ഡൽഹി വിമാനത്താവളത്തിൽ രണ്ട് വിമാനങ്ങളുടെ ചിറകുകൾ തമ്മിൽ കൂട്ടിയിടിച്ചു; അപകടം ഒഴിവായത് തലനാരിഴയ്ക്ക്

APRIL 16, 2026, 7:39 AM

ഡൽഹി: ഡൽഹിയിൽ നിന്ന് ഹൈദരാബാദിലേക്ക് സർവീസ് നടത്താനിരുന്ന ആകാശ എയറിൻ്റെ നിർത്തിയിട്ടിരുന്ന ക്യുപി 1406 വിമാനത്തിൻ്റെ ചിറകിലേക്ക് മറ്റൊരു വിമാനക്കമ്പനിയായ സ്പൈസ്ജെറ്റിൻ്റെ ബി737-700 എന്ന വിമാനം വന്നിടിച്ചു.

ഉച്ചയ്ക്ക് 2.15-ഓടെയാണ് വിമാനങ്ങള്‍ നേരിയ തോതില്‍ കൂട്ടിയിടിച്ചത്.സ്‌പൈസ്‌ജെറ്റിന്റെ വലതുവശത്തെ വിംഗ്‌ലെറ്റിന് കേടുപാടുകൾ സംഭവിച്ചു. അകാസ എയർ വിമാനത്തിന്റെ വാലിലെ ഇടത് ഭാഗത്തുള്ള സ്റ്റെബിലൈസറിനും കേടുപാടുകള്‍ സംഭവിച്ചു. സ്പൈസ് ജെറ്റ് വിമാനം പാർക്കിംഗ് ബേയിലേക്ക് നീങ്ങുന്നതിനിടെയാണ് സംഭവം. ഈ സമയം ഹൈദരാബാദിലേക്ക് പുറപ്പെടാനായി തയ്യാറെടുക്കുകയായിരുന്ന അകാസ എയർ വിമാനത്തിൽ സ്പൈസ് ജെറ്റ് തട്ടുകയായിരുന്നുവെന്ന്‌ ഫ്ലൈറ്റ് റാഡാർ24 സൂചിപ്പിക്കുന്നു.

അപകടത്തിന് പിന്നാലെ വിമാനങ്ങളിൽ ഉണ്ടായിരുന്ന എല്ലാ യാത്രക്കാരെയും ജീവനക്കാരെയും സുരക്ഷിതമായി പുറത്തിറക്കി.ആകാശ എയറിൻ്റെ യാത്രക്കാരെ എത്രയും വേഗം ഹൈദരാബാദിലേക്ക് എത്തിക്കുന്നതിന് വേണ്ട ബദൽ ക്രമീകരണങ്ങൾ ചെയ്യുന്നുണ്ടെന്ന് ആകാശ എയർ വക്താവ് വ്യക്തമാക്കി. അപകടത്തിൽപ്പെട്ട വിമാനങ്ങളെ സുരക്ഷിത കേന്ദ്രത്തിലേക്ക് മാറ്റിയിട്ടുണ്ട്.