1-20260528045426.jpg)
കൊച്ചി: എക്സാലോജിക്കുമായുള്ള സാമ്പത്തിക ഇടപാട് കേസില് എന്ഫോഴ്സ്മെന്റ് ഡയറക്ട്രേറ്റ് (ഇഡി) അന്വേഷണം തടയണമെന്നാവശ്യപ്പെട്ട് സിഎംആര്എല് ഹൈക്കോടതി ഡിവിഷന് ബെഞ്ചില് അപ്പീല് നല്കി. കേസില് അന്വേഷണം തുടരാമെന്ന ഹൈക്കോടതി സിംഗിള് ബെഞ്ച് ഉത്തരവ് സ്റ്റേ ചെയ്യണമെന്നാവശ്യപ്പെട്ടാണ് ഡിവിഷന് ബെഞ്ചിനെ സമീപിച്ചിരിക്കുന്നത്.
സിഎംആര്എല് സീനിയര് മാനേജര് എന്.സി. ചന്ദ്രശേഖരന്, സീനിയര് ഓഫീസര് അഞ്ജു റേച്ചല് കുര്യന്, മാനേജിംഗ് ഡയറക്ടര് എസ്.എന്. ശശിധരന് കര്ത്ത, ചീഫ് ഫിനാന്ഷ്യല് ഓഫീസര് കെ. സുരേഷ് കുമാര് എന്നിവരാണ് അപ്പീല് നല്കിയിരിക്കുന്നത്.
ഇല്ലാത്ത തെളിവുകളുടെ അടിസ്ഥാനത്തിലാണ് ഇഡി അന്വേഷണം നടക്കുന്നതെന്നും, എസ്എഫ്ഐഒ കണ്ടെത്തലിന്റെ അടിസ്ഥാനത്തില് കമ്പനിക്കെതിരെ അന്വേഷണം നടത്താനാകില്ലെന്നുമാണ് സിഎംആര്എല് ഡിവിഷന് ബെഞ്ചിന് മുന്നില് വാദിച്ചത്. തങ്ങളുടെ വാദം കേള്ക്കുന്നതുവരെ നിലവിലെ അന്വേഷണം സ്റ്റേ ചെയ്യണമെന്നും അപ്പീലില് ആവശ്യപ്പെട്ടിട്ടുണ്ട്.
കഴിഞ്ഞ ദിവസമാണ് സിഎംആര്എല്-എക്സാലോജിക് കരാറുമായി ബന്ധപ്പെട്ട് ഇഡിക്ക് അന്വേഷണം തുടരാമെന്ന് ഹൈക്കോടതി സിംഗിള് ബെഞ്ച് ഉത്തരവിട്ടത്. അന്വേഷണം തടയണമെന്നാവശ്യപ്പെട്ട് സിഎംആര്എല് സമര്പ്പിച്ച ഹര്ജി കോടതി തള്ളുകയായിരുന്നു. തുടര്ന്ന് പ്രതിപക്ഷ നേതാവ് പിണറായി വിജയന്റെ തിരുവനന്തപുരം, കണ്ണൂര് വീടുകളിലും, ആലുവയിലെ സിഎംആര്എല് ഓഫീസിലും, ബെംഗളൂരുവിലെ എക്സാലോജിക് ഓഫീസിലും ഇഡി റെയ്ഡുകള് നടത്തിയിരുന്നു.
റെയ്ഡിന് പിന്നാലെ വീണ ടി.യുടെ മൊഴി ഇഡി രേഖപ്പെടുത്തിയതോടൊപ്പം ഒരു ബാങ്ക് അക്കൗണ്ടും മരവിപ്പിച്ചിരുന്നു. ഈ സാഹചര്യത്തിലാണ് സിഎംആര്എല് വീണ്ടും ഹൈക്കോടതിയെ സമീപിച്ചിരിക്കുന്നത്.
പ്രതിപക്ഷ നേതാവ് പിണറായി വിജയന്റെ മകള് വീണ തൈക്കണ്ടിയിലിന്റെ ഉടമസ്ഥതയിലുള്ള എക്സാലോജിക് സൊല്യൂഷന്സിന് സേവനം നല്കാതെയാണ് സിഎംആര്എല് 1.72 കോടി രൂപ നല്കിയതെന്ന ആരോപണമാണ് ഇഡി അന്വേഷിക്കുന്നത്. ഈ സാമ്പത്തിക ഇടപാട് കള്ളപ്പണം വെളുപ്പിക്കല് നിരോധന നിയമത്തിന്റെ പരിധിയില് വരുന്നതാണെന്നാണ് ഇഡിയുടെ നിലപാട്.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20250409094740.jpg)
