ആന്റോ അഗസ്റ്റിനെതിരെ വിവിധ സ്റ്റേഷനുകളിലായുള്ളത് 15 ക്രിമിനൽ കേസുകൾ

SEPTEMBER 17, 2026, 12:44 AM

തിരുവനന്തപുരം: റിപ്പോർട്ടർ ടിവി എംഡി ആന്റോ അഗസ്റ്റിനെതിരായ എക്സൈസ് കേസിൽ ആന്റോയുടെ വീട്ടിൽനിന്ന് 138 മദ്യക്കുപ്പികൾ പിടിച്ചെടുത്തതായാണ് എഫ്ഐആറിൽ പറയുന്നത്.

ഏകദേശം 67 ലിറ്ററോളം വരുമിത്. അനധികൃതമായി അളവിൽ കവിഞ്ഞ മദ്യം സൂക്ഷിച്ചതിന് അബ്കാരി ആക്ടിലെ ജാമ്യമില്ലാ വകുപ്പുകൾ ചുമത്തിയാണ് എക്സൈസ് ആന്റോയ്ക്കെതിരേ കേസെടുത്തിരിക്കുന്നത്.

ആന്റോ അഗസ്റ്റിനെതിരെ രജിസ്റ്റർ ചെയ്തിട്ടുള്ള വിവിധ കേസുകളുടെ വിവരങ്ങളും പുറത്ത് വരുകയാണ്.

തട്ടിപ്പ്, വഞ്ചന, ഔദ്യോഗിക കൃത്യനിർവഹണം തടസ്സപ്പെടുത്തൽ, സ്ത്രീത്വത്തെ അപമാനിക്കൽ, കുറ്റകരമായ നരഹത്യയ്ക്കുള്ള ശ്രമം തുടങ്ങിയ ഗുരുതരമായ വകുപ്പുകൾ ചുമത്തി വിവിധ പോലീസ് സ്റ്റേഷനുകളിലായി എടുത്ത 15 കേസുകളാണ് ആന്റോക്കെതിരെയുള്ളത്.

മീനങ്ങാടി, കൽപ്പറ്റ, എറണാകുളം സെൻട്രൽ, കളമശ്ശേരി, മംഗലാപുരം നോർത്ത്, മേപ്പാടി, അമ്പലമേട് പൊലീസ് സ്റ്റേഷനുകളിലാണ് കേസുകൾ രജിസ്റ്റർ ചെയ്തിരിക്കുന്നത്.