നീയൊക്കെ പെണ്ണാണോ? പ്രിയദർശിനി ബസിൽ കയറിയ പ്ലസ് ടു വിദ്യാർഥിനിയെ അപമാനിച്ചു: കണ്ടക്ടർക്കെതിരെ കേസെടുത്തു.

SEPTEMBER 27, 2026, 11:48 PM

കൊച്ചി: പ്ലസ് ടു വിദ്യാർഥിനിയെ അപമാനിച്ച സംഭവത്തിൽ കണ്ടക്ടർക്കെതിരെ കേസെടുത്തു. കെഎസ്ആർടിസിയുടെ പ്രിയദർശിനി ബസിൽ കയറിയ വിദ്യാർഥിനിയെയാണ് കണ്ടക്ടർ ദയാദാക്ഷിണ്യമില്ലാതെ അപമാനിച്ചത്.

സംഭവം ഇങ്ങനെ

ഗുരുവായൂർ-എറണാകുളം റൂട്ടിൽ സർവീസ് നടത്തുന്ന ലിമിറ്റഡ് സ്റ്റോപ്പ് പ്രിയദർശിനി ബസിൽ വെച്ചാണ് കണ്ടക്ടർ വിദ്യാർഥിനിയെ അവഹേളിക്കുകയും സൗജന്യ ടിക്കറ്റ് നൽകാൻ കഴിയില്ലെന്ന് പറയുകയും ചെയ്തത്. ഇതിനെയൊക്കെ കണ്ടാൽ പെണ്ണാണെന്ന് തോന്നുന്നില്ലെന്നും അതുകൊണ്ട് സീറോ ടിക്കറ്റ് നൽകാൻ കഴിയില്ല എന്ന് പറയുകയും ചെയ്തുവെന്ന് വിദ്യാർഥിനി പറവൂർ പൊലീസ് സ്റ്റേഷനിൽ നൽകിയ പരാതിയിൽ പറയുന്നു. നീ പെണ്ണാണോ എന്നറിയാൻ ഡ്രസ്സ് ഊരി നോക്കണമെന്നും അല്ലെങ്കിൽ പെണ്ണാണെന്ന് നെറ്റിയിൽ എഴുതി ഒട്ടിക്കണമെന്നും രോഷാകുലനായി പറഞ്ഞു. 'ഇതിനെ കണ്ടാൽ പെണ്ണാണെന്ന് തോന്നുമോ' എന്ന് ഉറക്കെ യാത്രക്കാരോടായി ചോദിക്കുകയും ചെയ്തതായി പെൺകുട്ടി പറഞ്ഞു. തന്റെ സ്ത്രീത്വത്തെ അപമാനിക്കുകയും മാനസിക ബുദ്ധിമുട്ട് തോന്നുന്ന തരത്തിൽ പൊതുസമൂഹത്തിന് മുന്നിൽ ആക്ഷേപിക്കുന്നതരത്തിലുള്ള പരാമർശങ്ങൾ നടത്തിയെന്നും പെൺകുട്ടി പരാതിയിൽ പറഞ്ഞു. തനിക്ക് നാണക്കേടും മാനസിക ബുദ്ധിമുട്ടും ഉണ്ടാക്കിയ കണ്ടക്ടർക്കെതിരെ നടപടി സ്വീകരിക്കണമെന്നും പെൺകുട്ടി ആവശ്യപ്പെട്ടിരുന്നു.

വിജിലൻസിന്റെ പ്രാഥമിക അന്വേഷണം

പെൺകുട്ടിയുടെ പരാതിയിൽ എറണാകുളം കുമ്പളം സ്വദേശി മഹേഷിനെതിരെയാണ് കേസ്. കെഎസ്ആർടിസി ഇയാളെ ഇന്നലെ സസ്‌പെൻഡ് ചെയ്തിരുന്നു. കണ്ടക്ടറുടെ ഭാഗത്ത് ഗുരുതര വീഴ്ചയുണ്ടായതായി കെഎസ്ആർടിസി വിജിലൻസിന്റെ പ്രാഥമിക അന്വേഷണത്തിൽ കണ്ടെത്തിയതിനെ തുടർന്നായിരുന്നു നടപടി.