'അഞ്ച് രൂപയുടെ ഫെവിക്വിക് വാങ്ങിവരൂ'; കുട്ടിയുടെ മുറിവിന് തുന്നലിന് പകരം പശതേച്ച് 'ചികിത്സ'; ഉത്തർപ്രദേശിൽ ഡോക്ടർക്കെതിരെ പ്രതിഷേധം

NOVEMBER 20, 2025, 4:09 AM

ഉത്തർപ്രദേശിലെ മീററ്റിൽ ഒരു സ്വകാര്യ ആശുപത്രിയിൽ നടന്ന സംഭവം ഞെട്ടലുണ്ടാക്കുന്നു. നെറ്റിയിൽ മുറിവേറ്റ കുട്ടിയെ തുന്നലിടുന്നതിന് പകരം ഡോക്ടർ സാധാരണ ഫെവിക്വിക് പശ ഉപയോഗിച്ച് ചികിത്സിച്ചത് ഗുരുതരമായ വൈദ്യപ്പിഴവായി മാറി.

മീററ്റിലെ ജഗ്രിതി വിഹാറിൽ താമസിക്കുന്ന ജസ്പീന്ദർ സിങ്ങിന്റെ മകനാണ് വീട്ടിൽ കളിക്കുന്നതിനിടെ മേശയുടെ കോണിലിടിച്ച് നെറ്റിയിൽ മുറിവേറ്റത്. ഉടൻതന്നെ കുട്ടിയെ അടുത്തുള്ള ഭാഗ്യശ്രീ ആശുപത്രിയിൽ എത്തിച്ചു. ഈ സമയത്ത് ഡ്യൂട്ടിയിലുണ്ടായിരുന്ന ഡോക്ടർ, മുറിവ് തുന്നിച്ചേർക്കുന്നതിന് പകരം അഞ്ചു രൂപയുടെ ഒരു ഫെവിക്വിക് ട്യൂബ് പുറത്തുനിന്ന് വാങ്ങി വരാൻ കുട്ടിയുടെ കുടുംബത്തോട് ആവശ്യപ്പെടുകയായിരുന്നു.

കുടുംബം പശ വാങ്ങി നൽകിയപ്പോൾ, അത് മുറിവിൽ തേച്ച് പിടിപ്പിച്ച് ഡോക്ടർ ചികിത്സ പൂർത്തിയാക്കിയെന്നാണ് പരാതി. കടുത്ത വേദനയോടെ കുട്ടി കരഞ്ഞപ്പോൾ, പരിഭ്രമം വേണ്ടെന്നും വേദന ഉടൻ കുറയുമെന്നുമാണ് ഡോക്ടർ മാതാപിതാക്കളോട് പറഞ്ഞത്.

എന്നാൽ, രാത്രി മുഴുവൻ കടുത്ത അസ്വസ്ഥത പ്രകടിപ്പിച്ച കുട്ടിയെ അടുത്ത ദിവസം മറ്റൊരു ആശുപത്രിയിലേക്ക് മാറ്റി. ലോക്പ്രിയ ആശുപത്രിയിൽ കുട്ടിയെ പരിശോധിച്ച ഡോക്ടർമാർക്ക്, മുറിവിൽ ഉറച്ചുപോയ പശയുടെ ഭാഗങ്ങൾ നീക്കം ചെയ്യാൻ മണിക്കൂറുകളെടുത്തു. പശ പൂർണമായും നീക്കം ചെയ്ത ശേഷം മുറിവ് വൃത്തിയാക്കി അവർ തുന്നിച്ചേർക്കുകയായിരുന്നു.

സംഭവത്തിൽ കുട്ടിയുടെ കുടുംബം മീററ്റ് ചീഫ് മെഡിക്കൽ ഓഫീസർക്ക് (സിഎംഒ) പരാതി നൽകി. പരാതി ലഭിച്ചതായി സ്ഥിരീകരിച്ച സിഎംഒ അശോക് കട്ടാരിയ, സംഭവത്തെക്കുറിച്ച് അന്വേഷിക്കാൻ പ്രത്യേക സംഘത്തെ നിയമിച്ചതായി അറിയിച്ചു. അന്വേഷണ റിപ്പോർട്ടിന്റെ അടിസ്ഥാനത്തിലാകും ഈ ഡോക്ടർക്കെതിരെ തുടർനടപടികൾ സ്വീകരിക്കുക. കുട്ടികളോട് പോലും ഡോക്ടർ കാണിച്ച ഈ അനാസ്ഥ വലിയ പ്രതിഷേധത്തിന് വഴിയൊരുക്കിയിരിക്കുകയാണ്.