വയറിന്റെ ആരോഗ്യം വേനലിലും കാത്തുസൂക്ഷിക്കാം; ശ്രദ്ധിക്കേണ്ട 5 പ്രധാന കാര്യങ്ങൾ

APRIL 17, 2026, 3:41 AM

വേനൽക്കാലം മാമ്പഴങ്ങളുടെയും അവധിക്കാലത്തിന്റെയും സമയമാണെങ്കിലും, നമ്മുടെ ദഹനവ്യവസ്ഥയെ സംബന്ധിച്ചിടത്തോളം വെല്ലുവിളികൾ നിറഞ്ഞ കാലഘട്ടമാണ്. അന്തരീക്ഷ താപനില ഉയരുന്നതോടെ അസിഡിറ്റി, വയർ വീർക്കൽ (Bloating), അണുബാധകൾ തുടങ്ങിയ ദഹനപ്രശ്നങ്ങൾ സാധാരണമാണ്. കടുത്ത ചൂടും നിർജ്ജലീകരണവും ഭക്ഷണസാധനങ്ങൾ വേഗത്തിൽ കേടാകുന്നതുമാണ് ഇതിന് പ്രധാന കാരണം. ലളിതമായ ചില ശീലങ്ങളിലൂടെ ഈ പ്രശ്നങ്ങളെ മറികടക്കാമെന്ന് വിദഗ്ധർ അഭിപ്രായപ്പെടുന്നു.

കൈലാഷ് ഹോസ്പിറ്റലിലെ ഗ്യാസ്ട്രോ എൻട്രോളജിസ്റ്റ് ഡോ. സരോജ് ദുബെയുടെ അഭിപ്രായത്തിൽ, ശരീരത്തിലെ ജലാംശം നിലനിർത്തുക എന്നതാണ് ഏറ്റവും പ്രധാനം. എന്നാൽ ആഹാരത്തിന് തൊട്ടുപിന്നാലെ അമിതമായി വെള്ളം കുടിക്കുന്നത് ഒഴിവാക്കണം. പകരം പകൽ സമയങ്ങളിൽ ഇടയ്ക്കിടെ കുറഞ്ഞ അളവിൽ വെള്ളം കുടിക്കുന്നത് ദഹനത്തെ സഹായിക്കും.

എളുപ്പത്തിൽ ദഹിക്കുന്ന ഭക്ഷണങ്ങളായ തൈര്, മോരുംവെള്ളം, കരിക്കിൻ വെള്ളം, പഴങ്ങൾ, അധികം വേവാത്ത പച്ചക്കറികൾ എന്നിവ ഭക്ഷണത്തിൽ ഉൾപ്പെടുത്തണം. എരിവുള്ളതും എണ്ണയിൽ വറുത്തതുമായ ഭക്ഷണങ്ങൾ ഒഴിവാക്കുന്നത് ദഹനസംബന്ധമായ അസ്വസ്ഥതകൾ കുറയ്ക്കാൻ സഹായിക്കും.

ഭക്ഷണം കഴിക്കുന്ന രീതിയിലും ചില മാറ്റങ്ങൾ വരുത്തേണ്ടതുണ്ട്. സാർവോദയ ഹോസ്പിറ്റലിലെ ഡോ. ഭാസ്കർ നന്തി പറയുന്നത്, ചെറിയ അളവിൽ ഇടയ്ക്കിടെ ഭക്ഷണം കഴിക്കുന്നതാണ് വേനൽക്കാലത്ത് ഉചിതമെന്നാണ്. ഭക്ഷണം വേഗത്തിൽ വിഴുങ്ങാതെ നന്നായി ചവച്ചരച്ച് കഴിക്കണം.

രാത്രി വൈകി ഭക്ഷണം കഴിക്കുന്ന ശീലവും ഒഴിവാക്കണം. കൂടാതെ, വേനൽക്കാലത്ത് ഭക്ഷണ ശുചിത്വം വളരെ പ്രധാനമാണ്. പഴങ്ങളും പച്ചക്കറികളും നന്നായി കഴുകി ഉപയോഗിക്കണം. ബാക്കി വരുന്ന ആഹാരങ്ങൾ ഉടൻ തന്നെ ഫ്രിഡ്ജിൽ സൂക്ഷിക്കണമെന്നും അത് കൃത്യമായി ചൂടാക്കി മാത്രമേ പിന്നീട് ഉപയോഗിക്കാവൂ എന്നും ഡോക്ടർമാർ ഓർമ്മിപ്പിക്കുന്നു.

അസിഡിറ്റി അല്ലെങ്കിൽ വയറിന് അസ്വസ്ഥത തുടങ്ങിയ ചെറിയ ലക്ഷണങ്ങളെ അവഗണിക്കരുത്. തുടക്കത്തിലേ ശ്രദ്ധിക്കുന്നത് വലിയ ആരോഗ്യപ്രശ്നങ്ങൾ ഒഴിവാക്കാൻ സഹായിക്കും. ശരിയായ രീതിയിലുള്ള ജലപാനവും ശുചിത്വവും ലളിതമായ ഭക്ഷണക്രമവും പാലിച്ച് ഈ വേനൽക്കാലം ആരോഗ്യകരമായി ആസ്വദിക്കാവുന്നതാണ്.