തൃശൂരിൽ ഏഴ് വയസുകാരിയുടെ മരണം പേവിഷബാധ മൂലം; ആരോഗ്യവകുപ്പിന്റെ സ്ഥിരീകരണം

MAY 6, 2026, 9:27 AM

തൃശൂർ: ചെറുതുരുത്തിയിൽ കുഴഞ്ഞുവീണ് മരിച്ച ഏഴ് വയസുകാരിയുടെ മരണം പേവിഷബാധ മൂലമാണെന്ന് ആരോഗ്യവകുപ്പ് സ്ഥിരീകരിച്ചു. വെട്ടിക്കാട്ടിരി സ്കൂളിലെ ഒന്നാം ക്ലാസ് വിദ്യാർത്ഥിനിയായ സൻഹ മെഹ്‌റിനാണ് ദാരുണാന്ത്യം സംഭവിച്ചത്.

കഴിഞ്ഞ മാസം 28-ന് ബന്ധുവീട്ടിലേക്കുള്ള യാത്രയ്ക്കിടെ കുട്ടി പെട്ടെന്ന് കുഴഞ്ഞുവീണിരുന്നു. അതേസമയം കുട്ടി വെള്ളത്തിനോട് കടുത്ത വിരക്തി പ്രകടിപ്പിക്കുകയും വായിൽ നിന്ന് നുരയും പതയും വരികയും ചെയ്തതായാണ് വിവരം. ഗുരുതരാവസ്ഥയിൽ ഉടൻ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.

പേവിഷബാധയുടെ ലക്ഷണങ്ങളായ ജലഭീതി (hydrophobia), അസ്വാഭാവിക പെരുമാറ്റം എന്നിവ കുട്ടിയിൽ പ്രകടമായിരുന്നുവെന്നാണ് ആരോഗ്യവകുപ്പ് വിലയിരുത്തുന്നത്. അധികൃതർ ജനങ്ങളോട് ജാഗ്രത പാലിക്കാനും, മൃഗക്കടി സംഭവിച്ചാൽ ഉടൻ ചികിത്സ തേടാനും നിർദേശിച്ചു.