില്ലെന്നും, ഇക്കാര്യം താൻ സതീശനോട് നേരിട്ട് വ്യക്തമാക്കിയിട്ടുണ്ടെന്നും സുധാകരൻ പറഞ്ഞു.

കൂടെയുള്ള മന്ത്രിമാരെ എല്ലാവരെയും സൂക്ഷിക്കണമെന്ന് അദ്ദേഹത്തിന് മുന്നറിയിപ്പ് നൽകിയിട്ടുണ്ട്. എല്ലാവരെയും അധിക്ഷേപിക്കുന്ന രീതിയിലല്ല ഇത് പറഞ്ഞതെങ്കിലും, അവരുടെ പൊതു പ്രതിച്ഛായയെക്കുറിച്ച് വ്യക്തമായ ധാരണയുള്ളതുകൊണ്ടാണ് ഇത്തരം ഒരു നിർദ്ദേശം നൽകിയത്. ഇവർ നിലവിൽ തെറ്റുകളൊന്നും വരുത്തിയിട്ടില്ലെങ്കിലും, വരുംദിവസങ്ങളിൽ ഏറെ ജാഗ്രത പുലർത്തേണ്ടതുണ്ടെന്നും അദ്ദേഹം കൂട്ടിച്ചേർത്തു.

പറഞ്ഞ വാക്കിൽ ഉറച്ചുനിൽക്കുന്ന സ്വഭാവമാണ് വി.ഡി. സതീശന്റെ പ്രധാന ഗുണമെന്ന് ജി. സുധാകരൻ ചൂണ്ടിക്കാട്ടി. നിലപാടുകളിൽ വ്യക്തതയില്ലാതെ വെടല പരുവത്തിൽ നിലകൊള്ളുന്ന ആളല്ല അദ്ദേഹം. ഏത് സാഹചര്യത്തിലും സ്വന്തം അഭിപ്രായങ്ങൾ തുറന്നുപറയാൻ സതീശൻ മടിക്കാറില്ല. താൻ പറഞ്ഞത് ശരിയല്ലെന്ന് തോന്നിയാൽ അത് തിരുത്താനുള്ള മനോഭാവവും അദ്ദേഹത്തിനുണ്ടെന്ന് സുധാകരൻ വ്യക്തമാക്കി.

മുഖ്യമന്ത്രിയുമായി പണ്ടുമുതലേ അടുത്ത സൗഹൃദമുണ്ട്. അതിനാൽത്തന്നെ സ്വന്തം മണ്ഡലത്തിന്റെ വികസനത്തിനായി ഏതുവിധത്തിലുള്ള സഹായങ്ങളും അദ്ദേഹത്തിൽ നിന്ന് പ്രതീക്ഷിക്കുന്നതായും സുധാകരൻ വ്യക്തമാക്കി.താൻ മന്ത്രിയല്ലാതിരുന്ന ഒരു കാലഘട്ടത്തിലും സെക്രട്ടേറിയറ്റിൽ പോയിട്ടില്ലെന്ന് സുധാകരൻ ഓർമ്മിപ്പിച്ചു. കഴിഞ്ഞ 20 വർഷത്തിനിടെ മന്ത്രിസ്ഥാനത്തില്ലാത്ത സമയത്ത് ഇതാദ്യമായാണ് സെക്രട്ടേറിയറ്റ് സന്ദർശിക്കുന്നത്. വി.ഡി. സതീശനെ നേരിൽ കാണാൻ സാധിച്ചതിൽ ഏറെ സന്തോഷമുണ്ടെന്നും ജി. സുധാകരൻ വാർത്താ സമ്മേളനത്തിൽ മാധ്യമങ്ങളോട് പങ്കുവെച്ചു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്