സർള ഭട്ട് വധക്കേസ്: 36 വർഷത്തിന് ശേഷം യാസിന്‍ മാലിക്കിനെതിരെ കുറ്റപത്രം

JUNE 29, 2026, 9:31 AM

ശ്രീനഗർ: കശ്മീരി പണ്ഡിറ്റ് വിഭാഗത്തിൽ നിന്നുള്ള നഴ്‌സ് സർള ഭട്ടിനെ ക്രൂരമായ ബലാത്സംഗത്തിനിരയാക്കി കൊലപ്പെടുത്തിയ കേസിൽ 36 വർഷങ്ങൾക്ക് ശേഷം കുറ്റപത്രം സമർപ്പിച്ചു. ജമ്മു കശ്മീർ സ്റ്റേറ്റ് ഇൻവെസ്റ്റിഗേഷൻ ഏജൻസിയാണ് (SIA) ശ്രീനഗറിലെ പ്രത്യേക ടാഡ (TADA) കോടതിയിൽ തിങ്കളാഴ്ച കുറ്റപത്രം സമർപ്പിച്ചത്. 1990-ൽ നടന്ന ഈ ക്രൂരമായ കുറ്റകൃത്യത്തിന് പിന്നിലെ പ്രധാന സൂത്രധാരന്മാർ നിരോധിത ഭീകര സംഘടനയായ ജമ്മു ആൻഡ് കശ്മീർ ലിബറേഷൻ ഫ്രണ്ട് (JKLF) മേധാവി മുഹമ്മദ് യാസിൻ മാലിക്ക്, ഖുർഷിദ് അഹമ്മദ് ചാൽക്കൂ എന്നിവരാണെന്ന് കുറ്റപത്രത്തിൽ വ്യക്തമാക്കുന്നു.

ദീർഘകാലം നീണ്ട അന്വേഷണം പൂർത്തിയായതായും 737 പേജുകളുള്ള വിപുലമായ കുറ്റപത്രമാണ് കോടതിയിൽ സമർപ്പിച്ചിരിക്കുന്നതെന്നും മുതിർന്ന പൊലീസ് ഉദ്യോഗസ്ഥർ വ്യക്തമാക്കി. സർള ഭട്ടിന്റെ കൊലപാതകം ഒരു ഒറ്റപ്പെട്ട സംഭവമായിരുന്നില്ലെന്നും, കശ്മീർ താഴ്‌വരയിൽ നിന്ന് ന്യൂനപക്ഷ വിഭാഗമായ കശ്മീരി പണ്ഡിറ്റുകളെ പൂർണ്ണമായി ഒഴിപ്പിക്കുക എന്ന ലക്ഷ്യത്തോടെ JKLF ആസൂത്രിതമായി നടപ്പിലാക്കിയ ഗൂഢാലോചനയുടെ ഭാഗമായിരുന്നുവെന്നും അന്വേഷണത്തിൽ കണ്ടെത്തിയിട്ടുണ്ട്.

ഈ ഗൂഢാലോചനയിൽ പങ്കാളിയായ പ്രതി ചാൽക്കൂ നിലവിൽ ഒളിവിലാണ്. ഇയാൾ പാക് അധീന കശ്മീരിലേക്ക് കടന്നതായാണ് നിഗമനം. കേസിലെ മറ്റ് പ്രതികളായ അബ്ദുല്ല ഹമീദ് ഷെയ്ക്ക്, മുഹമ്മദ് യൂസഫ് സോഫി, ഗുലാം മുഹമ്മദ് താപ്‌ലൂ എന്നിവർ ഇതിനകം മരണപ്പെട്ടിട്ടുണ്ട്. പ്രധാന പ്രതിയായ യാസിൻ മാലിക് നിലവിൽ ഭീകരവാദ ഫണ്ടിങ് കേസുമായി ബന്ധപ്പെട്ട് ഡൽഹിയിലെ തീഹാർ ജയിലിൽ തടവിലാണ്.

1990 ഏപ്രിൽ 18-നാണ് ആയുധധാരികളായ ഭീകരർ 27-കാരിയായ സർളയെ ഹബ്ബാ ഖാത്തൂൺ ഹോസ്റ്റലിൽ നിന്ന് തട്ടിക്കൊണ്ടുപോയത്. കശ്മീർ താഴ്‌വരയിലെ സർക്കാർ ജോലികളിൽ നിന്നും കശ്മീരി പണ്ഡിറ്റുകൾ കൂട്ടത്തോടെ ഒഴിഞ്ഞു പോകണമെന്ന ഭീകരരുടെ കടുത്ത നിർദേശം പാലിക്കാൻ സർള തയ്യാറാകാതിരുന്നതാണ് ഈ ക്രൂരതയ്ക്ക് കാരണമായത്.

തട്ടിക്കൊണ്ടുപോയതിന്റെ പിറ്റേദിവസം മല്ലാബാഗിലെ ഉമർ കോളനിയിൽ ഒന്നിലധികം വെടിയുണ്ടകൾ ഏറ്റ നിലയിൽ സർളയുടെ മൃതദേഹം കണ്ടെത്തുകയായിരുന്നു. പൊലീസിന് വിവരം ചോർത്തി നൽകുന്ന ആളാണ് സർള എന്നെഴുതിയ കുറിപ്പും ഭീകരർ മൃതദേഹത്തിനൊപ്പം ഉപേക്ഷിച്ചിരുന്നു. ശ്രീനഗറിലെ പ്രശസ്തമായ ഷെർ - ഇ - കശ്മീർ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിലെ നഴ്‌സായിരുന്നു സർള ഭട്ട്. പതിറ്റാണ്ടുകൾക്ക് ശേഷമെങ്കിലും കുറ്റപത്രം സമർപ്പിച്ചത് ഇരയുടെ കുടുംബത്തിന് നീതി ലഭിക്കുന്നതിലേക്ക് വഴിതുറക്കുമെന്നാണ് കരുതപ്പെടുന്നത്.