പത്താം ക്ലാസ് വിദ്യാർത്ഥിക്ക് നേരെ ലൈംഗിക പീഡനം; പ്രിൻസിപ്പലിന്റെ മകനെതിരെ പോക്സോ കേസ്

JUNE 16, 2026, 6:24 AM

ഗുജറാത്ത്: ഗാന്ധിനഗറിൽ സ്വകാര്യ സ്കൂൾ ഹോസ്റ്റലിൽ താമസിച്ചിരുന്ന പത്താം ക്ലാസ് വിദ്യാർത്ഥി ലൈംഗിക പീഡനത്തിന് ഇരയായതായി പരാതി. സംഭവത്തിൽ സ്കൂൾ പ്രിൻസിപ്പലിന്റെ മകനെതിരെ പൊലീസ് കേസെടുത്തു.

ഗാന്ധിനഗർ സെക്ടർ-21 പൊലീസ് സ്റ്റേഷനിലാണ് പ്രതിക്കെതിരെ പോക്സോ നിയമപ്രകാരവും പട്ടികജാതി–പട്ടികവർഗ അതിക്രമങ്ങൾ തടയൽ നിയമപ്രകാരവും (SC/ST Act) കേസുകൾ രജിസ്റ്റർ ചെയ്തിരിക്കുന്നത്.

സാമ്പത്തികമായി പിന്നാക്കം നിൽക്കുന്ന കുടുംബത്തിൽ നിന്നുള്ള വിദ്യാർത്ഥി പരീക്ഷാ തയ്യാറെടുപ്പിനായി ഹോസ്റ്റലിൽ താമസിക്കുകയായിരുന്നു. ഈ സമയത്ത് പ്രതി കുട്ടിയെ തന്റെ മുറിയിലേക്ക് വിളിച്ച് സൗഹൃദം സ്ഥാപിക്കുകയും പിന്നീട് പലതവണ ലൈംഗികമായി പീഡിപ്പിക്കുകയുമായിരുന്നു എന്നാണ് പരാതി.

പീഡനങ്ങൾക്കിടയിലും കുട്ടി പത്താം ക്ലാസ് ബോർഡ് പരീക്ഷകൾ പൂർത്തിയാക്കി വീട്ടിലേക്ക് മടങ്ങി. എന്നാൽ പിന്നീട് പോലും പ്രതി ഫോണിലൂടെ ബന്ധപ്പെടുകയും മാനസിക സമ്മർദ്ദം ചെലുത്തുകയും ചെയ്തതായി കുടുംബം ആരോപിക്കുന്നു.

വീട്ടിലെത്തിയ ശേഷം കുട്ടിയുടെ പെരുമാറ്റത്തിൽ മാറ്റങ്ങൾ കണ്ടതിനെ തുടർന്ന് നടത്തിയ ചോദ്യംചെയ്യലിലാണ് പീഡനവിവരം പുറത്തുവന്നതെന്ന് കുടുംബം പറയുന്നു. തുടർന്ന് കുടുംബം പൊലീസിൽ പരാതി നൽകുകയായിരുന്നു.

പൊലീസ് കേസ് രജിസ്റ്റർ ചെയ്ത് വിശദമായ അന്വേഷണം ആരംഭിച്ചിട്ടുണ്ട്.