കൊട്ടാരക്കരയിലെ ഐഷ പോറ്റിയുടെ തോൽവിക്ക് പിന്നാലെ കോൺഗ്രസിൽ നടപടി; രണ്ട് മണ്ഡലം കമ്മിറ്റികൾ പിരിച്ചുവിട്ടു

MAY 15, 2026, 3:33 AM

കൊല്ലം: നിയമസഭാ തെരഞ്ഞെടുപ്പിൽ കൊട്ടാരക്കരയിലെ യുഡിഎഫ് സ്ഥാനാർത്ഥി അയിഷ പോറ്റിയുടെ തോൽവിക്ക് പിന്നാലെ കോൺഗ്രസിൽ അച്ചടക്ക നടപടി. തെരഞ്ഞെടുപ്പ് പ്രവർത്തനങ്ങളിൽ ആവശ്യമായ സജീവതയും ഏകോപനവും ഉണ്ടായില്ലെന്ന വിലയിരുത്തലിന്റെ അടിസ്ഥാനത്തിൽ എഴുകോൺ, നെടുവത്തൂർ മണ്ഡലം കോൺഗ്രസ് കമ്മിറ്റികൾ പിരിച്ചുവിട്ടു.

സ്ഥാനാർത്ഥിയുടെ വിജയത്തിനായി ചില പ്രാദേശിക നേതാക്കളും സംഘടനാ ഘടകങ്ങളും ആവശ്യമായ ആത്മാർഥത കാണിച്ചില്ലെന്ന പരാതികൾ ഉയർന്നിരുന്നു. ഇതിനെ തുടർന്നാണ് ജില്ലാ കോൺഗ്രസ് നേതൃത്വം നടപടി സ്വീകരിച്ചത്.

അതേസമയം, ഡിസിസി ജനറൽ സെക്രട്ടറി കൂടിയായ ഉമ്മന്നൂർ പഞ്ചായത്ത് പ്രസിഡന്റ് ബ്രിജേഷ് എബ്രഹാമിനും കാരണം കാണിക്കൽ നോട്ടീസ് നൽകി. തെരഞ്ഞെടുപ്പ് പ്രവർത്തനങ്ങളിൽ വീഴ്ച വരുത്തിയെന്ന ആരോപണത്തിലാണ് വിശദീകരണം തേടിയിരിക്കുന്നത്.

കൊട്ടാരക്കരയിലെ പരാജയം കോൺഗ്രസിനകത്ത് വലിയ ചർച്ചയായിരിക്കുകയാണ്. തെരഞ്ഞെടുപ്പ് തോൽവിയുടെ കാരണം കണ്ടെത്തുന്നതിനും സംഘടനാ തലത്തിലെ പോരായ്മകൾ വിലയിരുത്തുന്നതിനുമായി കൂടുതൽ നടപടികൾ ഉണ്ടാകാനിടയുണ്ടെന്നാണ് സൂചന.

പ്രാദേശിക നേതൃത്വത്തിനിടയിലെ ഏകോപനക്കുറവും ആഭ്യന്തര ഭിന്നതകളും തെരഞ്ഞെടുപ്പ് ഫലത്തെ ബാധിച്ചുവെന്ന വിലയിരുത്തലും പാർട്ടിക്കുള്ളിൽ ശക്തമാണ്. വരുന്ന ദിവസങ്ങളിൽ കൂടുതൽ സംഘടനാ മാറ്റങ്ങൾ ഉണ്ടാകുമോയെന്നതും രാഷ്ട്രീയ കേന്ദ്രങ്ങൾ ശ്രദ്ധയോടെ നിരീക്ഷിക്കുകയാണ്.