കഴക്കൂട്ടത്ത് വിജയപ്രതീക്ഷ; നേമം തിരിച്ചുപിടിക്കുമെന്ന് വി. മുരളീധരൻ; തിരുവനന്തപുരത്ത് ബിജെപി ക്യാമ്പുകളിൽ ആവേശം

APRIL 9, 2026, 10:36 PM

തിരുവനന്തപുരം: സംസ്ഥാന നിയമസഭാ തെരഞ്ഞെടുപ്പിന്റെ വോട്ടെടുപ്പ് പൂർത്തിയായതോടെ തിരുവനന്തപുരം ജില്ലയിൽ വലിയ വിജയപ്രതീക്ഷയുമായി ബിജെപി.

കഴക്കൂട്ടം മണ്ഡലത്തിൽ ഇത്തവണ വിജയം സുനിശ്ചിതമാണെന്നും ബിജെപിക്ക് അനുകൂലമായ ശക്തമായ തരംഗം മണ്ഡലത്തിലുണ്ടെന്നും സ്ഥാനാർത്ഥിയും മുതിർന്ന ബിജെപി നേതാവുമായ വി. മുരളീധരൻ പ്രതികരിച്ചു.

കഴക്കൂട്ടത്തെക്കാൾ വിജയസാധ്യത പാർട്ടി കൽപ്പിക്കുന്നത് നേമം മണ്ഡലത്തിലാണെന്നും മുരളീധരൻ വ്യക്തമാക്കി. കഴിഞ്ഞ തവണ നേമത്തുണ്ടായ പരാജയത്തിന് ഇത്തവണ മറുപടി നൽകുമെന്നും മണ്ഡലം തിരിച്ചുപിടിച്ച് ബിജെപി നിയമസഭയിൽ വീണ്ടും അക്കൗണ്ട് തുറക്കുമെന്നും അദ്ദേഹം ആത്മവിശ്വാസം പ്രകടിപ്പിച്ചു.

കഴക്കൂട്ടത്തെയും നേമത്തെയും കൂടാതെ ജില്ലയിലെ മറ്റ് പ്രധാന മണ്ഡലങ്ങളിലും ശക്തമായ ത്രികോണ മത്സരം കാഴ്ചവെക്കാൻ കഴിഞ്ഞത് പാർട്ടിയുടെ ആത്മവിശ്വാസം വർദ്ധിപ്പിച്ചിട്ടുണ്ട്.

ജില്ലയിലെ വികസന മുരടിപ്പിനെതിരെയുള്ള ജനവികാരം വോട്ടായി മാറിയിട്ടുണ്ടെന്നാണ് ബിജെപിയുടെ വിലയിരുത്തൽ. ഗ്രാമ-നഗര വ്യത്യാസമില്ലാതെ വോട്ടർമാർ മാറ്റത്തിനായി വോട്ട് രേഖപ്പെടുത്തിയെന്നും, ഫലം വരുമ്പോൾ അത് ബിജെപിക്ക് വലിയ മുന്നേറ്റം നൽകുമെന്നും പാർട്ടി ക്യാമ്പുകൾ കണക്കുകൂട്ടുന്നു.