ആരോഗ്യ വകുപ്പ് ആസ്ഥാനത്ത് ‘കസേര പോര്’; ഡി.എച്ച്.എസ് സ്ഥാനത്തെച്ചൊല്ലി റീനയും മീനാക്ഷിയും നേർക്കുനേർ; ഒടുവിൽ പൊലീസ് ഇടപെടൽ

JUNE 19, 2026, 1:12 AM

തിരുവനന്തപുരം: സംസ്ഥാന ആരോഗ്യ വകുപ്പ് ഡയറക്ടറേറ്റ് ആസ്ഥാനത്ത് ഡയറക്ടർ ഓഫ് ഹെൽത്ത് സർവീസസ് (ഡി.എച്ച്.എസ്) സ്ഥാനത്തെച്ചൊല്ലി മുതിർന്ന ഉദ്യോഗസ്ഥർ തമ്മിൽ കടുത്ത തർക്കം. കോടതി ഉത്തരവിന്റെ അടിസ്ഥാനത്തിൽ ചുമതലയേൽക്കാൻ എത്തിയ മുൻ ഡി.എച്ച്.എസ് ഡോ. റീനയും നിലവിലെ ഡി.എച്ച്.എസ് ഡോ. മീനാക്ഷിയും തമ്മിലുണ്ടായ തർക്കം രൂക്ഷമായതോടെ പൊലീസ് ഇടപെടേണ്ട സാഹചര്യമുണ്ടായി.

തിരുവനന്തപുരം ജനറൽ ആശുപത്രി വളപ്പിലുള്ള ഡി.എച്ച്.എസ് ആസ്ഥാനത്താണ് നാടകീയ സംഭവങ്ങൾ അരങ്ങേറിയത്. ഡി.എച്ച്.എസ് സ്ഥാനത്ത് നിന്ന് നേരത്തെ മാറ്റപ്പെട്ട ഡോ. റീന, തനിക്ക് അനുകൂലമായ കോടതി ഉത്തരവുമായി രാവിലെ ഓഫീസിലെത്തി. കോടതി വിധിയുടെ അടിസ്ഥാനത്തിൽ ഔദ്യോഗികമായി ചുമതലയേൽക്കാനും ഡയറക്ടറുടെ കസേരയിൽ ഇരിക്കാനുമുള്ള അവകാശം തനിക്കുണ്ടെന്ന് അവർ വാദിച്ചു.

എന്നാൽ നിലവിൽ ഡയറക്ടറുടെ ചുമതല വഹിക്കുന്ന ഡോ. മീനാക്ഷി കസേര ഒഴിയാൻ തയ്യാറായില്ല. സർക്കാരിന്റെ ഭാഗത്തുനിന്ന് വ്യക്തമായ ഉത്തരവോ നിർദേശമോ ലഭിക്കാതെ സ്ഥാനമൊഴിയില്ലെന്ന നിലപാടിലാണ് അവർ ഉറച്ചുനിന്നത്. ഇതോടെയാണ് ഇരുവരും തമ്മിൽ വാക്കുതർക്കം രൂക്ഷമായത്.

സംഭവം കൂടുതൽ വഷളായതോടെ ഡോ. മീനാക്ഷി പൊലീസിന്റെ സഹായം തേടി. ഔദ്യോഗിക ചുമതലകൾ നിർവഹിക്കുന്നതിന് പൊലീസ് സംരക്ഷണം വേണമെന്ന് അവർ ആവശ്യപ്പെട്ടതായാണ് വിവരം. തുടർന്ന് സ്ഥലത്തെത്തിയ പൊലീസ് ഉദ്യോഗസ്ഥർ ഇരുവരുമായും ചർച്ച നടത്തി സ്ഥിതി നിയന്ത്രണത്തിലാക്കാൻ ശ്രമിച്ചു.

ഡി.എച്ച്.എസ് സ്ഥാനവുമായി ബന്ധപ്പെട്ട തർക്കം ഇതിനുമുമ്പും വിവാദമായിരുന്നു. രണ്ട് ദിവസത്തെ അവധിക്ക് അപേക്ഷ നൽകിയിരുന്ന ഡോ. റീനയെ മുന്നറിയിപ്പില്ലാതെ സ്ഥാനത്ത് നിന്ന് മാറ്റിയ സർക്കാർ നടപടി വലിയ ചർച്ചകൾക്ക് വഴിവെച്ചിരുന്നു. തുടർന്ന് ഡോ. റീന കോടതിയെ സമീപിക്കുകയും അനുകൂല ഉത്തരവ് നേടുകയും ചെയ്തിരുന്നു.

കോടതി ഉത്തരവിന് പിന്നാലെ ആരോഗ്യമന്ത്രി കെ. മുരളീധരൻ നടത്തിയ പ്രതികരണവും ശ്രദ്ധേയമായി. ഡോ. റീനയെ സംബന്ധിച്ചും സർക്കാർ നിലപാടിനെ സംബന്ധിച്ചും മന്ത്രി നടത്തിയ പരാമർശങ്ങൾ വിവാദമായിരുന്നു. സർക്കാർ തീരുമാനങ്ങളെ അനുസരിക്കാത്ത ഉദ്യോഗസ്ഥർ പ്രധാന സ്ഥാനങ്ങളിൽ തുടരില്ലെന്നും വിഷയത്തിൽ മേൽക്കോടതിയെ സമീപിക്കാനുള്ള സാധ്യതയുണ്ടെന്നും അദ്ദേഹം വ്യക്തമാക്കിയിരുന്നു.