എയർടെൽ നിരക്ക് വർധിപ്പിച്ചു; 84 ദിവസത്തെ പ്ലാനിന് ഇനി വില കൂടും

APRIL 19, 2026, 9:57 PM

പ്രമുഖ ടെലികോം സേവനദാതാവായ ഭാരതി എയർടെൽ തങ്ങളുടെ ജനപ്രിയ പ്രീപെയ്ഡ് പ്ലാനുകളിൽ ഒന്നിന്റെ വില വർധിപ്പിച്ചു. 84 ദിവസത്തെ വാലിഡിറ്റിയുള്ള, പ്രതിദിനം 1.5 ജിബി ഡാറ്റ നൽകുന്ന പ്ലാനിന്റെ വില 859 രൂപയിൽ നിന്ന് 899 രൂപയായാണ് ഉയർത്തിയത്.

ഈ മാറ്റത്തോടെ 700-800 രൂപ നിരക്കിലുണ്ടായിരുന്ന പ്ലാനുകളിൽ കാര്യമായ മാറ്റം വന്നിരിക്കുകയാണ്. നിലവിൽ ഈ വാലിഡിറ്റി വിഭാഗത്തിൽ എയർടെലിന്റെ പ്രധാന ഓപ്ഷനായി 899 രൂപയുടെ പ്ലാൻ മാറിയിട്ടുണ്ട്.

പുതുക്കിയ 899 രൂപയുടെ പ്ലാനിൽ അൺലിമിറ്റഡ് വോയ്‌സ് കോളുകൾ, പ്രതിദിനം 100 എസ്എംഎസ്, 84 ദിവസത്തേക്ക് 1.5 ജിബി ഹൈസ്പീഡ് ഡാറ്റ എന്നിവ ലഭിക്കും. പ്രതിദിന ഡാറ്റ പരിധി കഴിഞ്ഞാൽ ഇന്റർനെറ്റ് വേഗത 64 Kbps ആയി കുറയും.

കൂടാതെ 12 മാസത്തെ അഡോബ് എക്സ്പ്രസ് പ്രീമിയം സബ്‌സ്‌ക്രിപ്‌ഷൻ, സ്‌പാം അലേർട്ടുകൾ, സൗജന്യ ഹലോ ട്യൂൺസ് എന്നിവയും ഈ പ്ലാനിനൊപ്പമുണ്ട്.

എന്നാൽ നേരത്തെ 859 രൂപയുടെ പ്ലാനിലുണ്ടായിരുന്ന ക്യാഷ്ബാക്ക് ആനുകൂല്യങ്ങൾ നൽകുന്ന 'റിവാർഡ്‌സ്‌ മിനി' (RewardsMini) സബ്‌സ്‌ക്രിപ്‌ഷൻ പുതിയ പ്ലാനിൽ നിന്ന് ഒഴിവാക്കിയതായാണ് സൂചന. ഓരോ ഉപഭോക്താവിൽ നിന്നുമുള്ള ശരാശരി വരുമാനം (ARPU) വർധിപ്പിക്കുന്നതിന്റെ ഭാഗമായാണ് കമ്പനിയുടെ ഈ നീക്കം.