സൗത്ത് ആഫ്രിക്ക സന്ദർശിക്കാൻ ആഗ്രഹിക്കുന്ന ഇന്ത്യൻ സഞ്ചാരികൾക്ക് സന്തോഷവാർത്തയുമായി ആഫ്രിക്കൻ ഭരണകൂടം. ഇന്ത്യക്കാർക്കായി ഇലക്ട്രോണിക് ട്രാവൽ ഓതറൈസേഷൻ അഥവാ ഇടിഎ സംവിധാനം സൗത്ത് ആഫ്രിക്ക ഔദ്യോഗികമായി ആരംഭിച്ചു. ഇതോടെ വിസയ്ക്കായി അപേക്ഷാ കേന്ദ്രങ്ങൾ കയറിയിറങ്ങുന്ന സങ്കീർണ്ണമായ പ്രക്രിയകൾക്ക് വിരാമമായിരിക്കുകയാണ്.

വെറും 24 മുതൽ 48 മണിക്കൂറിനുള്ളിൽ ഇനിമുതൽ യാത്രക്കാർക്ക് ഡിജിറ്റൽ യാത്രാാനുമതി ലഭിക്കും. വിനോദസഞ്ചാരം, ഹ്രസ്വകാല സന്ദർശനം, ബിസിനസ്സ് ആവശ്യങ്ങൾ എന്നിവയ്ക്കായി എത്തുന്നവർക്കാണ് ഈ സൗകര്യം പ്രയോജനപ്പെടുക. പരമാവധി തൊണ്ണൂറ് ദിവസത്തെ താമസത്തിനാണ് ഇടിഎ വഴി അനുമതി ലഭിക്കുന്നത്.

മുൻപ് പാസ്‌പോർട്ടിൽ പതിച്ചുനൽകിയിരുന്ന പരമ്പരാഗത വിസ സ്റ്റിക്കറുകൾക്ക് പകരമായാണ് ഡിജിറ്റൽ പെർമിറ്റ് സംവിധാനം കൊണ്ടുവന്നത്. യാത്രക്കാരുടെ പാസ്‌പോർട്ടുമായി നേരിട്ട് ബന്ധിപ്പിക്കുന്നതാണ് ഈ ഇലക്ട്രോണിക് സംവിധാനം. ഈ കാലയളവിൽ ഒന്നിൽ കൂടുതൽ തവണ രാജ്യത്തേക്ക് പ്രവേശിക്കാൻ മൾട്ടിപ്പിൾ എൻട്രി സൗകര്യവും ഇടിഎ നൽകുന്നുണ്ട്.

എന്നാൽ സൗത്ത് ആഫ്രിക്കയിൽ ജോലി ചെയ്യാനോ ദീർഘകാലം താമസിക്കാനോ ഈ വിസ ഉപയോഗിക്കാൻ സാധിക്കില്ല. അതിർത്തികളിൽ എത്തുമ്പോഴുള്ള ഇമിഗ്രേഷൻ പരിശോധനകൾ പൂർത്തിയാക്കിയ ശേഷമായിരിക്കും അന്തിമ പ്രവേശനം അനുവദിക്കുക. നിലവിൽ ഇന്ത്യയ്ക്ക് പുറമെ ചൈന, ഇന്തോനേഷ്യ, മെക്സിക്കോ എന്നീ രാജ്യങ്ങളിലെ സഞ്ചാരികൾക്കാണ് ഈ ആനുകൂല്യം ലഭ്യമാക്കിയിട്ടുള്ളത്.

പ്രാരംഭ ഘട്ടത്തിൽ പ്രധാനപ്പെട്ട മൂന്ന് പ്രമുഖ അന്താരാഷ്ട്ര വിമാനത്താവളങ്ങൾ വഴിയാണ് ഈ സേവനം ലഭ്യമാക്കിയിരിക്കുന്നത്. ജോഹന്നസ്ബർഗിലെ ഒആർ താംബോ, കേപ് ടൗൺ, ലാൻസെറിയ എന്നീ വിമാനത്താവളങ്ങൾ വഴിയെത്തുന്നവർക്ക് ആദ്യ ഘട്ടത്തിൽ ഇടിഎ ഉപയോഗിക്കാം. വരും ദിവസങ്ങളിൽ കൂടുതൽ വിമാനത്താവളങ്ങളിലേക്കും അതിർത്തി കേന്ദ്രങ്ങളിലേക്കും ഈ സംവിധാനം വ്യാപിപ്പിക്കാൻ അധികൃതർ പദ്ധതിയിടുന്നു.

സൗത്ത് ആഫ്രിക്കൻ ഡിപ്പാർട്ട്മെന്റ് ഓഫ് ഹോം അഫയേഴ്സിന്റെ ഔദ്യോഗിക പോർട്ടൽ വഴി ഓൺലൈനായി അപേക്ഷ സമർപ്പിക്കാം. അപേക്ഷകർ പോർട്ടലിൽ അക്കൗണ്ട് ഉണ്ടാക്കിയ ശേഷം വ്യക്തിഗത വിവരങ്ങളും യാത്ര രേഖകളും നൽകേണ്ടതുണ്ട്. സ്മാർട്ട്‌ഫോൺ ഉപയോഗിച്ച് ലൈവ് ബയോമെട്രിക് ചിത്രവും പാസ്‌പോർട്ടിന്റെ വ്യക്തമായ പകർപ്പും സമർപ്പിക്കണം.

ഓൺലൈൻ വഴി നിശ്ചിത ഫീസ് അടച്ച് അപേക്ഷ സമർപ്പിച്ചാൽ ഇതിന്റെ പുരോഗതി തത്സമയം ട്രാക്ക് ചെയ്യാനും സാധിക്കും. അപേക്ഷ അംഗീകരിക്കപ്പെടുന്നതോടെ പാസ്‌പോർട്ടുമായി ബന്ധിപ്പിച്ച ക്യൂആർ കോഡ് അടങ്ങിയ ഡിജിറ്റൽ സ്ഥിരീകരണം അപേക്ഷകന് ലഭിക്കും. യാത്ര ചെയ്യുന്ന വേളയിൽ സ്മാർട്ട്ഫോണിലോ പ്രിന്റൗട്ടിലോ ഈ ക്യൂആർ കോഡ് കാണിച്ചാൽ മതിയാകും.

ഇന്ത്യയിൽ നിന്നുള്ള വിനോദസഞ്ചാരികളുടെ എണ്ണത്തിൽ വലിയ വർദ്ധനവ് രേഖപ്പെടുത്തുന്ന സാഹചര്യത്തിലാണ് പുതിയ പരിഷ്കാരം. പേപ്പർവർക്കുകൾ കുറയുന്നതോടെ യാത്രാ പ്ലാനുകൾ വേഗത്തിൽ പൂർത്തിയാക്കാൻ ഇന്ത്യക്കാർക്ക് സാധിക്കും. ഇത് സൗത്ത് ആഫ്രിക്കൻ വിനോദസഞ്ചാര മേഖലയ്ക്ക് വലിയ ഉണർവ് സമ്മാനിക്കുമെന്ന് അധികൃതർ പ്രതീക്ഷിക്കുന്നു.

ഇന്ത്യയിൽ നിന്നുള്ള ട്രാവൽ ഏജൻസികളും വിനോദസഞ്ചാരികളും ഏറെ ആവേശത്തോടെയാണ് പുതിയ തിരുമാനത്തെ സ്വാഗതം ചെയ്തിരിക്കുന്നത്. വിസ ലഭിക്കാനുള്ള കാലതാമസം ഒഴിവാകുന്നതോടെ അവസാന നിമിഷമുള്ള യാത്രകൾ പോലും ഇനി എളുപ്പമാകും. അന്താരാഷ്ട്ര യാത്രകൾ കൂടുതൽ സുതാര്യവും വേഗതയേറിയതുമാക്കാനുള്ള ഡിജിറ്റൽ പരിഷ്കാരങ്ങളുടെ ഭാഗമാണ് ഈ നീക്കം.

English Summary:

South Africa has launched an Electronic Travel Authorisation system for eligible Indian passport holders allowing travellers to receive digital travel approval within 24 to 48 hours for visits up to 90 days

Tags:

Malayalam News, News Malayalam, Latest Malayalam News, Vachakam News, World News Malayalam, South Africa ETA Visa Indians, South Africa Electronic Travel Authorisation, India South Africa Travel Visa 48 Hours

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്