കാസർഗോഡ് പാമ്പുകടിയേറ്റ് ചികിത്സയിലായിരുന്ന നാലര വയസുകാരി മരിച്ചു

APRIL 30, 2026, 1:53 AM

കാസർകോട് എളേരിത്തട്ടിൽ പാമ്പുകടിയേറ്റ് ചികിത്സയിലായിരുന്ന നാലര വയസുകാരി മരിച്ചു. ശരത്-അജിത ദമ്പതികളുടെ മകൾ ഋതു ചന്ദ്രയാണ് മരിച്ചത്.

കഴിഞ്ഞ തിങ്കളാഴ്ച വീട്ടുമുറ്റത്ത് കളിക്കുന്നതിനിടെ കളിപ്പാട്ടം മരക്കൂട്ടത്തിലേക്ക് വീണത് എടുക്കാൻ ശ്രമിക്കുന്നതിനിടെയാണ് കുട്ടിക്ക് പാമ്പുകടിയേറ്റത്. തുടർന്ന് നടത്തിയ പരിശോധനയിൽ മൂർഖനാണ് കടിച്ചതെന്ന് കണ്ടെത്തി.

അവശനിലയിലായ കുട്ടിയെ പരിയാരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും എത്തുമ്പോഴേക്കും നില ഗുരുതരമായിരുന്നു. ആന്തരിക അവയവങ്ങൾ പ്രവർത്തനരഹിതമായ നിലയിലായിരുന്നുവെന്ന് ഡോക്ടർമാർ വ്യക്തമാക്കി. വെന്റിലേറ്ററിൽ ചികിത്സയിലായിരുന്ന ഋതു ചന്ദ്ര ഇന്ന് രാവിലെയാണ് മരണത്തിന് കീഴടങ്ങിയത്.